Pathian Hnaih Rawh
Pa Nei Lote Pa Chu
Exodus 22:22-24
“PATHIAN a awmna thianghlima awm chu pa nei lote pa . . . a ni.” (Sâm 68:5) He Pathian thâwk khum thu hian Jehova chungchâng rilru khawih tak thil min zirtîr a ni—Ani chuan mi chan haite a ngaihtuah tih chu. Fahrahte a ngaihtuahzia chu Israel mite hnêna a Dân pêkah a lang chiang hle a. Bible-in “fahrah” a sawina hmasa ber, Exodus 22:22-24 thu hi i lo bih chiang ang u.
Pathian thu chuan: “Fahrah . . . in tirethei tûr a ni lo,” tiin a vaukhân a. (Châng 22) Hei hi fahrahte ṭanpui tûra ngenna mai a ni lo va, Pathian thupêk a ni. Fahrah—humhimtu leh enkawltu nei lote—chu an derthâwng bîk a. Tumahin eng kawng mahni an “tirethei” tûr a ni lo. Bible lehlin dangah chuan, “tirethei” tih thu mal chu “tinawmnah,” tih te, “tiduhdah” tih te, leh “hlâwkna hmuh nâna hmang” ti tea lehlin a ni. Fahrahte dik lo taka cheibâwl chu Pathian mithmuhah a sual hle. Eng ang taka sual nge?
Dân thu chuan: “Anmahni chu in tihretheih vaih a, mi rawn auh phawt chuan, an mi auhna aw chu ka lo ngaithla ngei ang,” tiin a sawi belh a. (Châng 23) Atîra ziak Hebrai Bible-ah chuan châng 22-ah “in” tih thu mal a hman laiin châng 23-ah chuan “i” tih thu mal a hmang thung a. Chuvângin, he mi chungchânga Pathian thupêk hi mi mal leh hnam pum puiin inang renga an zawm tûr a ni tih a chiang a ni. Jehova chuan min en reng a; fahrahte au thâwm chu ngaithlain, anmahni ṭanpui tûrin a inpeih reng a ni.—Sâm 10:14; Thufingte 23:10, 11.
A nih leh, mi tuin emaw fahrah chu dik lo taka cheibâwlin, ani chuan Pathian au ta se engtin nge ni ang? Pathian Jehova chuan, “Ka thinur chu a ling phut mai ang a, khandaihin ka rawn tihlum ang,” a ti. (Châng 24) Bible hrilhfiahna pakhat chuan “he thu awmze dik tak hi ‘ka hnâr a ling phut mai ang’ tihna a ni a, thinur lutuk sawina a ni,” a ti. Jehova chuan fahrahte cheibâwl dân chungchânga dân siam chu Israel rama rorêltute kutah a dah lo tih chhinchhiah la. Amah Pathian ngei chuan, mahni hlâwkna hmuh nâna chhantu nei lo fahrahte chhâwrtu apiang chungah ro a rêl ang.—Deuteronomy 10:17, 18.
Pathian Jehova chu a danglam ngai lo va. (Malakia 3:6) Fahrahte chu a khawngaih reng a ni. (Jakoba 1:27) Naupang pawi sawi lote tihnawmnahna chuan pa nei lote Pa thinurna fel a chawktho tih hai hauh suh ang che. Chutianga titute chuan “LALPA thinrimna hlauhawm tak” chu an pumpelh tawp lo vang. (Zephania 2:2) “Pathian nung kuta tlûk chu thil râpthlâk tak a ni” tih an hre ngei dâwn a ni.—Hebrai 10:31. (w09 4/1)