Adryana-i Duhthusâm

TULSA, Oklahoma, U.S.A.-a awm kum ruk mi hmeichhe naupang Adryana-i chuan duhthusâm a nei a. Chu chu: “LALPA hnênah thil pakhat ka dîl a, chu mawlh chu ka zawng ang; LALPA mawizia hmu tûr leh, a biak ina thu zâwt tûrin ka dam chhûng zawnga LALPA ina ka awm reng theihna tûr chu,” tia satu fakna hla phuahtu Davida duhthusâm nên khaikhin theih a ni.​—Sâm 27:4.

Adryana-i chu thla ruk mi chauh a nihin, hriatna tha zâma thil chawr (neuroblastoma), cancer chi khatin a tlâk buak a. Chu natna hlauhawm tak chuan a ke khing hnihin a tizeng ta tlat mai a ni. Doctor-te’n vawi tam tak an zai a, kum khat chhûng teh meuh chu cancer enkawlna (chemotherapy) hmanga enkawl a ni bawk a ni.

Adryana-i pa chuan Adryana-i leh a nu sakhaw vawn ang a vuan ve lo va; ani chuan, nunna atâna hlauhawm natna vei naupangte duhthusâm tihpuitlinsak tum pâwl pakhat nêna inbe pawpin a fanuin khawvêla hming thang intihhlimna park a tlawh ve theih nân a dîl a. Dîlna chu phalsak a nih hmain, chu pâwl chuan Adryana-i chu kawmna an nei a. Ani chuan an ngaihtuah avânga a lâwm thu sawiin, Bethel tlawh a duh zâwk thu chu a hrilh a, chu hmun chu New York-a khawvêl pum huapa Jehova Thuhretute rawngbâwlna hmunpui a ni. A pa dîlna a hriat hnu chuan, Adryana-i chuan Jehova hnênah Bethel tlawh theihna hun remchâng pe tûrin a ṭawngṭai a. Chu pâwl chuan naupang tâna sakhuana hmun tlawh chu a phûrawm lo vang an ti zet nâin, a pain Adryana-i duh thlanna a kalh loh avângin a phalsak ta a ni.

Adryana-i chuan a nu, a unaunu, leh a ṭhiannu te rual chuan a vawikhatna atâna Bethel tlawh tûrin New York chu a pan ta a. Adryana-i chuan: “Jehova’n ka ṭawngṭaina min chhâng a. Bethel-ah min lo lâwm ang tih ka hria. Lehkhabute, magazine-te, leh Bible-te siam a nih dân chu ka hmu a. Intihhlimna park ai chuan a ṭha zâwk fê a ni,” a ti.

Adryana-i chuan ‘Jehova mawizia chu a hmu’ ngei a, tûn laia Jehova mite rawngbâwlna hmunpuia hna thawh dân chu hlut takin a thlîr a ni. Nang ngei pawh hi Bethel tlawh ve tûra sâwm i ni a. New York-a Jehova Thuhretute khawvêl hmunpui bâkah, khawvêl hmun danga branch office-te chu tlawh tûra sâwm i ni bawk. (w07 4/15)