Lawngpu Hnên Aṭanga Zir Tûr

TUIFINRIAT zau tak maia mal zin zawng a hahthlâk thei hle a. Chutianga chauh chhiatna chuan lawngpu chu fing takin thil a ngaihtuahtîr thei lo va; chu chuan a rilru a tibuaiin, thu tlûkna dik lo a siamtîr ṭhîn a ni. Chuvângin, lawngpu chuan tuifinriat thîrchakai hlutna a hre chiang hle a. Chu thîrchakai chuan lawng chu hlauhawm lama lên lo tûrin a chelh ding tlat a; lawngpu chau tak mai chu chawlhhahdam hun a pein, lawng chu kawng dikah a hruailehtîr thei a. Chu bâkah lawng lu lam chu thli leh tuifawn lo kalna lam a hawitîr zêl avângin, lawng chu dinhmun him berah a awmtîr ṭhîn a ni.

Lawngpute’n tuifinriatah hlauhawm tam tak an hmachhawn ang chiahin, Kristiante pawhin he khawvêl nêksâwrna hrehawm tak an hmachhawn a, chuvângin chawlhhahdam an duh thîn a ni. Ṭum khat chu Isua’n a zirtîrte hnênah heti hian a sawi a ni: “Nangmahniho ngawtin thlalêr hmunah a hrangin lo kal ula, châwl rih rawh u,” tiin. (Marka 6:31) Tun laiah pawh ṭhenkhat chuan chhûngkuaa an zinho nân chawlhkâr tlêm tê chhûng emaw, chawlh hahdam nân chawlhkâr tâwp emaw chu an hmang ṭhîn. Chutiang hunte chuan min tiharhin, tha thar min pe thei a ni. Mahse, chutianga hun kan hman lai chuan thlarau lama kan him ṭhat nân eng nge kan tih theih? Kan lenbo lohna tûra min ṭanpui tûrin eng nge kan thlarau lam tuifinriat thîrchakaiah chang thei?

Jehova chuan kan thlarau lam tuifinriat thîrchakaia chang thei thil chu phal takin min pe a. Chu chu thil dang aiin, a Thu Thianghlîm, Bible hi a ni. Nî tina kan chhiarna chuan Jehova kan hnaih theiin a hnên ata kan pêngbo lo vang. A thurawn te chuan min tinghetin, Setana leh a khawvêl thlêmnate chu min tuar chhuahtîr thei a ni. Hun kan duan anga a kal theih loh hun pawha hunbi neia Bible kan chhiar rengna chu kan thlarau lam thîrchakaiah a chang thei a, chu chuan min tinghet thei reng dâwn a ni.—Josua 2:7, 8; Kolossa 2:7.

Sâm ziaktu chuan, ‘mi engthâwlte’ “lâwmna chu Lalpa dânah a ni zâwk a; a dân thu chu a chhûn a zânin a ngaihtuah thîn,” tiin min hrilh a. (Sâm 1:1, 2) Chuvângin, nî tina Pathian Thu kan chhiarna chuan rah chhuah duhawm tak, hahdamna leh intih chak tharna dik tak min pe ang a, kan Kristian nun kawng zawh mêk chhunzawm zêl tûrin min buatsaih bawk ang. (w00 8/15)