Bengngawngte Hnênah Chanchin Ṭha An Hril

“THLARAU lam thil an rawn ken che u!” Hei hi Spain ram Madrid khawpui, Navalcarnero hmuna tar enkawlna in hotu berin Jehova Thuhretute’n an va tlawh chungchâng a sawi dân a ni. Engin nge chutianga sawi tûra chêttîr le?

Chu tar enkawlna Rosas del Camino-a chêng tam tak chu an beng a ngawng a. Amaherawhchu, Thuhretute’n Spanish Sign Language an zir thiam avângin, chuta chêngte chu a bepawp thei a ni. Chuta hotu ber chuan Thuhretute’n a mamawhte hnêna Bible thute zirtîr tûra a thlâwna an hun an pêk avângin a fak a. Chuta awmte lakah Lalram chanchin ṭha zirtîrnain nghawng ṭha a neihte chu a hmu bawk. Chuta chêng​—a bîk takin, bengngawngte leh mitdelte—​pawh chuan Thuhretute va tlawhna chu an hlut hle a ni.

Chuta awm zînga pakhat, mitdel leh ṭawng thei lo, Eulogio-a chuan Jehova Thuhretute nên Bible a zir mêk a. Ni khat chu zirna an neih laiin, pa upa tawh lam pakhat chuan Thuhretu chu va panin, chuta chêngte’n an lâwmna târ lan nâna an phuah hla thu chu a pe a ni. Chu hla thupui chu “Thuhretu Ni Tûr Chuan,” tih a ni a. A thu ṭhenkhatah chuan: “Nun lungawithlâk leh ṭha taka vawn fel an nei, Jehova hnên aṭangin finna hlimawm tak an nei bawk. Jehova an rin avângin, inte an tlawh nawn fo ṭhîn,” tih thute a tel a ni.

Chu Jehova an rinna avâng chuan khawvêl puma Thuhretu tam takte chuan bengngawngte tân an ram sign language an zir phah a. Hetiang kawng hian, bengngawngte hnênah Bible-a awm beiseina phûrawm tak chu an hril a ni. (w05 11/1)