“‘Aw!’ Tih Theih Kan Duh”

NIGERIA rama Jehova Thuhretute branch office chuan tûn hnai mai khân lehkha thawn a dawng a, chuta inziak ṭhenkhat chu a hnuaiah hian târ lan a ni:

“Kan fapa, Anderson-a chuan kum 14 mi a nihin mual min liamsan a. Ani chuan a thih hmain ar pahnih a vulh a. Chûngte chu hralh a, a hralhna man chu khawvêl puma thu hrilh rawngbâwlna thawhlâwm atâna branch office-a thawn a duh a ni. Mahse hralh theih a nih hmain a boral ta si.

“A duh ang ngeiin keini a nu leh pate chuan arte chu kan vulh puitling a, kan hralh ta a. Kan hralhna man chu Anderson-a thawhlâwm angin kan rawn thawn a ni. Jehova thutiam avângin, nakin lawkah​—rei lo te hnuah—​Anderson-a chu kan hmu leh dâwn tih kan ring tlat a. A duhzâwng kan tihpuitlin leh tlin loh min zawh huna ‘Aw!’ tih theih kan duh a ni. Dik tak chuan, Anderson-a mai ni lo, lo tho leh tûr ‘chhûmpui nasa tak ang thlîrtute’ hmuh chu kan nghâkhlel hle a ni.”​—Hebrai 12:​1, 2; Johana 5:​28, 29.

A chunga lehkha thawna a lan chian êm êm angin, thawhlehna rinna chu Kristiante tichaktu beiseina a ni a. Anderson-a chhûngte ang, chhûngkaw maktaduai tam takte’n an hmangaih mual liam tate an hmuhkîr leh hunah chuan an va hlim dâwn êm!​—1 Korinth 15:​24-26.

Pathian Thu chuan he mi thlamuantu thawhleh beiseina hi Pathian Ram hnuaia felna khawvêl thara thilmak ropui lo thleng tûr tam takte zînga pakhat a ni tih a târ lang a ni. (2 Petera 3:13) Chutih huna mite tâna Pathian thiltih tûrte sawiin, Bible chuan: “An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” a ti a ni.​—Thu Puan 21:4. (w04 8/1)