Nova leh Tuilêt Chanchin—Phuahchawp Ni Lo, Thu Dik Tak Chu

KHAWVEL ṭha zâwk​—mi tin inrem taka an awmna, indo te, dân bawhchhiatna te, leh inawp behna te awm lohna khawvêla awm chu i duh em? I duh a nih chuan, i hriat chian rinawm tak hmân lai thilthleng chanchin pakhat aṭangin thlamuanna i hmu thei ang. Chu chu mi suaksualte an boralna khawvêl pum huap tuilêta amah leh a chhûngte chhandam nâna lawng tuktu mi ṭha tak Nova chanchin a ni.

Tuilêt chanchin aia hriat lâr zâwk thawnthu dang a awm mang meuh lo va. Nova thiltawn chu Bible-a Genesis bung 6 aṭanga bung 9-ah hmuh theihin a awm a, chu chu Koran pawhin a sawi chhâwng a ni. Tin, leilung hmun tina mite thawnthu tam takah pawh hmuh theihin a awm bawk. Tuilêt chu thilthleng tak tak nge ni a, mite’n thil dik an tihna tûra fuihna thawnthu mai zâwk? Pathian thu zir mite leh scientist-te chuan he zawhna hi kum zabi têl an lo chai tawh a. Mahse, Pathian Thu, Bible chuan rinhlelh chhan tûr a pe rêng rêng lo​—tuilêt chu phuahchawp ni lovin, thil awm tak tak a ni. Hêng hi han ngaihtuah teh:

Genesis thuziak chuan Tuilêt a thlen ṭan nî, thla, leh a kum te bâkah, lawng a chawlhna hmun leh a hunte, leh lei a ro hunte nên lam a târ lang a ni. Lawng chanchin kimchang tak​—a pian hmang, a lenzâwng, leh a sakna atâna an thil hmante thlengin a nihna chiah chiaha târ lan a ni bawk. Thawnthu phuahchawpahte chuan chutianga kimchang tak leh a chiah chiaha târ lanna a awm ṭhîn lo.

Bible-a thlahtute chhuina inziak pahnihte chuan Nova chu mi awm tak tak a nihzia a finfiah a ni. (1 Chronicles 1:4; Luka 3:36) Hêng thlahtute chhuina ziaktu Ezra leh Luka te chu chîk taka thil chhui mi an ni a. Luka’n Isua pian leh mûrna a chhuinaah Nova hming a telh a ni.

Zâwlnei Isaia leh Ezekiela te leh Kristian tirhkoh Paula leh Petera te chuan Nova chanchin emaw, Tuilêt chanchin emaw chu an sawi a ni.​—Isaia 54:9; Ezekiela 14:​14, 20; Hebrai 11:7; 1 Petera 3:​19, 20; 2 Petera 2:5.

Isua Krista chuan Tuilêt chanchin sawiin: “Nova dam laia thil awmzia ang khân, Mihring Fapa a lo kal leh nîte chuan a awm bawk ang. Nova lawnga a luh a, tui a lo lêt a, an zaa a tihhlum tâk vek ni kha a thlen hma loh zawng, an eiin an bâr a, nupui pasal an innei ṭhîn a,” a ti. (Luka 17:​26, 27) Tuilêt chu thilthleng tak tak ni lo sela chuan, Isua’n “Mihring Fapa a lo kal leh nîte” chungchâng a sawi chuan awmzia a nei lo vang.

Tirhkoh Petera chuan Bible thusawi ngaihthaha “nuihsantute” an lo awm tûr thu a sawi lâwk a. Ani chuan: “Anmahni châkna anga awmin . . . hêng hi an haider lui si ṭhîn; . . . [Nova dam laia] khawvêl awm chu tuiin a chîm a, a boral ta,” tiin a ziak a ni. “Hêng hi” kan haider tûr a ni em? A ni lo rêng rêng! Petera chuan: “Vânte leh lei awmte hi . . . Pathian ngaihsak lo mite rorêl leh boral nî atâna dahin hâl tûra khêk a ni,” tiin a ziak belh a ni.​—2 Petera 3:​3-7.

Pathianin mi suaksualte a tiboral leh ang a, chutah chuan dam khawchhuak an awm leh bawk ang. Nova entîrna siam kan zui chuan, khawvêl ṭha zâwka chhan chhuah mi felte zîngah kan tel thei ang. (w08 6/1)