Pathianin Mitthite A Thlîr Dan

KAN hmangaihte thihnaa han chân chu a lungchhiatthlâk ngei mai. Ruak nia inhriatna te, khawharna te, leh hrilhhaina te chu sawi theih rual a ni lo. Lusûnna chuan mi chu ṭanpui theitu rêng nei lo nia inhriatna a neihtîr thei a ni; engti khawpa hausa, thilti thei, leh thuneihna nei pawh ni se, khawvêla tumahin mitthi a kaihthawh theih loh avângin.

Amaherawhchu, min Siamtu chuan thlîr dân dang daih a nei. Leia vaivut hmanga mihring hmasa ber a siam ang bawkin, mitthi pawh a siam nawn thei a. Chu mi avâng chuan, Pathian chuan mitthite chu mi nung angin a thlîr thei a ni. Isua’n hmân laia mi rinawm thi tawhte chungchângah: “[Pathian] ngaih chuan . . . an nung vek si a,” a ti.​—Luka 20:38.

Leia a awm lai khân, Isua chu mitthi kaihthawh theihna pêk a ni a. (Johana 5:21) Chuvângin, rinawm taka thitate chungah a Pa thlîr dân ang chu a nei a ni. Entîr nân, a ṭhian Lazara a thih khân a zirtîrte hnênah: “A muhîl kai harh tûrin ka kal dâwn a ni,” tiin a sawi a. (Johana 11:11) Mihring thlîr dân a ṭang chuan, Lazara chu a thi a; mahse, Jehova leh Isua tân chuan muhîl ang lek a ni.

Isua Lalram rorêlna hnuaiah chuan, “mi felte leh fel lote thawhlehna” a awm ang. (Tirhkohte 24:15) A hnuah, chûng kaihthawhte chuan Pathian zirtîrna an dawng ang a, leia chatuana nun beiseina an nei ang.​—Johana 5:​28, 29.

Hmangaihte thihna chuan lungchhiatna leh lungngaihna chu kum engemaw chhûng min neihtîr ngei ang. Amaherawhchu, Pathianin mitthite a thlîr dân hriatna chuan, thlamuanna nasa tak min neihtîrin, beiseina min neihtîr thei a ni.​—2 Korinth 1:​3, 4. (w03 8/15)