Him Lohna Hual Vêl Kâra Nun
“I nî tin nuna i thil tih engpawh hi—mut pawh tiamin—i thiltih hnuhnung ber a ni lovang tih sawi theih pakhat tê mah a awm lo.”—Discover magazine.
THIHNA emaw, inhliamna emaw hi thil lo thleng thut thei reng, a châng phei chuan hriat lâwkna pawh awm lova lo thleng thut thei a nih avângin, nun chu bomb phûm rûkna hmunna kal nên tehkhin a ni a. Chûng him lohnate awm chhan chu ram tinah a inang lo thluah a. Chûng zîngah chuan motor chêtsualna te, tualchhûng indona te, ṭam te, AIDS te, cancer te, lung natna te, leh thil dang tam tak a tel a ni. Entîr nân, Africa ram sub-Saharan-ah chuan, AIDS chu mihring suat hnemtu ber lo ni chhovin, kum hmasa lam mai pawh khân “mi maktaduai 2.2 lai nun a suat a, chuta mitthi chu Africa ram tualchhûng indona awm tawh zawng zawnga thi zât aiin a lêt 10-in an tam a ni,” tiin U.S.News & World Report chuan a sawi.
Chutih laiin, khawvêl chuan nun pawhsei nân leh dam lohna leh ramtuileilova awm mai theihna chu tlâkhniamtîr tumin chêng tlûklehdingâwn tam tak an lo khawhral mêk bawk. Tin, ngaih dân tlâng lâwn tam tak, hrisêlna lam tel ei leh in ei ṭhinna te, leh taksa lam insawizawina ang chi te hian rah ṭha engemaw chu a chhuah thei teh meuh mai. Amaherawhchu, nun dân kawng engkimah nun him zâwk nei tûra ṭanpui thei che thu rintlâk bul ber a awm a. Chu chu Bible a ni. Chutah chuan kan hriselna leh kan ṭhatna
lam kaihhnawih thil chinfel dân tûr kawhhmuhnate a awm a. Bible chuan buaina zawng zawng chinfel dân a kip a kâwiin min hrilh lo na a, ei leh in thu-ah te, taksa enkawl dân chungchângah te, rilru put hmang thu-ah te, mipat-hmeichhiatna chungchângah te, ruih theih thil hmanna chungchângah te, intihhlim nâna damdawi hman thu-ah te, leh thil dang tam tak chungchânga min kaihhruaitu tûr dân bul ṭha tak min pe a ni.
Sum leh pai harsatna avângin mi tam tak nun chu a mangang a. Chûngah pawh chuan Bible chu min ṭanpuitu a ni. Bible chuan fing taka sum thlîr thiam tûr leh a enkawl dân tûr min hrilh mai bâkah, hna thawktu ṭha leh hotu ṭha nih dân te pawh min kawhhmuh tel bawk a ni. Mâwlmang taka sawi chuan, Bible chu sum leh pai lama himna leh taksa lam ṭhatna atân mai ni lovin, nunna atân ngei pawha kaihruaitu ṭha a ni. Tûn laia Bible ṭangkai theihzia hi hriat i duh em? I duh chuan khawngaih’in chhiar zawm zêl ang che. (w01 2/1)