Nî Tin Hun Chhiar Dân

“KAN dam chhûng nîte chhiar dân tûr min zirtîr ang che, finna thinlung kan neih phah hialna tûrin.” (Sâm 90:12) Hei hi Bible ziaktu Mosia ṭawngṭaina tlâwm tak a ni. Eng nge a bîk taka a ngen? Chutiang bawk ngenna zahawm tak chu kan siam ve tûr a ni em?

Châng 10-ah Mosia chuan mihringte dam chhûng hun tâwizia chu lungngai takin a sawi chhuak a. Hmun dangah chuan: “Hmeichhe hrin tawh mihring phawt chu rei lo tê dam, buainaa khat a ni,” tia Joba thusawi chu a chhinchhiah bawk a ni. (Joba 14:1) Mosia chuan mihring ṭha famkim lote dam chhûng hun tâwizia chu a hre chiang hle tih a lang. Chuvângin, a nî tin nun chu thilthlâwnpêk hlu tak angin a thlîr a ni. Pathian hnênah he ngenna hi thlenin, Mosia chuan a nun hmabâk la awmte chu fing tak, a Siamtu tilâwm thei tûr zâwnga hman a duh thu a sawi chhuak a ni. Keini pawhin kan nîte chu awmze nei taka hman kan tum tûr a ni lâwm ni? Tûna Pathian pawm nih kan duh chuan, chu chu kan tum tlat ang.

Mosia leh Joba chêttîrtu dang a awm a, chu chuan keini pawh min chêttîr ve tûr a ni. He Pathian ngaihsak mi pahnihte hian nakina lo thleng tûr lâwmman​—leia dinhmun ṭha zâwka nunna—chu an beisei ve ve a ni. (Joba 14:​14, 15; Hebrai 11:26) Chutih hunah chuan, thihnain tu hnathawh ṭha mah a titâwi tawh lo vang. Min Siamtu chuan mi rinawmte lei paradis-a chatuana nuntîr chu a tum a. (Isaia 65:​21-24; Thu Puan 21:​3, 4) ‘Finna thinlung neih phah hialna tûra dam chhûng nîte i chhiar’ chuan hei hi i hmabâk beiseina a ni ve thei a ni. (w05 5/1)