Chhiartute Zawhna

Ring lo mi pasalin sakhaw ni serhte a hman chuan, engtin nge Kristian nupuiin Pathian laka a rinawmna leh a pasal laka a intukluhna chu a inbûktâwktîr ang?

Chutianga inbûktâwktîr tûr chuan Kristian nupui chuan finna leh remhriatna a neih a ngai a ni. Mahse, chu mawhphurhna pahnihte inbûktâwktîr chu a tih tûr dik tak a ni. Chu dinhmun nêna thuhmun chungchângah Isua chuan hetiang hian kaihhruaina thu a sawi a: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” tiin. (Matthaia 22:21) Isua chuan, Kristiante intukluhna tûr, sawrkâr thuneitute hnêna intukluh chungchâng a sawina a ni ngei mai. (Rom 13:1) Mahse, a kaihhruaina thu chu Kristian nupuiin a pasal​—ring lo mi pawh nise​—hnêna a intukluhna leh Pathian laka a mawhphurhna a inbûktâwktîr chungchângah pawh a hman theih tho a ni.

Bible hre chiang tawh phawt chuan Kristian mawhphurhna hmasa ber chu Pathian Engkimtitheia chungah a ni a, eng lai pawha a laka rinawm chu a ni tih an pha hauh lo vang. (Tirhkohte 5:29) Chutichung pawh chuan, kawng tam takah chuan Pathian chibai bûktu dik takte chuan Pathian dân pêkte bawhchhe chuang si lovin, thuneitu ring lo mi thil phût emaw, ngen emawte chu engemaw chen an tihsak thei tho a ni.

Daniela bung 3-in a sawi angin, Hebrai mi pathumte aṭangin zir tûr ṭha tak kan hmu a ni. An ram awptu, Nebukadnezzara’n mi dangte ruala Dura phaizâwla kal tûrin anni chu thu a pe a. Milem biakna thil a ni tih an hriat avângin, Hebrai mi pathumte chuan chuta kal loh chu an duh zâwk ngei ang. Daniela chuan chhuanlam a siam thei pawh a ni ang; mahse, mi dang pathumte erawh chuan an siam ve thei lo va.a Tichuan, chutah chuan an va kal ve ta a; mahse, thil dik lo tihnaah an inhnamhnawih hauh lo.​—Daniela 3:​1-18.

Chutiang bawkin, ring lo mi pasal chuan a Kristian nupuiin a tih duh loh sakhaw ni serhte nêna inzawmna nei thil engemaw ti tûrin a phût emaw, a ngên emaw mai thei a. Entîrna ṭhenkhat ngaihtuah ta ila: A pasal chuan a ṭhiante nêna ni serh an hmanho nâna ei tûr buatsaih tûrin a tîr thei a. A nih loh leh, chu mi nîa chhûngkhat lainâte kan tûr emaw, chaw eikhâwm tûr emawin (a nupui pawh tiamin) a chhûngte chu a phût mai thei. A nih loh leh, sakhaw ni serh nî a lo thlen hma aṭangin a nupui chu a bazâr hunah, a thil mamawhte​—chu mi nî atâna ei leh in tûr bîk te, mi hnêna thilpêk tûr te, a nih loh leh thil pêk fûnna tûr leh thilpêk ruala pêk tel tûr card-te​—chu lei tûrin a tîr mai thei a ni.

Hetiangah pawh hian, Kristian nupui chuan sakhuana dik lo thiltih rêng rênga inhnamhnawih loh a tum tûr a ni; mahse, chûng ngennate chu engtin nge a tih ang? A pasal chu chhûngkaw lû a ni a, Pathian Thu pawhin: “Nupuite u, Lalpaa a âwm tâwk ang zêlin in pasalte hnênah intulût rawh u,” a ti a. (Kolossa 3:18) Chutiang hunah chuan, Pathian laka rinawm chung siin, nupui a nih angin a pasal laka intukluhna a lantîr thei ang em? Chutih hunah chuan, a pasal thu a âwihna leh a dah pawimawh ber Jehova thu a âwihna inbûktâwktîr dân tûrah thutâwp a siam ngei tûr a ni.

Sakhaw ni serh nî lohvah, a pasal chuan chawhmeh engemaw chu tui a tih zâwng tak a nih vâng emaw, chutiang ei bîk hun a neih vâng emawin siam tûrin a tîr mai thei. Chutih hunah chuan, nupui chuan a pasal a hmangaihna chu lantîr a duh vâng leh lû a nihna a pawmzia a lantîr duh avângin a tihsak duh ngei ang. A nih leh, sakhaw ni serh nîah chutiang ngenna siam ta se, a tihsak thei em? Kristian nupui ṭhenkhat chuan chûng chu nî tina ei tûr a buatsaih ṭhin ang lekah ngaiin, chhia leh ṭha hriatna thiang tak nei chungin a tihsak thei mai thei. Chutiang thil a tihsakte chu a pasalin sakhaw ni serhte nên hmehbêl mah se, Kristian rinawm tupawhin an hmehbêl duh hauh lo vang. Chutiang bawkin, a pasal chuan thla tin emaw, kum tin emawin a chhûngte hun bîk neia tlawhho chu a phût mai thei a. Chu a tlawh nî chu sakhaw ni serh ni a nih chuan a kal ve thei em? A nih loh leh, a bazâr paha lei tûra a phûtte chu, ani’n hman a tumna ngaihtuah lêm lovin a leisak ngawt mai dâwn em ni?

Chutiangah chuan, Kristian nupui chuan mi dangte chunga nghawng a neih dân tûr a ngaihtuah tûr a ni. (Philippi 2:4) Hebrai mi pathumte chuan mi dang hmuha Dura phaizâwla kal an duh lo a nih a rinawm a; chutiang bawkin, Kristian nupui chuan mi dang hmuha sakhaw ni serhte nêna inzawmna nei anga lan chu a pumpelh duh ngei ang. Chuvângin, pasalin a nupui rilru a ngaihtuah avâng leh amah hmangaih a, zah êm êmtu a nupui a ngaihhnathiam avânga sakhaw ni serh kaihhnawih thilte amaha tih mai a duh leh duh loh hriat nân, a pasal chu thiam takin biak a tum tûr a ni. Chutianga an inbiakna aṭang chuan, a nupuiin sakhaw dik lo thiltiha tel a hnial avânga an pahnih inkâra buaina lo awm thei thilte pumpelh chu a finthlâk a ni tih pasal chuan a hre thiam mai thei a ni. A ni, thil lo thlen hmaa ṭha taka sawihona chuan buaina chu a sukiang thei a ni.​—Thufingte 22:3.

Atâwpah chuan, Kristian mi rinawm chuan thil awm dân chu a chhût ang a, chutah thu tâwp a siam tûr a ni. Pathian thu âwihna chu dah pawimawh ber tûr a ni; Hebrai mi pathumte pawhin an dah pawimawh ber ang khân. (1 Korinth 10:31) Chûng thilte chu hre rengin, chhungkua emaw, khawtlâng emawa thuneitute thil phût zîngah chuan engte nge rinna phatsan lova tih theih tih chu Kristian mi mal tinte thu tlûkna siam tûr a ni. (w01 12/15)

[Footnote]