Inthlâkthlengna Thlentu Intlawhna

“PATHIAN rawn tirh ‘vântirhkoh’ pahnihte chanchin chu ka chhûngte hrilh hlân ka nghâkhlel hle a,” tiin pa pakhat chuan Jehova Thuhretu hmeichhe tleirâwl pahnihte va tlawh chungchâng chu a ziak a. An va tlawh hma deuh lawk chawlhkârah chuan a nupui kum 45 mi a lo chân chu niin. Chu chuan a nun a tichau hle a. A fa puitling tawhte chuan hnem zawng an hnêm ṭhîn tak naa, an awmna a hla hle mai si. Ṭhian leh ṭhenawm tlawhtu a nei hlawl si lo.

Chu pa chuan Pathian hnêna a ṭawngṭai ngai meuh tawh loh thu hmeichhe tleirâwlte hnênah chuan a lo hrilh a. Nimahsela, anni chuan lainatna lantîrin Bible ṭanchhan lehkha sem chi Hmangaih Thi Tawhte Tân Eng Beiseina Nge Awm? tih chu an hnutchhiah a. Chu mi tlaia a han chhiar chuan a rilru a zâng huai a ni.

Tleirâwl pahnihte chuan reirial lovin an va tlawh leh a. An tlawh hmasak ṭuma a tawrh nasatzia chu hriain, eng nge a an tâk zêl tih hre tûrin an va tlawh leh a ni. A hnuah, chu pa chuan: “Hmêlhriat hauh loh mi pahnihin min ngaihsakin, ka awm dân an ngaihven viau mai hi mak ka ti kher mai,” tiin a ziak a ni. Bible aṭanga thu an sawipuite chuan ani chu a tichak hle a. Tleirâwlte chuan an tlawh leh tûr thu an hrilh a ni. Chu pa chu a lâwm hle a, a chunga kan sawi tâk lehkha chu ziakin tualchhûnga Jehova Thuhretute Kingdom Hall-ah a thawn ta hial a ni.

A fate zînga pakhat awmna hmun hnaih deuh zâwka a insawn hmain, Jehova Thuhretute inkhâwmnaah vawikhat a inkhâwm a, tleirâwl pakhat zâwk inah chuan chaw a ei bawk a ni. “He lai hmun hi ka kalsan dâwn a, mahse chûng tleirâwlte leh in kohhran chuan ka thinlungah leh ka ṭawngṭainaah hmun an luah reng dâwn. Tûnah chuan ka ṭawngṭai ngun tawh hle a. Ka nun a inthlâkthleng thawk a ni. Chu inthlâkthlengnaah chuan tleirâwl pahnihte chuan hmun pawimawh tak an luah a, an chungah ka lâwm kumkhua ang,” tiin a ziak a ni. (w06 7/1)