Tar Kûn Chunga Inkulh Hrang Lo

TARNA avângin mi tam tak chu engmah ti hleithei lova awmin, an inkulh hrang a. Mahse, Switzerland ram Geneva khawpuia chêng kum 95 mi nia thi ta Fernand Rivarol-a erawh a inkulh hrang ve lo. A nupui a thiha a fanuin pasal neia a in dansan avângin, amah chauhvin a khawsa a. A inah hian inkhâr khîp deuh reng mah se, a khua a har lo. Inlêng kawmna pindana dawhkân pakhat bulah ṭhuin, telephone hmangin mite chu thlarau lam thila inbiakna a neihpui ṭhîn a ni.

A chak ṭhat lai chuan, inkulh hran tak tak hun a nei a. Engvângin nge a inkulh hran? Fernand-a leh a nupui chu kum 1939-a Jehova Thuhretu phusa tak an lo nih ṭan phat aṭangin, Europe khawmualah Khawvêl Indopui II-na a inṭan a. Fernand-a chuan tumah tina lo tûra a Bible ṭanchhan thu tlûkna chu a vuan tlat a ni. Chu mi avâng chuan, a hnathawh lai a chân a, lung inte pawh a belh khâwmin kum nga leh a chanve lai a tâng a, chutih chhûng chuan a nupui leh a fanu nên an awm hran a ngai a ni.

Fernand-a chuan hun kal tawh thlîr lêtin: “Mi tam tak tân chuan ka hna nghet bânsan a, ka chhûngkua chu ṭanpuitu nei lovah ka dah niin a lang. Mite chuan min hmusitin, thil sual titu angin min cheibâwl a. Nimahsela, chûng hun khirh takte ka’n thlîr lêt hian, thil dang zawng aiin Jehova min ṭanpui dân hi ka hre chhuak a. Kum tam tak liam tawh mah sela, Jehova ka rinchhanna chu chutih hun laia mi ang bawkin a la nghet reng a ni,” tiin a sawi.

He rinna hian Fernand-a chu telephone hmanga Bible ṭanchhan a beiseina mite hrilh hre tûrin a tur a. Mi tuemawin ṭha taka a chhân lêt hunah Bible thu leh hla chhuahte a thawn ṭhîn a. A hnuah chuan, lehkhabu a chhiar tui leh tui loh hriat nân a be nawn leh ṭhîn a ni. A châng chuan mite’n lehkha thawnin lâwmthu an hrilh a, chu chuan a tilâwm hle a ni.

Fernand-a ang mi tuemaw chuan a be pawp mai thei che a. A rinna i hriat theih nân engah nge a thusawi chu i lo ngaihthlâksak loh vang? An rinna mi dangte hnêna hrilh hriat chu Jehova Thuhretute nuam tihzâwng tak a ni. (w06 8/15)