Tûn Laia Nunrâwnna Khawvêl
MARÍA-i chu kum 64 mi mahnia khawsa a ni a. A awmna inah thia chhar a ni a, vuak hrep leh thîrzaia reh hlum a ni.
Mipui thinurin police pathum chu naupang pahnih ru bova puhin an sawisa a. Mipui chuan police pahnih chu petrol-a leihin, an hâl hlum a. Police pakhat chu a tlân chhuak thei hrâm a ni.
Tu tih hriat lohvin phone-a a rawn biakna aṭangin thil râpthlâk tak hmuh chhuah a ni. Chawlh hmanga zin mipa palite ruang chu huan pakhat aṭanga laih chhuah a ni a. An mitte chu tuamsak leh an kutte pawh phuarsak an ni bawk. Mitthi ruang zaia enfiahna chuan a nung chunga phûm an ni tih a târ lang.
Hêng nunrâwnna râpthlâk takte hi mi tithlabâr thei tûra râwng taka siam tharum thawhna cinema ami mai a ni lo. Hêng thilthlengte hi tûn hnai maia Latin-America ram chanchinbu thupuia tihchhuah thilthleng dik tak a ni. Mahse, chu ram chu tûn lai khawvêla nunrâwnna râpthlâk tak a thlenna ram awmchhun a ni lo.
Nî tinin nunrâwnna thiltihte chu a thleng zêl a. Bomb puak te, fîrfiaka chêt te, tualthah te, inbeih te, silaia inkah te, leh pawngsual te chu nunrâwnna thiltihte zînga tlêm tê chauh a ni. Chanchin theh darhtute chuan nunrâwnna chanchin râpthlâk takte chu vawi tam tak an tichhuak a, chûng nunrâwnnate chanchin hmuh leh hriat chuan mi tam takte thin pawh a ṭhawng tawh lo.
Nang chuan: ‘Tûn lai khawvêl hi enga ti ta nge? Mi dangte ngaihtuahna leh nunna zahnate chu a bo zo ta em ni?’ tiin i ngaihtuah ngei ang. Engvângin nge hetiang khawvêla kan awm a ngaih?
Tûnah chuan cancer vei kum 69 mi Harry-a hi han ngaihtuah teh. A nupui chuan multiple sclerosis an tih thazâm natna khirh tak a vei bawk a; mahse, a ṭhenawmte leh ṭhiante chuan inhuam takin an ṭanpui a ni. Harry-a chuan: “Hêng mite zawng zawng hian min ṭanpui lo se chuan eng nge kan tih ang tih pawh ka hre pha lo,” a ti. A awmna ram Canada-ah chuan, tar enkawltu zaa 50 aia tam chuan anmahni chhûngkhat ni lote chu an ṭanpui a. Mi narânte hian ngilneihna leh ṭhenawm ṭha nihna chu an lantîr fo tih i hre ngei ang. Ni e, mihringte hian nunrâwnna aiin khawngaihna leh ngilneihna an lantîr theih a beisei awm a ni.
A nih chuan, engvângin nge nunrâwnna râpthlâk tak a awm? Engin nge mite chu nunrâwng tak nihtîr? Mi dangte chunga nunrâwngte chu an inthlâk thleng thei ang em? Nunrâwnna hi a tâwp ngai ang em? A tâwp ngai dâwn a nih chuan, engtin leh engtikah nge a tâwp ang? (w07 4/15)
[Phêk 3-naa Milem Hawhtîrtu]
Rêl: CORDON PRESS