I Ṭawngṭainain Kawngro A Su Em?

KAN zîngah hian mahni thunun phâk loh dinhmun khirh takte tawng ngai lo tunge awm? Bible chuan ṭawngṭainain chutiang dinhmun khirh tak sawhkhâwk tûr a thlâk danglam thei tih Paula’n a hriat thu a târ lang.

Rom khua tân ina dik lo taka tântîr a nih khân, Paula chuan a rinpuite chu atâna ṭawngṭai tûrin a ngên a: “Rang deuhva in hnêna tirh lehin ka awm theih nân, chu chu ti tûrin ka ngên lehzual sauh che u a ni,” tiin a sawi belh a ni. (Hebrai 13:​18, 19) Ṭum dangah pawh, Paula chuan tân in aṭanga chhuah hmatîr a nih nâna a ṭawngṭaina chu Pathianin a chhâng ngei ang tih a rinzia a sawi lang bawk. (Philemona 22) Tichuan, a hnu lawkah chuan chhuahtîr a ni ta rêng a, a missionary hna chu a chhunzawm leh thei ta a ni.

Mahse, ṭawngṭaina chuan i buaina sawhkhâwk tûr chu a thlâk danglam thei tak tak em? A thei mahna. Amaherawhchu, ṭawngṭai hi sakhaw thiltih pângngai mai a ni lo tih hre reng ang che. Hmangaihna leh thiltihtheihna nei kan Pa vâna mi nêna kan inbiak pawhna tak tak a ni. Chuvângin, kan ṭawngṭainaah chuan engmah sawi hreh kan nei tûr a ni lo va; mahse, Jehova chhân lêt dân chu dawhthei taka kan nghah thung a ngai a ni.

Pathian chuan ṭawngṭaina zawng zawng chu tlang takin a chhâng vek kher lo thei a, kan duh dân leh kan beisei hunah chiah pawh min chhâng kher lo thei bawk. Entîr nân, Paula chuan a ‘tisaa hlîng’ chungchângah vawi engemaw zât a ṭawngṭai a. Chu Paula harsatna chu engpawh ni se, Pathianin a lâk bo sak lo; mahse, he thu mi tichak thei tak: “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” tih hmangin a thlamuan a ni.​—2 Korinth 12:​7-9.

Keini pawh Pathianin kan buaina engemaw bîk tak chu min lâk bosak lo mah se, ‘kan tuar theihna tûrin tlân chhuahna kawng a siam’ thei tih kan ring thei a ni. (1 Korinth 10:13) Rei lotê a chinah, Pathianin mihringte hrehawm tawrhna zawng zawng chu a nuaibo vek dâwn a. Chu mi hma chuan, “ṭawngṭaina Ngaithlatu” hnên lam hawina chuan kawngro a su tak zet a ni.​—Sâm 65:2. (w04 6/15)