Lalram Puangchhuaktute Report

Jehova Hmangaihtute chu A Mithmuhah An Hlu

LEBANON ram hian leilung hausakna a ngah êm avângin, Bible hun lai aṭang tawha hriat lâr a ni. (Sâm 72:16; Isaia 60:13) A lâr chhan ber chu an cedar thing mawina te, rimtuina te, leh tlona te avânga in sakna bungrua atâna miin an duh êm êm vâng a ni. Kum zabi pakhatna hun lai khan, Lebanon ram hian thil hlu ber mai a lo pe chhuak tawh bawk a. Chu mi chungchâng chu Chanchin Ṭha ziaktu Marka chuan hmân lai lebanon bial Tura leh Sidon khua aṭangte-in, “a [Isua] thiltih ropuizia chu an hriatin . . . mipui nasa tak a hnênah an lo kal ve a,” tiin a lo ziak a ni.— Marka 3:8.

Chutiang bawkin tun laiah pawh Lebanon ram chuan Jehova mit hmuha hlu êm êm chu a la rah chhuak reng a ni. Chu chu a hnuaia thil tawnte hian a tichiang hle.

• Thuhretu naupang Wissam-a chu an school class-a minute 30 chhûng thu sawi tûra tih a ni a. Wissam-a chuan chu hun chu thu hrilhna hun rem châng tak a nih ngei a ring tlat a ni. Tichuan, Life— How did it Get Here? By Evolution or by Creation? tih bu chu hmanga thil siam chungchâng sawi tumin a inbuatsaih ta a. An zirtîrtu pain a sawi tûr thupui a han hmuh chuan thu pawimawh tak a ni tih hriain a thu sawi hun tûr chu minute 45 thlenga pawhsei a remtih thu a hrilh nghâl a ni.

Chutia Wissam-a thu sawi laklawh lai chu an zirtirtu chuan chawlhtirin an school hotunu ber chu a va kohtîr ve a. An hotunu ber pawh chu lo thleng thuaiin, Wissam-a pawh chuan a thu sawi chu a chhunzawm leh ta a ni. Wissam-an a thusawi ṭan nâna zawhna a târchhuahte a hriat chuan, an hotunu ber chuan naupang zawng zawngin Wissam-a thusawi copy chu an dawng vek tûr a ni tiin phûr takin a sawi hial a ni.

A hnu deuh lawkah chuan zirtîrtu dang pakhat, chu class room rawn kal tlang chuan an thâwm ri chu a lo hria a, eng thil nge thleng tih a lo ngaihven ve mêk bawk a. An han hrilhhriat hnu chuan, Wissam-a chuan chanchhâwnna nge, thilsiam chungchâng tihfiah a tum tih a zâwt vat a. Chutah “Thil siam” tiin an lo chhâng a. Wissam-a chu Jehova Thuhretute zinga mi a ni tih a hriat chuan, an ziritîrtupa chuan zirlaite hnênah: “A thu sawi aṭang khân science hian evolution ni lovin, thil siam a thlâwp tih in hmu thei ang,” tiin a hrilh hlawm a ni.

Chu zirtîrtu chuan Creation (thil siam) bu chu a neiin, university-a naupangte zirtîr nân a lo hmang ṭhîn chu ni rengin! Tichuan, a chhuahsan hmain chu zirtîrtu chuan a tûkah ama school naupangte hmaa thu sawi ve tûrin Wissam-a chu a sâwm ta a ni. Chu chuan Jehova chanchin hriatîrna hun ropui tak dang a siam a ni.

• Kum sawmhnih pahnih mi Nina-i chu thu takah a tui hâl hle a. Ni khat chu a unau nuin Bible a pêk rualin Pentecostal Kohhran chanchin a hrilh a. Tichuan, Nina-i chuan lungawi taka Bible a chhiarna aṭangin Kristiante chuan thu an hrîl tûr a ni tih a hre ta a. Tichuan, a hmêl hriatte hnênah chuan thu a sawi ṭan ta a ni. A thu sawi ngaithlatu apiang mai chuan: “Jehova Thuhretute zinga mi em ni i nih?” tiin an lo zawt zêl a. Chu chuan a rilru a tibuai hle a ni.

Kum riat lai a vei hnu chuan, Jehova Thuhretute chu Nina-i inah lûtin Lal Ram chanchin an hrilh a. Atîr chuan an zirtîrna dik lo hai chhuah tumin a bei nasa hle a. Amaherawhchu, an thu sawi zawng zawng dikzia leh Bible-a innghat vek a nihzia a hmuchhuak ta zâwk a ni.

A tâwpa a thu zir— Pathian hming, Jehova; Lal Ram malsâwmna te, leh thu dang tam takte—chuan thutak a chhar a ni tih Nina-i chu a rinnghehtîr ta a. Tichuan Pathian hnêna inpumpêkin baptisma a chang ta a ni. Tin, Nina-i chuan kum sarih kalta chhûng zawng khân hun bi kimin pathian rawng a bâwl reng a. A ni, Jehova chuan amah hmangaihtu tak takte chu mal a sâwm ṭhîn rêng a ni.— 1 Korinth 2:9.