Isua Krista—A Thu Hrilin A Nghawng Dân Che

“Nun an neih nân, tam taka an neih nân, lo kal ka ni.” —JOHANA 10:10.

ISUA KRISTA khawvêla a lo kal chhan ber chu dawng tûr ni lovin, pe tûr zâwkin a ni. A rawngbâwlna hmangin, mihringte hnênah thilpêk hlu tak—Pathian chungchâng thudik leh A duh zâwngte târ langtu thu—chu a pe a ni. Isua thu hril chhâng lêttute chuan tûna Kristian maktaduai tam takin an neih nun ṭha zâwk chu tûnah ngei pawh hian an nei thei a ni.a Mahse, Isua thu hril zînga a pawimawh ber chu kan tâna a nun ṭha famkim a pêk chu a ni a, chu chu thilpêk azawnga hlu ber a ni. Kan chatuan ṭhatna tûr chu, he a thu hrila a pawimawh lai ber kan chhân lêt dânah hian a innghat a ni.

Pathian leh Krista thil min pêk chu Isua chuan a hmêlmate kutah râpthlâk takin a thi dâwn tih a hria a. (Matthaia 20:17-19) Chuti chung pawhin, Johana 3:16-ah chuan he a thu hriat hlawh tak: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tih hi kan hmu a ni. Isua chuan, ‘mi tam tak tlan nâna a nun pe tûra lo kal’ a nih thu a sawi bawk. (Matthaia 20:28) Engvângin nge a nun chu lâk tûr anga sawi lo va, pêk tûr anga a sawi zâwk?

Pathian chuan a hmangaihna nasa tak avângin mihringte chu an rochun sual leh chu sual rah chhuah—ṭhat famkim lohna leh thihna—ata chhan chhuah nân ruahmanna a siam a. Chu chu a Fapa mal neih chhun inthawi nâna thi tûra leia rawn tîrin a tipuitling a ni. Isua chuan chu ruahmanna chu inhuam takin a pawm a, a nun ṭha famkim chu kan tân a pe ta a ni. Tlanna tia hriat, chu ruahmanna chu mihringte hnêna Pathian thilpêk ropui ber a ni a.b Chatuan nunna min neihtîr thei thilpêk a ni.

I tih ngai chu Tlanna chu i tân liau liauva pêk a ni em? A nih leh nih loh chu nangmahah a innghat a ni. Entîr nân: Mi tuemawin thil pêk che tumin a rawn lek chhuak vâ mai a. Mahse, i ban a, i va lâk hma loh chuan i ta a la ni lo. Chutiang bawkin, Pathian Jehova chuan tlanna chu a pe che a; mahse, i ban a, i lâk chauh loh chuan i ta a ni thei lo. Chu chu engtin nge i ta a nih theih ang?

Isua chuan amah ‘ringtute’ chuan chatuana nunna an nei ang tih a sawi a. Rinnaah chuan i nun i hman dân zawng zawng a tel vek a ni. (Jakoba 2:26) Isua ring tih awmzia chu a thusawi leh thiltihte mila nun hi a ni. Chutianga ti tûr chuan, Isua leh a Pa i hriat chian hle a ngai a ni. Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi si a.—Johana 17:3.

Kum 2,000 vêl kalta khân, Isua Krista chuan khawvêl puma mi maktaduai tam takte nun thlâkthleng thei thu pakhat a lo sawi tawh a. Chu thu chu hriat belh a, nangmah leh i hmangaih takte’n tûn atân mai ni lo, chatuana in hlâwkpui theih dân chu hriat i duh em? Jehova Thuhretute chuan ṭanpui che an châk hle ang. (w10-E 04/01)

[Footnote-te]