Sex Hmang Tûra Nawrna Chu Engtin Nge Ka Tih Ang?

ENG NGE I TIH ANG?

He thilthleng hi han mitthla teh: Mike-a nêna an inkawpna thla hnih vêl chauh la ni mah se, Heather-i chuan ani chu hre chiang hle tawh niin a inhria a. SMS an inthawn ṭhînin, phone-a vawikhat inbiak nân dârkâr rei tak tak an hmang a, an thusawi lai pawh an insawi zawhsak thei hial a ni! Mahse, tûnah Mike-a chuan inbiak mai chu a duh tâwk tawh lo.

Thla hnih kalta chhûng khân, Mike-a leh Heather-i te chuan kut invawnsak leh rei lo tê tê infawh mai bâk chu thil dang an ti lo va. Heather-i chuan hei aia dai thûk chu a duh lo. Chutih rual chuan, Mike-a chân chu a duh bawk si lo. Mi dang tumahin ani ang tlukin hmêlṭha tak leh danglam bîk tak nia inhriatna an neihtîr si lo. Heti hian a ngaihtuah a: ‘Chu bâkah, Mike-a nên chuan inngaizâwng kan ni alâwm . . . ’

Ngaihzâwng nei tûra kum tling tawh Heather-i dinhmuna ding ni ta la, eng nge i tih zawm ang?

INNGAIHTUAH CHIANG RAWH!

Lei hîpna ang chi leilung pianken dân kalha awm i tum chuan, a sawhkhâwk chu i tuar ang. Chutiang bawkin, nungchang lama dân,“inngaih bânsan” tûra thupêk ang chi i zâwm lo a nih chuan, a sawhkhâwk chu i tuar dâwn a ni —1 Thessalonika 4:3.

Chu thupêk zawm lohna sawhkhâwk chu eng nge ni? Bible chuan: “Mi ngaih hmang erawh chuan ama taksa chungah thil a tisual a ni,” a ti a. (1 Korinth 6:18) Engtin nge a nih theih?

Zirchîk mite chuan inneih hmaa sex hmang ṭhalai tam takte chuan a hnuaia târ lante zînga pakhat emaw, a aia tam emaw chu an tâwk fo tih an hmu chhuak a ni.

• LUNGNGAIHNA. Inneih hmaa sex hmang ṭhalai a tam zâwkte chuan a hnuah an inchhîr thu an sawi ṭhîn a ni.

• INRINHLELHNA. Sex an hman zawh hian, an pahnihin ‘Mi dang tu nên nge sex a lo hman tawh ang le?’ tiin an ngaihtuah reuh reuh ṭan ṭhîn.

• BEIDAWNNA. Nula tam takte chuan anmahni hman ṭangkai tumtute aiin vênghim thei tûrte chu an rilru tak chuan an duh zâwk a. Mipa tam tak chuan an duh ang anga awm hmeichhia chu an duh tak tak ṭhîn lo tih an inhmu chhuak a ni.

• Ngaihtuah tûr pawimawh ber: Inneih hmaa sex i hman chuan, thil hlu tak i chân avângin i hlutna i tikiam a ni. (Rom 1:24) Hetianga khawhral mai tûr atân chuan i uiawm lutuk!

“Inngaih bânsan” tûrin mize nghet i neihzia târ lang rawh. (1 Thessalonika 4:3) Tichuan, nupui pasal i neih hunah chuan, sex i hmang thei tawh ang a. Chutah, inneih hmaa sex hmangtute neih ṭhin lungkhamna te, inchhîrna te, leh inrintâwk lohna te nei miah lovin, nuam takin i hmang thei tawh ang.—Thufingte 7:22, 23; 1 Korinth 7:3.

ENGTIN NGE I NGAIH?

• Nangmah hmangaih tak taktu chuan tisa lam leh rilru lama tihnat che chu a duh dâwn em ni?

• Nangmah duh tak taktu che chuan Pathian nêna in inlaichînna tichhe tûrin a thlêm dâwn che em ni?—Hebrai 13:4.