I Rinna Sawi Chhuah Theihna Hun Remchâng Chu I Zawng Em?
“THUTAK tia sawi fak tûr a awm em?” Chu chu Poland ram puma thuziak intihsiakna atâna ziah tûr thupui a ni a. Chu thuziak ziah dân tûr kaihhruaina chuan: “Thutak tia sawi fak tûr kan neih a ngai lo. Chu chu tuman an mamawh lo. Thutak tia sawi fak tûr a awm si lo va,” a ti. Kum 15 mi high school naupang leh Jehova Thuhretu ni bawk Agata-i chuan, chu hun remchâng chu mi dangte hnêna a rinna sawi chhuah nân hman a tum ta a ni.
Thuziak atâna inpuahchah nân, Agata-i chuan Jehova kaihhruaina a dîl phawt a; tichuan, a thute chu a lakhâwm ṭan a. Chu mi nêna inkûngkaih thute chu Vênnainsâng July 1, 1995-ah a zawng hmu a ni. Ani chuan Isua hnêna Pontia Pilata zawhna: “Thutak engnge ni?” tih chu a la chhuak a. (Joh. 18:38) Chu zawhnaah chuan deusawhna rilru put hmang a lang tih sawiin, chu zawhna chu: ‘Thutak a? Chu chu eng nge ni? Chutiang a awm lo!’ tihna ang a ni a ti. “Pilata zawhna chuan thuziak atâna kaihhruaina chu min hriat chhuahtîr a ni,” tiin Agata-i chuan a ziak a ni.
A dawtah, dinhmun azirin thutak a danglam thei—mi pakhat tâna thutak chu mi dang tâna thutak a ni lo thei a, an pahnih chuan an “dik” ve ve thei—tih ngaih dân lo pian chhuah dân chu a ziak a ni. Ani chuan hêng zawhnate hi a zâwt a, “Kan zînga tuin nge boruaka thil kal dân (the laws of aerodynamics) hi thutak awm ngei a ni tih ring si lovin, thlawhna chuang ngam ang?” tiin. Tichuan, ani chuan Bible lamah khalh lûtin: “Pathian Thua innghahna chuan finfiah theih thilte a ṭanchhan tlat a ni,” tiin a sawi a. Ani chuan thutak zawng tak taktute chuan zawng hmu tûrin dawhtheihna an neih a beisei thu a sawi tel bawk a ni.
Agata-i chuan special diploma a dawng a, class pum pui hmaa thusawi theihna hun pêk a ni bawk a. A school kalpui tam tak chuan Bible zirpui tûra a sâwmna chu an pawm bawk a ni. Agata-i chu mi dang tam takte hnêna a rinna hrilh tûra he hun remchâng a hman theih avângin a lâwm hle a. Ni e, i rinna sawi chhuak tûra hun remchâng zawnna chuan rah ṭha a chhuah thei a ni. Eng ang hun remchângte nge i hman zawn theih? (w07 11/1)