Thutiamte A Ngheh Hun

MIHRING chanchin chu thutiam hlen loh hlîrin a khat a. Ramte chuan indo lo tûra thu thlunnaa an hming ziah thlap chu an bawh chhe ṭhîn a; chu chuan, an mipuite chu indona râpthlâk takah a hruai ṭhîn. Ṭum khat chu Napoleon chuan: “Sawrkârte chuan an thutiamte chu nawr luih an nih hunah emaw, an hlâwkpui dâwn hunah emaw an hlen chauh ṭhîn,” a ti.

Mi mal thutiamte chu eng nge a nih ve? Miin a thutiam a hlen loh hian a va beidawnthlâk ṭhîn tak êm! A bîk takin, amah chu i mi hriat leh rin tak a nih phei chuan a beidawnthlâk lehzual a ni. Dik takin, mihringte hian an thutiam an hlen thei lo emaw, an hlen duh lo emaw mai ṭhîn.

Mihring thutiam leh Pathian thutiam inkâr chu a va inthlau tak êm! Pathian thutiamte chu a innghahna tlâkin a rin tlâk pumhlûm a ni. Jehova thutiam engpawh chu a nghet a. A thleng famkim ngei dâwn a ni. Hlawhchham ngai lo Pathian thu chungchângah, Isaia 55:11 chuan: “Chutiang bawkin ka kâ aṭanga ka thu chhuak chu a awm ang: engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” a ti.

A nih chuan, Bible-a chuang Pathian thutiamte chu engtin nge kan thlîr ang? Chûngah chuan kan innghat thei tak meuh a ni. Entîr nân, tirhkoh Johana chuan: “Ngai teh, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, Lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin a ziak a. (Thu Puan 21:​3, 4) Isua thu sawi: “Hei hi chatuana nunna a ni, nang Pathian tak chauh leh i tirh Isua Krista hriat hi,” tih nêna inmila thil i tih chuan, chûng malsâwmna chu i chên thei a ni.​—Johana 17:3. (w03 9/15)