“Ka Thih Hun A La Thleng Lo A Nih Ngei Dâwn Hi”

Bawlhhlawh phur truck lian tak khalhtu chuan a motor khalh chu a thunun zo lo va. Kawngsîra kal nupa tuak khat leh kum 23 mi tlangvâl pakhat chu a va su ta chiam mai a. New York Khawpuia chanchinbu pakhatin a sawi dân chuan nupate chu a hmunah an thi nghâl a, chu tlangvâl erawh chu nîkhaw hre lovin a awm a ni. A han harh chhuaha thil awm dân a han hmuh chuan, a rilrua lo lang hmasa ber chu: ‘Awih a va har tak êm! Aw Lalpa, min dam khawchhuahtîr ang che,’ tih a ni a. Tichuan, “Ka thih hun a la thleng lo a nih ngei dâwn hi,” a ti a ni.

CHUTIANG chi thilthleng dang i hriat ngei a rinawm a. Mite chuan tuemawin chhiatna râpthlâk tak a pumpelh chang chang hian, ‘A thih hun a la thleng lo a nih hi,’ an ti a; mahse, chêtsualna hotê avânga mi a thih hian, ‘A thih hun a thleng tawh a ni,’ tiin emaw, ‘Pathian remruat a ni,’ tiin emaw ngaih dân an siam ṭhîn. Thilthleng rah chhuah chu vânduai vâng emaw, vânneih vâng emaw, a nih loh leh Pathian vâng emawa ngaih pawh ni se, an chhût dân chu a inang tho tho. Mi tam takte chuan an nuna thilthlengte leh a rah chhuahte chu ruat lâwksa vek a ni a, chu mi thlâkthleng tûr chuan tih theih rêng nei lo niin an inhria a ni. Tin, chutianga chhân lêtna chu thihna emaw, chêtsualna emaw a thlen huna lo chhuak mai a ni lo va; tûn hnai maia lo chhuak lah a ni hek lo.

Entîr nân, hmân lai Babulon-ho chuan mihringte awm dân tûr chu arsite leh a chêt sawn dânin a thunun niin an hria a. Chuvângin, anmahni kaihruaitu atân vânah chhinchhiahna leh ai enna tûr an zawng a ni. Grik leh Rom mite chuan an nakin huna a chhia leh a ṭha rêl tûra thiltih theihna nei, ruat lâwktu pathiannute an bia a; chûngte thiltihtheihna chuan an pathiante zînga pawimawh ber, Zeus leh Jupita-te duhzâwng pawh hliah khuh theih châng a nei hial a ni.

Khawchhak ramahte chuan, Hindu leh Buddhist-te chuan miin tûna a thiltawn chu a nun hmasaa a thiltih rah chhuah a ni a, tûn nuna a thiltih chuan nakin nuna a thiltawn tûr chu a rêl tih an ring a. Kristianna rama kohhran tam tak pawh tiamin, sakhaw dangte pawhin chutianga thilthleng rêng rêng khuanu rêl anga ngaihna, ruat lâwkna thurin chu a pawm ve bawk a ni.

Chuvângin, kan tûn lai hun changkâng tawh takah pawh hian, mi tam takin nuna an dinhmun te, an nî tin nuna thilthleng te, leh a tâwpa an chunga thilthleng tûrte chu ruat lâwk vek a ni a, thlâkthleng tûrin tihtheih an nei mang meuh lo tih ngaih dân an nei pawh hi a mak hran lo. Chu chu nunna chungchânga i ngaih dân a ni ve em? Nuna thilthlengte, hlawhtlinna leh hlawhchhamna te—pian leh thihte thleng pawh—hi ruat lâwk vek a ni tak zet em? I nun hi ruat lâwknain a thunun em? Hêng zawhnate chhâng tûra Bible-in min ṭanpui theih dân i lo en ang u. (w09 3/1)

[Phêk 3-naa Milem Hawhtîrtu]

Ken Murray/New York Daily News