Tlânchhiatsan A Finthlâk Hun

TUN LAI khawvêl hi intihhuaisenna leh inhmêlmâkna, a nih loh leh thlêmnain a khat a. Dinhmun engemaw tlânchhiatsantu chu mi pângngai lo leh dâwihzepa ngaih an ni fo. Mite nuihzat pawh an hlawh hial thei a ni.

Nimahsela, Bible chuan tlânchhiatsan hi finna leh huaisenna a nih hun a awm tih a sawi chiang hle. Chu chu nemnghetin Isua chuan a zirtîrte rawngbâwla a tirh chhuah hma khân an hnênah: “He khuaah hian an tihduhdah hunah che u, khaw dangah tlânsan ang che u,” tiin a hrilh a ni. (Matthaia 10:23) Ni e, Isua zirtîrte chuan anmahni tiduhdahtute chu pumpelh an tum tlat tûr a ni. Tihluihnaa sakhaw inlehtîrna crusade indona ang chi rêng rêngah an tel tûr a ni lo. Anni chuan remna thuchah an keng zâwk a ni. (Matthaia 10:​11-14; Tirhkohte 10:​34-37) Chuvângin, thinrim mai lo vin, Kristiante chu inrunrâlna lo chhuahna ata inthiar fihlîm tûrin an tlânchhe tûr a ni. Hetiang kawng hian, chhia leh ṭha hriatna ṭha leh Jehova nêna an inlaichînna hlu tak chu an vawng reng thei a ni.​—2 Korinth 4:​1, 2.

Bible-a Thufingte buah chuan, he mi kalh chiah entîrna kan hmu a. Chutah chuan tlangvâl pakhat thlêmna tlânchhiatsan ahnêka, “bâwng, a talhna hmuna a kal ang” maia nawhchizuar zuitu chungchâng sawi a ni. Eng nge a rah chhuah? A nunna ngei leh thlêmnaa a tlûkchhiat avânga lo awm chhiatna chu a rah chhuak a ni.​—Thufingte 7:​5-8, 21-23.

A nih leh mipat hmeichhiatna lama nungchang bawlhhlawh emaw, hlauhawm thlen thei thil dangte emaw i tâwk a nih chuan engtin nge i tih ang? Pathian Thu-in a sawi angin, tihâwm tak chu, chu mi dinhmun aṭanga inlâkhran nâna tlânchhiatsan hi a ni.​—Thufingte 4:​14, 15; 1 Korinth 6:18; 2 Timothea 2:22. (w02 4/15)