Pathianin Min Ngaihsak Em?

I CHHUNGKUAAH, hrisêlna lamah, leh hnathawhna lama buaina awmte avângin, a nih loh leh mawhphurhna rit tak dangte avângin i rilru a hah em? Mi tam takte rilru chu a hah a ni. Tûn laiah rorêl dik lohnate, dân bawhchhiatnate, leh tharum thawhnatein a nghawng loh tu fa nge awm teh rêng? Bible-in: “Thil siam zawng zawngte chu tûn thlengin rûm leh nauvei na tuarin an awm hlawm,” a tih ang chiah hi a ni. (Rom 8:22) Mite’n: ‘Pathianin a ngaihsak em? Min ṭanpui ang em le?’ tia an zâwt pawh chu a mak hran lo.

Lal fing Solomona chuan Pathian hnêna a ṭawngṭainaah: “Nangmah chauh hi mihring fate thinlung hretu i ni si a,” tiin a sawi a. Solomona chuan Pathianin min hria chauh ni lovin, mi mal tin min ngaihsak tih a ring tlat a ni. Ani chuan Pathian chu “vânan lo ngaithla” tûrin leh Pathian hnêna “an hri vei emaw, lungngaihna emaw” thlentu, amah ṭihtute ṭawngṭaina chhâng tûrin a ngên thei a ni.​—2 Chronicles 6:​29, 30.

Tûn laiah pawh, Pathian Jehova chuan min la ngaihsak rengin, ṭawngṭaia amah ngên tûrin min sâwm a ni. (Sâm 50:15) A duhzâwng nêna inmila tih tak zeta ṭawngṭaina chu a chhâng dâwn tih a tiam a ni. (Sâm 55:​16, 22; Luka 11:​5-13; 2 Korinth 4:7) Ni e, Jehova chuan “mi mal emaw, . . . mipui hovin emaw ṭawngṭaina leh dîlna an rawn thlen chu” a ngaithla a ni. Chuvângin, Pathian kan rinchhan a, a ṭanpuina kan dîl a, amah kan hnaih chuan, hmangaih taka a ngaihsakna leh a kaihhruaina chu kan tawng dâwn a ni. (Thufingte 3:​5, 6) Bible ziaktu Jakoba chuan: “Pathian hnaih rawh u, tichuan anin a hnaih ang che u,” tih min tiam a ni.​—Jakoba 4:8. (w04 1/01)