Nangmah Nghawngtu Hun Serh Chu

ISUA chuan leia a awm laiin Pathian chawimawitu hun serh chu a lo hmang ṭan a. Hei hi a hnungzuitute hnêna hmang tûra thu a pêk sakhaw hun serh awmchhun a ni. Chu chu Lalpa Zanriah a ni a, Zanriah Hnuhnûng tia hriat a ni bawk.

Chu thil a thlen dâwn lai vêl a rûka lo hmutu angah inchan ta la. Isua leh a tirhkohte chu Judate Kalhlen Kût hmang tûrin Jerusalema pindan chungnungah an lo kal khâwm a. Kalhlen Kût chaw pângngai tak berâm sa rêp, hnim khâ, chhang dawidim telh loh, leh uain sen chu an eiin an in zo tawh a. Tirhkoh rinawm lo Juda Iskariota pawh hnawhchhuah a ni tawh a, rei lo têah a Pu chu a mantîr dâwn a ni. (Matthaia 26:​17-25; Johana 13:​21, 26-30) Isua chu a tirhkoh rinawm 11-te nên chauh an awm tawh a. Matthaia chu an zîngah a tel ve a ni.

Mit ngeia hmutu Matthaia ziak dân chuan, Isua’n Lalpa Zanriah a hman ṭan dân chu hetiang hi a ni: “Isuan chhang [dawidim telh loh] a la a, mal a sâwmsak a, a phel a; tin, zirtîrte hnênah chuan a pe a, ‘La ula, ei rawh u; hei hi ka taksa a ni,’ a ti a. Tin, [uain] no a la a, lâwm thu a sawi a, an hnênah a pe a, ‘In zain in rawh u; hei hi ka thisen, sualte ngaihdam nâna mi tam tak tâna chhuak tûr thuthlunna chu a ni,’” tiin a sawi a ni.​—Matthaia 26:​26-28.

Engvângin nge Isua’n Lalpa Zanriah a hman ṭan? Chutianga a tihin, engvângin nge chhang dawidim telh loh leh uain sen a hman? Isua hnungzuitu zawng zawngte’n hêng entîrnate hi an eiin an in tûr em ni? He zanriah hi engtia zînga hman tûr nge? Tin, i tân awmzia a nei tak tak em? (w04 3/15)