“Kum Kaw Mi Mipa Naupang Pakhat Vâng”

POLAND ram chhim lama chêng Wiesława-i chuan Jehova Thuhretute’n an va tlawh apiangin, hawihhâwm takin a lo hnâr ṭhîn a. Ni khat chu kum kaw mi Samuel-a chuan a nu nên an va tlawh a ni. Tûn ṭumah hi chuan Wiesława-i chuan an thuchah ken lo ngaihthlâksakin, lei paradis chungchâng magazine chu a lo la a ni.

Isua Krista thih Hriatrengna a hnaih tawh avângin, Samuel-a chuan chu hun pawimawh taka Wiesława-i sâwm chu a duh a. Chuvângin, mipa naupang chuan a nu nên sâwmna lehkha kengin an va tlawh leh a ni. Mipa naupang ṭha taka inchei a hmuh chuan, Wiesława-i chuan lo nghâk hrih lawk tûra hrilhin thawmhnaw inchawih lehzual a va ha a. Kawngkâa a lo kîr leh chuan Samuel-a thusawi chu a ngaithla a, sâwmna chu pawmin: “Keimahin nge ka lo kal ang a, ka pasal nên?” tiin a zâwt a. Tichuan: “Ka pasal a lo kal loh pawhin, ka lo kal ang. Samuel, i tân liau liau ka rawn kal ang,” tiin a sawi belh a. A thutiam a hlen avângin Samuel-a chu a lâwm hle a ni.

Hriatrengna thusawi chhûng zawng chuan, Samuel-a chu Wiesława-i bula ṭhuin, Bible châng sawiho laite chu a kawhhmuh a. Chu chuan a rilru a khawi hle. Hriatrengna inkhâwmna tel chu nuam a tiin, thuril tak takte chu hriatthiam awl taka hrilhfiah a nih avângin a lâwm hle a. Kohhranin phûr taka a lo lawmna leh ngilneihna a lantîrna chuan a rilru a khawih bawk a ni. Chuta ṭang chuan, Wiesława-i chuan thlarau lam thil chu a ngaihsak tial tial a, Jehova Thuhretute chu a kâwm ta ziah a. Ani chuan tûn hnai mai khân: “Tûn hma in lo kal ṭhin laia ka lo ngaithla lo che u kha zahthlâk ka ti hle mai. In thuchah ka ngaihthlâk chhan chu kum kaw mi mipa naupang pakhat vâng, Samuel-a vâng chauh a ni,” tiin a sawi a ni.

Poland rama Samuel-a angin, Jehova thuhretu naupang tam takte chuan Pathian chu an ṭawngkam chhuak te, an nungchang ṭha te, leh hawihhâwmna te hmangin an fak a ni. Naupang i nih chuan, mi rilru ṭhate chu thlarau lam thil ngaihsak tûrin i ṭanpui ve thei a ni. (w06 9/1)