Khawvêl Remna Engtin Nge?
KHAWVEL remna hi a lo thleng dâwn tawh em? Tûn hma chuan mi tam takin a lo thlen an ring a; mahse, tûnah chuan an ringhlel zo ta. Kan nakin hun harsatna chungchâng sawihona chungchânga South Africa ram chhuah Daily Mail & Guardian chhanchhinbu-in chanchin a thlen dânin, “kum 10 lek kal taa an sawi khawvêl pum huap dân leh thupêk kenkawhna chu duhthusâm thil lek a ang zo ta,” a.
Chanchin ziaktute chuan kum sâwmbi khat lek kal taa beiseina lâr tak chanchin an ngaihtuah a. Cold War a tâwp a, khawvêl awptu ram lian te innghirnghona pawh a awm tawh lo va. Chu hun thar inṭanna ni âwm taka lang a lo thlen chuan, mi tam takte chuan mihringin retheihna te, natna te, leh khawvêl harsatna te an chaina kawngah hmasâwnna pawimawh tak an neih an beisei a ni. Chanchin an thlen dân chuan, “Chûng an sawi lâwkte chu duhthusâm thil mai niin a lang ta. Kan hriat ngai mang lohna hmunahte chuan buaina thar a lo chhuak ṭhîn a; khawvêl retheihna chu a so sâng chho zêl a. Nuclear râl thuam nei thar ram pahnih a awm belh bawk a. Mihringte buaina kal zêl a sutkian theih lohna chuan UN hming chu a ti hliau a ni. Mite ngaih dân chu duhthusâm dinhmun ata ngaihruat phâk bâka dinhmun chhiaah a insawn mêk a ni.”
Bible zirlaite chuan mihringte thawhrimna chu eng anga ṭha pawh ni se, a hlawhtling dâwn lo tih an hre chiang a ni. Engvângin nge? Bible-in: “Khawvêl pumhlûm hi mi sual thu thuin a awm,” a tih avângin. (1 Johana 5:19) Pathianin he khawvêl hi paradis ni tûrin a siam a. Mahse, Setana thununna hnuaia a awm chhûng chuan chu chu thil theih a ni lo.
Chutih rual chuan, nghahchhan nei beiseina a awm a ni. Pathian Jehova chuan khawvêl remna chu a tiam a, chu chu he kal hmangte siam ṭhatna hmanga lo thleng tûr ni lovin, “lei thar” a chhûnga ‘felna awm’ hmangin a lo thleng ang. (2 Petera 3:13) Ni e, Pathian Lalram chuan kan leilung hi remna te, hlimna te awmna inah a siam danglam ang, chutah chuan a thu âwih mihring zâwng zâwngte tâna hlimna awmtîr reng thei nunna leh hnathawh tûr a awm ang. Chu bâkah, Pathian chuan, “an mit ata mittui zawng zawng a hrufai ang a; thihna a awm leh tawh lo vâng a, lungngaih te ṭah te, nat te pawh a awm leh tawh hek lo vâng,” tih a tiam a ni. Hêng a thutiamte hi mihring thu sawi lâwk rin tlâk lote ang a ni ve lo. Siamtu, dâwt sawi thei lova Thu rin tlâk takah a innghat zâwk a ni.—Thu Puan 21:4; Tita 1:1, 2.