Naupang Thinlung Hmin Rawh

NAUPANGIN indo lem changa a infiam lai i hmuh avângin i lungngai tawh ngai em? Tharum thawhnain intihhlimna khawvêl a luhchilh chinah chuan, chûng thilte chu naupangte zîngah tak ngial pawh a hluar ta hle a. Engtin nge naupang chu indona lam aia inremna lam infiamna duh zâwk tûrin i ṭanpui ang? Jehova Thuhretu Africa rama rei tak chhûng missionary thawk Waltraud-i chuan, chutiang ti tûra mipa naupang pakhat ṭanpui dân kawng chu a hmu chhuak a ni.

Indona avângin Waltraud-i chuan a chênna ram chu chhuahsanin, Africa khawmual ram danga a pêm a ngai a. Chutah chuan mipa naupang kum nga mi nei nu pakhat chu Bible a zirpui a. Chu nu a tlawh apiang chuan, mipa naupang tê chuan infiamna a neih chhun plastic silai lem tê chu hmangin a lo infiam ṭhîn a ni. Waltraud-i chuan chu mipa naupang têin thil engemaw kah fuh tuma a tin lai chu a hmu ngai hran lo va; mahse, silai mu thun ang maiin silai chu hawng a, a khar leh ṭhin lai chu a hmu zîng hle thung.

Waltraud-i chuan mipa naupang hnênah chuan: “Werner, in rama ka lo awm chhan hi i hria em? Indona vâng a ni a​—i silai ang silai hmanga mite kâp ṭhîn mi sual hlauhawm tak takte laka ka him nân ka awmna ram ngei chu ka chhuahsan a ngai a ni. Chutianga inkahna chu a ṭhain i ring em?” tiin a zâwt a.

“Aih, a ṭha lo,” tiin Werner-a chuan lungngai takin a chhâng a.

Waltraud-i chuan: “I tidik hle a ni,” a ti a. Tichuan: “Nangmah leh i nu chawlhkâr tin ka rawn tlawh chhan che u hi i hria em? A chhan chu Jehova Thuhretute chuan mi dangte chu Pathian leh an ṭhenawmte nêna inrem taka awm tûra ṭanpui an duh vâng a ni,” tiin a hrilh a ni. Werner-a nu phalnain, Waltraud-i chuan: “I silai kha min pêk chuan, ka paih bo daih ang a, ke pali nei truck lem i nei ang tih ka tiam a che,” tiin a hrilh a.

Werner-a chuan a silai lem chu a pe a. Chawlhkâr li lai a nghah a ngai a; mahse, a infiamna thar chu a lo thleng ta​—thinga siam truck lem chu nui var var chungin a dawng ta a ni.

Indona hmanrua anga siam infiamnate paih bo tûra i fate thinlung hmin tûrin anmahni biak nân hun i hmang em? Chutianga i tih chuan, an dam chhûnga an hlâwkpui tûr thil i zirtîr a ni ang. (w06 5/1)