Zirtirna Dik Lovin A Dik Lo Vek A Hring

“FIMKHUR rawh u,” tiin tirhkoh Paula chuan C.E. kum zabi khatna chawhnu lama Kristiante hnênah a ziak a. Eng chungchângah nge a vaukhân? Ani chuan: “Tupawhin . . . mihring thu rochhiah . . . an thu fing leh bumna mai maiin râl lâkin an la dah ang che u,” tia ziakin chûng lakah chuan a vaukhân a ni.—Kolossa 2:8.

Paula vaukhânna an dawng chung pawhin, C.E. kum zabi hnihna laihâwl vêl aṭang khân, Kristian ṭhenkhat chuan an thurin hrilhfiah nân hmân lai mi fingte ngaih dân chu an hmang ṭan a ni. Engvângin nge? Rom Lalram-a lehkha thiamte pawm nih leh mi tam lehzualte Kristiana inlehtîr an duh vâng a ni.

Chûng Kristiante zînga hmingthang ber pakhat, Justin Martyr-a chuan Pathian Tâna Thusawitu Isua chuan, Isua anga leia a lo kal hma kum tam takah khân Grik mi fingte hnênah a lo inhriattîr tawh niin a ring a. Justin-a leh a ngaih dân ang zirtîr vetu mi dangte sawi dân chuan, Kristiannaa khawvêl finna leh hmasâng thawnthute belh khâwmna chuan mi zawng zawngte tâna ṭha tûr sakhua a din chhuak a ni.

Justin Martyr-a Kristianna ang chi chu mite Kristiana inlehtîrna kawngah a hlawhtling hle a. Mahse, zirtîrna dik lo pakhat pawmnain a dang a hring zêl a, tûna Kristian thurin lâr tak lo ni tate hi a lo pian chhuah phah ta a ni. Chûng zirtîrnate dik lohzia laihlan nân, a hnuaia lehkhabute sawi dân leh Bible zirtîrna dik tak chu i lo khaikhin ang u. (w09-E 11/01)

[Phêk 3-naa Milem Hawhtîrtute]

Diabola: Barrators—Giampolo/The Doré Illustrations For Dante’s Divine Comedy/Dover Publications Inc.; vântirhkohte: Art Resource, NY; trinity lem: Museo Bardini, Florence