Lalram Puangchhuaktute Report
Hmangaihna Pathian Hriatna
BRAZIL mi Antônio-a chu kum 16 a nih aṭang rêngin nunah a beidawng nghâl pang mai a. Tlâktlai lo nia inhriatna chuan drugs leh zu ngawl a veitîr a. Mahnia intihhlum mai pawh a ngaihtuah fo ṭhîn. Chutih lai tak chuan a nu thu hrilh: “Pathian chu hmangaihna a ni” tih chu a hre chhuak a. (1 Johana 4:8) Mahse, chu hmangaihna Pathian chu khawiah nge a awm?
Antônio-a chuan a ngawlvei chu sim tumin, tualchhûng bial puithiam hnênah chuan ṭanpuina a zawng ta a. Katholic Kohhranah chuan a inhmang ṭan viau a; mahse, zawh duh tam tak a la nei cheu reng a ni. Entîr nân: “Thutak in hria ang a, thutak chuan bâwih a bân ang che u,” tih Isua thu angte hian a tibuai êm êm mai a. (Johana 8:32) Eng ang zalenna nge Isua’n a tiam? A chhânna lungawi thlâk tak kohhran chuan a pe thei lo. A tâwp atâwpah chuan, Antônio-a chu a tâl bo leh a, a nungchang pângngaiah a lêt leh a; a hma ai mahin a ngawl pawh a vei zual zâwk a ni.
Hetih hun lai hian, Antônio-a nupui Maria-i chuan Jehova Thuhretute nên Bible zirna a nei ṭan a. A nupui zirna chu khap lo mah se, Antônio-a chuan Thuhretute chu “America ram zauh nâna rawngbâwl, America sakhua angah ngaiin” a hnâwl a ni.
Lunghnual mai lovin Maria-i chuan Antônio-a ngaihvên zâwng nia a rin thuziak awmna Vênnainsâng leh Harh Rawh! magazine-te chu a hmuh tûrin a dah chhuak ṭhîn a. Antônio-a chu lehkha chhiar peih mi a nih avângin, a nupui awm loh hlân chuan chûng magazine-te chu a châng chângin a en thuak thuak ṭhîn a ni. A vawikhatna atân, Bible chungchâng a zawhnate chhânna chu a hmu ta. “Ka nupui leh Thuhretute’n hmangaihna leh ngilneihna ka chunga an lantîr chu ka hre ṭan ta bawk,” tiin a sawi a ni.
1992 kum laihâwl vêl chuan, Antônio-a chuan Jehova Thuhretute nêna Bible zir ve chu a titlu ta a. Amaherawhchu, drugs hman leh zu in chu nasa takin a la chhunzawm reng tho a ni. Zan khat chu zan reh hnua a ṭhianpa nên khawpui dai aṭanga in lam pana an rawn haw police-in an lo tiding a. Antônio-a bungruaa cocaine an hmuh chuan, an vaw ṭan ta mai a. Police pakhat chuan chirhah paih lûtin a silai ngul chuan a hmai chu a chuktuah siah mai a. “Tihlum law law rawh!” tiin, police dang chu a lo au tuar a.
Chirha a mut lai chuan a nun kal tawh chu a mitthlaah a lo lang uai uai a. Thil ṭha a hriat theih awm chhun chu a chhûngte leh Jehova chauh a ni. Jehova ṭanpuina dîlin tâwitêin a ṭawngṭai a. Chhan awm lovin, police-te chuan an ṭîn san ta mai a ni. Jehova’n a hum a ni tih ring tlat chungin, inah a haw nal nal a.
Antônio-a chuan tha thar thawhin Bible a zir ṭan leh ta a. Zawi zawiin, Jehova tihlâwm nân a nun kawng a thlâk hret hret a. (Ephesi 4:22-24) Insûmtheihna insiamin, drugs lama a harsatna pawh a do ṭan ta a. Chutichung pawhin, dawmdawia inenkawl a ngai a. Ngawlveite enkawlna hmuna thla hnih a awm chhûng chuan, Bible thuchhuah tam tak a chhiar a. Chu a chhiarte zîngah chuan, Chatuan Nunnaa Hruaitu Hriatna lehkhabu pawh a tel a ni. Tichuan, Antônio-a chuan hêng lehkhabute aṭanga a thu zir chu ngawlvei dangte hnênah a hrilh chhâwng ve leh ṭhîn a ni.
Antônio-a’n chu hmun a chhuahsan hnu chuan, Thuhretute nêna a Bible zirna chu a chhunzawm leh a. Tûnah chuan, amah, Maria-i, an fanute pahnih leh Antônio-a nu te chuan chhûngkaw inlungrual tak leh hlim takin Jehova rawng an bâwlho ta a ni. Antônio-a chuan: “Tûnah zawng, ‘Pathian chu hmangaihna a ni’ tih thu awmze dik tak chu ka hre ve ta e” a ti a.
[Phêk 8-naa milem]
Rio de Janeiro-a thuhrilhna