Ṭawngṭaina

5 A Hun leh Hmun A Pawimawh Em?

SAKHAW lian zawng zawng deuhthaw chuan ṭawngṭaina in ropui tak takte neih chu sawi mawiin, ṭawngṭai hun tûr thlengin an ruat tih i lo hre tawh ngei ang. Bible chuan ṭawngṭai hun tûr leh hmun tûr chu a bithliah em?

Bible chuan ṭawngṭai nâna hun inâwm a awm tih a târ lang ngei mai. Entîr nân, Isua chuan a zirtîrte nêna chaw an ei hmain ṭawngṭaiin Pathian hnênah lâwmthu a sawi a ni. (Luka 22:17) Tin, a zirtîrte Pathian be tûra an kal khâwm pawhin, an ṭawngṭai ṭhîn bawk. Chutiang chuan anni chuan Juda inkhâwmna in leh Jerusalem biak ina tûn hma aṭanga an lo tih ṭhin dân chu an chhawm chho a ni. Pathianin biak in chu “hnam tin tân ṭawngṭaina in” nihtîr a tum si a.—Marka 11:17.

Pathian chhiahhlawhte kal khâwma an ṭawngṭai hian, chu chuan rah a chhuah thei a. Chuta kal khâwmte’n rilru thuhmun an put a, an tâna ṭawngṭaina chu Pathian Lehkha Thua thu bulte mil a nih chuan, Pathian a lâwm a ni. Ṭawngṭaina chuan Pathian chu tih a tum loh pawh ti tûrin a chêttîr thei a ni. (Hebrai 13;18, 19) Jehova Thuhretute chu an inkhâwmnaah an ṭawngṭai ziah ṭhîn a. I hnaih bera awm Kingdom Hall-a kal a, chutiang ṭawngṭaina ngaithla tûrin duhsak takin kan sâwm che a ni.

Amaherawhchu, Bible chuan ṭawngṭaina chu hun bîk leh hmun bîk aṭang chauhva hlân tûrin min ti lo. Bible-ah chuan Pathian chhiahhlawhte chu eng hunah leh khawi hmunah pawh an ṭawngṭai tih kan hmu a. Isua chuan: “Nang erawh chuan i ṭawngṭaiin, i pindan chhûngrilah lût la, i kawng khâr la, i Pa arûka awm hnênah chuan ṭawngṭai rawh; tichuan, i Pa arûka hmu ṭhîntu chuan a rûl ang che,” tiin a sawi.—Matthaia 6:6.

Hei hi sâwmna duhawm tak a ni lâwm ni? Lei leh vâna Lalber chu engtik lai pawhin, nangmah chauhva i awm lai pawhin i be thei a; tin ani chuan a ngaithla dâwn che tih i hre tlat thei bawk a ni. Chuti chu, Isua’n ṭawngṭai tûra hmun fianrial a pan fo ṭhîn pawh chu a mak hran lo. Ṭum khat phei chu, thil pawimawh ber chungchânga thu tlûkna a siamna kawnga kaihhruaina zawngin a ṭawngṭai zânkhua a ni.—Luka 6:12, 13.

Bible-a chhinchhiah mipa leh hmeichhe dangte pawh thu tlûkna pawimawh tak emaw, harsatna namai lo emaw an tawh hian an ṭawngṭai a. A chângin a riin an ṭawngṭai a, a chângin a ri lovin an ṭawngṭai a; mi dang nêna an awm lai leh mahni chauhva an awm lai pawhin an ṭawngṭai bawk. A pawimawh ber chu an ṭawngṭai hi a ni. Pathianin a chhiahhlawhte chu ‘bâng lova ṭawngṭai’ tûrin a sâwm a. (1 Thessalonika 5:17) A duhzâwng titute ṭawngṭaina chu ngaihthlâksak a peih reng a ni. Chu sâwmna chuan Jehova hmangaihna a lantîr a ni lâwm ni?

Tûn lai rinhlelhnaa khat khawvêlah hian mi tam tak chuan ṭawngṭaina hlutzia chu an ringhlel a. Chuvângin, heti hian i zâwt pawh a ni thei a ni, ‘Chu chuan min ṭanpui tak tak ang em?’ tiin. (w10-E 10/01)

[Phêk 8-naa thu lâk chhuah]

Engtik hunah leh khawi hmunah pawh kan ṭawngṭai thei