Zirtîrna Dik​—Khawiah Nge I Hmuh Theih Ang?

TIBET rama mi pakhat chuan ṭawngṭaina thuziak chuanna khuang pianhmang ang nei a laia hawlh tlang kuta ken theih chu a tuaivir a. Ani chuan a tuaivir apiangin a ṭawngṭaina chu a inchhamnawn zêl niin a ring a. India rama in zauvahte chuan puja​—rim tui hâl chi, pangpâr te, leh pathiante leh pathiannute lim chi hrang hrang nêna pathian biak—nân pindan tê pakhat chu dah hran a ni. Mêl sâng tam taka hla Italy ramah chuan, nu pakhat chuan biak in ropui takah chuan Isua nu, Mari lim hmaah ṭhingṭhiin, ṭawngṭainaa hman ṭhi hûm chungin a ṭawngṭai a ni.

Sakhuain mihringte nun a thununzia chu nangmah ngeiin i hmu tawh mai thei. “Sakhuana . . . hian khawvêl hmun tina mite nunah hmun pawimawh tak a chang zêl a ni,” tiin The World’s Religions​—Understanding the Living Faiths tih lehkhabu chuan a sawi. God​—A Brief History tih lehkhabu ziaktu John Bowker-a chuan: “Pathian tel lohna khawtlâng a awm ngai lo, a tlângpui thuin ani chu lei leh vân thununtu leh Siamtu anga ngaih a ni a. Pathian awm ring lo khawtlângah pawh chutiang chu thil awm dân a ni,” tiin a ziak a ni.

Dik takin, sakhuana chuan mi maktaduai têlte nun chu a khawih a. Hei hian mihringin thlarau lam mamawh leh chu mamawh phuhrûk châkna a nei tih a tichiang lâwm ni? Rilru lam zirna lama mi hmingthang tak, Dr. Carl G. Jung-a chuan The Undiscovered Self tih a lehkhabuah mihringin thiltithei zâwk biak a ṭûl tih târ langin, “chu thil lang chhuak chu mihring chanchin zawng zawngah chhui chhuah theih a ni,” tiin a sawi.

Mahse, mi tam takte chu Pathian ringin an inchhâl lo va, sakhua ngaihsakna engmah an nei hek lo. Pathian a awm tih hnâwltute chuan a tlângpui thuin, an hriat chian sakhuate’n an thlarau lam mamawh a phuhrûksak loh vânga ti an ni deuh ber a. Sakhuana chu “thu bul ṭhenkhat vawnna; rinawm nghehna emaw, rinawmna emaw; ṭhahnemngaihna; puithu taka hmangaihna emaw, inzawmna emaw” tia hrilhfiah a ni. He hrilhfiahna aṭang hian, mi tin deuh thaw chuan an nunah sakhua lama inpêkna engemaw tak an lantîr a. Chutah chuan Pathian awm ring lotute pawh an tel hial a ni.

Kum sâng têl chhûnga mihring chanchin hian, mihringin a thlarau lam mamawh phuhrûk a tumna lamah Pathian biak dân kawng tam tak a pian chhuahtîr a. A rah chhuah chu, khawvêl puma hmuh theih sakhua thlîr dân dik lo chi hrang tam tak awmte hi a ni. Entîr nân, sakhua zawng zawng deuh thaw hian mihring aia thiltithei zâwk leh chungnung zâwk a awm ring mah se, chu chu tunge a nih emaw, eng nge a nih emawah ngaih dân chi hrang hrang an nei a ni. Rinna a tam zâwk chuan chhandamna emaw, chhanchhuahna emaw chu a sawi pawimawh hle bawk. Mahse, chhandamna nihna leh hmuh theih dân tûrah hian an zirtîrna chu a inang lo thluah a ni. Chutiang rinna tam tak awm zîngah chuan, Pathian tilâwm zirtîrna dik chu engtin nge kan hriat theih ang? (w05 7/15)