“Vawiin Aṭang Hian, Pathian A Awm Tih Ka Ring Ta”

CZECH Republic ram, Prague khawpuia awm Ukrain mi Alexandra-i chu a hnathawhna hmun aṭanga in lam panin a haw a. A haw kawng khawlai rêl dinna hmunah chuan, mi kal vêlin an chhuih kual hrep tawh hnu Bible tuamna ang taka lang bâwm chu a hmu a. A han chhara a chhûng a han en chuan, a thil hmuh chu rin harsa a ti ngei mai. An ram pawisa koruna 5,000 note hlîr intêlkhâwm chu lo niin! A bul hnaia awm tumahin chu bâwm chu an zawng hmêl bawk si lo. Czech Republic rama chêng ram dang mi Alexandra-i tân chuan khawsak a harsa hle mai bawk si nên. Eng nge a tih tâk ang?

In a han thlen chuan, Alexandra-i chuan chu bâwm chu a fanu Victoria-i a hmuh a. Bâwm chhûngah chuan a neitu hming leh address a awm tâk hlauh dahin tiin an zawng a, mahse an hmu zo lo. Nimahsela, bâwm chhûngah chuan number inziak chuanna lehkha them a awm a. Chutah chuan bank-a pawisa dahna account number a chuang a, a phêk leh lamah chuan number tam zâwk a chuang bawk. Tin, bâwmah chuan tualchhûng bank hming leh “koruny 330,000” (U.S. $10,000, vêl) tih inziak pawh a awm tel bawk. Chuti zât chiah chu a ni, bâwm chhûnga pawisa awm zât chu.

Alexandra-i’n phone number ni âwm tak an hmuh hmanga tualchhûng bank phone a tumna chu a hlawhchham a. Chuvângin a fanu nên chuan bank-a va kalin thil awm dân chu an va hrilhfiah a. Bâwm chhûnga an hmuh account number chungchâng chu an zâwt a. Mahse, chu bank chuan chu mi number mil a lo nei hauh lo. A tûkah chuan Alexandra-i chuan bâwma an hmuh number dang kengin a va tlawh leh a. Bank chuan chu account number hmanga pawisa dahtu nu pakhat a lo nei ngei mai a. Alexandra-i leh Victoria-i te chuan chu nu chu an be pawp a, ani chuan pawisa chu a hloh ngei thu a lo hrilh a ni. A tâwpa an inhmuhkhâwm hnuah chuan, chu nu chuan an chungah lâwm thu hrilh mawlh mawlhin, “Pawisa min pêkkîr avângin eng lâwmman nge in duh?” tiin a zâwt a ni.

Victoria-i chuan: “Lâwmman a ngai lo. Duh ilang chuan kan nei vek thei alâwm,” tiin a chhâng a. Tichuan, Czech ṭawng a thiam ang tâwkin: “Pawisa kan pêkkîr chhan che chu Jehova Thuhretute kan nih vâng a ni a. Kan Bible zirtîr chhia leh ṭha hriatna chuan mahni thil ni lo kawl hi a phal lo a ni,” tiin a hrilhfiah luam a. (Hebrai 13:18) A neitunu chuan lâwm takin, “Vawiin aṭang hian, Pathian a awm tih ka ring ta,” a ti ta hial a ni. (w06 7/15)