“Ka Mamawh Zawng Zawng Ka Hmu Ta”

WORLD Health Organization-in report a pêk dânin, khawvêl pumpuia mi maktaduai 120 chuangte chu lungngaiin an awm nia chhût a ni. Kum tinin mi maktaduai khat chu mahni leh mahni an inthat a, mi maktaduai 10 leh 20 inkârte chuan inthah an tum a ni. Chutianga lungngaite ṭanpui thei eng thil nge awm? Damdawi lam inenkawlna chuan a chhâwk mai thei a, rilru lama ṭanpuina pawh thil pawimawh tak a ni. Chu bâkah, lungngaihna tuar mi ṭhenkhatte chuan Bible ṭanchhan Jehova Thuhretute thu leh hla chhuah chu ṭanpuitu dang a nihzia an hmu chhuak a ni, a hnuaia France ram aṭanga lehkha thawnin a târ lan angin.

“Hmân deuh lawk khân, nun zêl chhan tûr ka hre lo va. Pathian hnênah min thihtîr tûrin ka ṭawngṭai hial a ni. Ka chhûngril chu thi ang dêr a ni. A kaihhruaina zawngin Jehova hnênah nasa takin ka ṭawngṭai a. Tin, kum 2002 Jehova Thuhretute Kum Lehkhabu (English) chu chhiar ka tum bawk a; tichuan, ni thum chhûngin ka chhiar zo vek a ni. Chu chuan nasa takin min fuih a, ka rinna a tichak bawk a ni.

“Vênnainsâng leh Awake! magazine-ah tlêm azâwng zir bingna ka han nei a, awi, a va mak tak êm! Heng magazine-te hi kum 15 chhûng ka lo chhiar tawh a; mahse, thuziakte chu mi fuih thei tak leh ngaihven tlâk tak a ni tih ka lo hre ngai lo va. Chûng chu tûn lai huna thil vâng tak, hmangaihnain a khat tlat a. Ka mamawh zawng zawng ka hmu ta.”

Bible chuan: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” a ti a. (Sâm 34:18) Rinhlelh rual lohvin, “thinlunga lungchhiate” emaw “rilrua inchhîr” zawng zawngte emaw chuan fuihna leh nakin hun beiseina chu Bible-ah an zawng hmu thei a ni. Jehova Thuhretute chuan ṭanpui ngaite’n an hlâwkpui theih nân, thlamuanna bul Pathian thâwk khum Bible ṭanchhan thu leh hlate chu an sem chhuak a ni. (w03 3/1)