“Mi Tinte Hlimna Tûr”

PACIFIC Chhim Lama thliarkâr pakaw infin khawm Tuvalu ram chu ram mawi tak a ni a, chutah chuan mi 10,500 vêl chauh an chêng a ni. Mahse, Pathian chuan “mi zawng zawng chhandama awmah leh thutak hriaah a duh a ni,” tih hriain, tualchhûng Jehova Thuhretute chuan Bible thu leh hla chhuahte anmahni ṭawnga neih an châk êm êm a. (1 Timothea 2:4) Mahse, Tuvalu ṭawng dictionary a awm loh avângin, chu chu chona tak tak a tling a ni. Kum 1979-ah chuan, Jehova Thuhretute zînga missionary pakhat chuan chu chona chu a lo hma chawn a. Amah leh a nupui chu tualchhûng chhûngkaw pakhat hnênah khawsain, an ṭawng chu an zir ṭan a, zawi zawiin Tuvalu ṭawng hrilhfiahna chu an siam a. Tichuan, kum 1984-ah Watchtower Bible and Tract Society of New York, Inc. chuan You Can Live Forever in Paradise on Earth tih lehkhabu chu Tuvalu ṭawngin a chhuah thei ta a ni.

Prime minister hlui Dr. T. Puapua-a chuan Live Forever lehkhabu a hlutzia chu heti hian a sawi chhuak a: “He lehkha bu hi Tuvalu ram tâna mamawh ‘ro’ belhchhahtu thar leh pawimawh tak a ni a. In chanvo​—he ram mipuite thlarau lama tihsâwtna kawnga in chanvo neih ropui tak​—hi hlimpui hle âwm in ni. Tuvalu ram chanchina mi tibengvâr thei thu leh hla chhutchhuahte zîngah he lehkhabu hi telh a nih ngei ka ring a ni. . . . He [hlawhtlinna] hi mi tinte hlimna tûr a ni,” tiin.

Ṭawngletlingtu thu mal khâwlkhâwm ziak tlarte chu 1993-ah chuan Tuvaluan-English dictionary-ah a lo chang chho va. Chu chu vântlâng tâna dictionay chhutchhuah hmasak ber a lo ni ta a ni. Tûn hnai lawk khân, National Language Board of Tuvalu chuan Tuvalu ṭawng dictionary hmasa ber siam chhuah nâna hman phalna a dîl a ni.

January, 1, 1989 aṭang chuan Vênnainsâng magazine chu thla tina chhuah a ni tawh a. He magazine hi i pianpui ṭawng ni lo, ṭawng dangin i chhiar a nih chuan, Vênnainsâng chu i pianpui ṭawng ngeia chhuah a nih leh nih loh engvângin nge phêk 2-na keuvin i enfiah loh vang? I pianpui ṭawng ngeia i chhiar chuan a tihlim lehzual ngei ang che. (w00 12/15)