“A Rinna Avânga Tihduhdah”

ITALY hmar lam, Cernobbio khua tualchhûnga vântlâng lênvahna huanah chuan, mihringte chanpual dik tak (human rights) bawhchhiatsakna tuartute hriatrengna hmun siam a ni a. Chûng an hriatrengna mual lung siam zînga pakhat chu Narciso Riet-a tân a ni. Ani chu Germany ramah Italy nu leh pa kâra lo piangin, kum 1930 chho bâwr vêl khân Jehova Thuhretute zînga mi a lo ni a. Hitler-a lal lai chuan, Jehova Thuhretute’n Hitler-a chu Pathian dik, Jehova aia sânga an dah duh loh avângin tihduhdahna an tuar a ni.

Gestapo sipaite’n concentration camp chhûnga Vênnainsâng lâk luhnaah a inhnamhnawih tih an hmuhchhuah chuan, Riet-a chu Cernobbio-ah a tlân chhia a. Chutah chuan Vênnainsâng chu Italy ṭawnga letling a, a bul hnaia rinpuite hnêna sem kual tûra tih a ni. Taima taka a thiltihte chu hmuh chhuah a ni a. German sipai chhuan vâwr SS officer leh a ṭhuihhruaite chuan Riet-a chênna in chu luhchilh thutin, amah leh “thil sualtitu” tih finfiahna​—Bible pahnih leh lehkha thawn ṭhenkhatte chu an man a ni! Riet-a chu Germany-ah an thawn a; Dachau concentration camp-ah tântîr a ni a, Khawvêl Indopui II-na tâwp hma lawk khân tihhlum a ni ta a ni. Cernobbio khua mual lung chuan, “A rinna avânga tihduhdah a ni,” a ti.

Narisco Riet-a leh Thuhretu dang za tam tak, Nazi tihduhdahna tuartute rinna hi tûn lai Kristiante tân lei leh vâna an biak phu mi Pawimawh awmchhun, Jehova laka rinawm reng tûra tichaktu a ni. (Thu Puan 4:11) Isua chuan: “Felna avânga tihduhdah tuar hnute chu an eng a thawl e,” a ti a. Pathianin an thilṭha tihte chu a hre reng ang a, an huaisenna nun kawng avângin lâwmman a pe ngei ang.​—Matthaia 5:10; Hebrai 6:10. (w05 6/15)