‘Ka Zirtîrna Dawn Avângin Ka Lâwm’

TLEIRAWL Kazuna-i chuan a zirtîrtuin Sâpṭawnga thu insawisiaknaa tel tûra a tih chuan a ngaihna a hre lo hle a. Chu intihsiakna chu Japan ram chhak lam Hokkaido thliarkâr lian taka high school zirlai zawng zawngte tâna hawn a ni a; mahse, a kalna school chu a la tel ngai si lo. Intihsiak nî a lo thlen chuan, zirlai dang 50 vêl a el dâwn avângin, Kazuna-i chu a zâm ru hle a. Lo endiktute zîngah Sâp mi pahnih a hmuh leh phei chuan a thla a phâng lehzual a ni.

Lâwmman la tûrte chu a hniam ber aṭangin an ko ṭan a. A tâwpa a hming an lam chuan, Kazuna-i chuan mak a ti kher mai. A kianga ṭhu a zirtîrtu nên chuan mak ti takin an inmelh phâwk nasa hle a. Mak ti tak chungin, Kazuna-i chu dawhsân lam panin a va kal a​—lâwmman pakhatna chu a va la ta a ni!

Kazuna-i chuan: “He lâwmman hi Jehova inawpna pâwlin Theocratic Rawngbâwlna School hmanga min pêk inzirtîrna ka dawn avânga dawng thei ka ni,” tiin hlim takin a hrilh a. “He zirtîrna ka dawn avângin ka lâwm tak zet a ni,” a ti. A naupan lai ata Kazuna-i telna chu school chu Jehova Thuhretute kohhran inkhâwmna pakhat a ni a. Chu intihsiakna atâna inbuatsaih nân, Kazuna-i chuan a bîk takin microphone hman dân te, nêlawm tak leh phûr taka thusawi dân te, zaizir dân te, ngaithlatute nêna inzawmna neih te, leh Theocratic Rawngbâwlna School-a zirtîrna dangte chu a ngai pawimawh a ni.

Tualchhûnga Jehova Thuhretute Kingdom Hall-a chawlhkâr tina neih he school kan kaihhruai dân lo hmu ve tûra kan sâwmna che hi lo pawm hrâm ang che. Chu zirtîrna chu apui apangin an hlâwkpui dân nangmah ngeiin rawn hmu ang che. He inkhâwmah hian tupawh a tel theih a. He school chungchâng i hriat belh nân i hnaih ber, in vêng chhûnga Jehova Thuhretute be râwn ang che. (w04 12/15)