ṬHEN NGANA

‘I Nunna Vêngtu leh Hotu Hnênah Chuan’ Kîr Leh Rawh

He brochure-a kan sawi lan harsatnate zînga pakhat emaw, a aia tam emaw chu i tawng em? I tawng a nih chuan, i mal lo ve. Bible hun lai leh kan hun laia Pathian chhiahhlawh rinawm tam takte chuan chutiang harsatna chu an tâwk a. Chutiang harsatnate hneh tûra Jehova ṭanpuina an dawn ang bawkin, nang pawhin i dawng ve thei a ni.

Jehova hnêna i kîr lehna kawngah ani’n a ṭanpui ang che

JEHOVA hnêna i kîr leh chuan, ani’n a ṭanpui ang che tih ring tlat rawh. Lungkhamna hmachhawn tûr te, lungnih lohna tiveng tûr te, chhia leh ṭha hriatna thiang aṭanga neih theih rilru leh thinlunga thlamuanna hmu tûr tein a ṭanpui ang che. Tichuan, i unaute ruala Jehova rawngbâwl leh châkna i lo nei ang. I dinhmun chu kum zabi khatnaa Kristian ṭhenkhatte dinhmun nên a inang mai thei a; tirhkoh Petera chuan an hnênah: “Berâm bo ang in nih kha, tûnah chuan in nunna vêngtu leh hotu hnênah chuan in kîr leh tâk hi,” tiin a ziak a ni.—1 Petera 2:25, NW.

Jehova hnêna kîr leh chu i thiltih theihte zînga ṭha ber a ni. Engvângin nge? Jehova thinlung i tihlâwm dâwn avângin. (Thufingte 27:11) I hriat tawh angin, Jehova chuan rilrua veina a nei a; chuvângin, kan thiltih chuan a chungah nghawng a nei a ni. Mahse, Jehova chuan amah hmangaih tûr leh a rawngbâwl tûrin min tilui lo. (Deuteronomy 30:19, 20) Bible lama mi thiam pakhat chuan: “Mihring thinlung pâwn lamah a hawnna tûr a invuah lo va. Chuvângin, a chhûng lam aṭanga hawn ngai a ni,” tia sawiin, tuman kan thinlung an hawng thei lo va, mahni ngeia hawn a ngaih thu a sawi a ni. Chu kawngkhâr chu thinlunga khat liam hmangaihna nêna Jehova chibai bûkin kan hawng thei a. Chutianga kan tih chuan, a hnênah thilpêk hlu tak—kan rinawmna—kan pe tihna a ni a, chu chuan a thinlung a tilâwm hle a ni. Ni e, a phû ang ngeia Jehova chibai bûkna aṭanga kan neih hlimna chu thil dang aṭanga kan neih hlimna nên khaikhin theih rual a ni lo.—Tirhkohte 20:35; Thu Puan 4:11.

Rawngbâwlnaa tel tawh lo unaunu chu kohhranah ṭha taka lawmluh a ni

Chu bâkah, Pathian biaknaa i inhman leh hian, thlarau lama i mamawh chu phuhrûk a ni ang. (Matthaia 5:3) Eng kawngin nge? Khawvêl puma mite chuan, ‘Engah nge kan pian?’ tih an ngaihtuah a. Nunin a tum hriat chu an châk hle a ni. A chhan chu Jehova’n chutiang hriat châkna neia min siam vâng a ni a. A rawngbâwlna aṭanga lungâwina nei tûrin min siam a ni. Jehova rawng kan bâwl chhan chu amah kan hmangaih vâng a ni tih hriat aia lungâwina nasa zâwk kan nei thei lo.—Sâm 63:1-5.

Pathian Jehova chuan a hnêna kîr leh tûrin a duh che tih hria ang che. Engtin nge i hriat chian theih? Hei hi ngaihtuah rawh: Ṭawngṭaina tam tak hlânin, he brochure hi ngun taka buatsaih a ni a. Kohhran upa emaw, unau dang emawin a pe che a ni. Chutah, a thute chhiar tûr leh chhâng lêt tûra chêttîrin i awm ta. Hêng zawng zawng hi, Jehova chuan a la theihnghilh lo che tih finfiahna a ni a. Theihnghilh ahnêkin, dîmdawi takin a lamah a hîp zâwk che a ni.—Johana 6:44.

Jehova chuan a berâm bote a theihnghilh ngai lo tih hriatna aṭangin thlamuanna i hmu thei a. Chu chu unaunu Donna-i chuan a rawn hre thiam a ni. Ani chuan: “Thutak ata ka tawlh bo va; mahse, Sâm 139:23, 24 thu: ‘Aw Pathian, ngun takin mi en chhuak la, ka thinlung hi hria ang che: mi fiah la, ka ngaihtuahnate hi hria ang che: tin, keimahah hian suahsualna kawng rêng rêng a awm nge awm lo, en la, chatuan kawngah chuan mi hruai ang che,’ tih hi ka ngaihtuah fo ṭhîn. Khawvêla mi ka ni lo tih ka hria, khawvêlah chuan ka leng thei tak tak ngai lo; Jehova inawpna pâwl hi ka awmna tûr a ni tih ka hria. Jehova chuan min kalsan ngai lo tih ka hre ta a; ka mamawh awmchhun chu a hnêna kîr lehna kawng zawn hmuh chauh a ni. Chutianga ka kîr leh tâk avângin ka va lâwm tak êm!” tiin a sawi a ni.

“Jehova chuan min kalsan ngai lo tih ka hre ta a; ka mamawh awmchhun chu a hnêna kîr lehna kawng zawn hmuh chauh a ni”

“LALPA chunga lâwmna” i neih leh theih nân tih tak zetin kan ṭawngṭaisak a che. (Nehemia 8:10) Jehova hnêna i kîr leh chuan i inchhîr ngai lo vang.

Jehova Hnêna Kîr Leh Chungchânga Zawhnate Chhânna

KHAWI AṬANGIN NGE KA ṬAN ANG?

Damkawr pakhat tân a thil tih ṭhinte chu zawi zawia tih leh chu a ngai a. Chutiang bawkin, nî tin thlarau lam chaw chhe tê tal ei tumin thlarau lam chakna i nei leh thei a ni. Vawilehkhata tih vek tum suh. A hmasain Bible chhiar nân, ngaihthlâk nân, kan thu leh hla chhuah a engemaw ber zir nân, jw.org Web site tlawh nân, a nih loh leh jw.org-a broadcast en nân hun rei lo tê i pe thei ang a. Chu bâkah, i remchân veleh kohhran inkhâwmah tel ang che. A pawimawh ber chu Jehova hnêna ṭanpuina dîl hi a ni a. ‘A ngaihsak ṭhin che avângin i manganna zawng zawng chu ama chungah nghat vek rawh.’—1 Petera 5:7.

“Pathian rawngbâwlnaa ka inhman tawh loh hnu chuan, ṭawngṭai tûr pawhin ka zak ngawih ngawih a. Huaisenna zawng zawng sâwm khâwma ka ṭawngṭai hnu chuan, tualchhûng kohhran upa pakhatin min rawn tlawh a. Jehova chu ka chungah a la beidawng lo a ni tih hre thiam tûrin min ṭanpui a ni. Upa chuan nî tina Bible chhiar ṭan tûrin thurâwn min pe a. Chutianga ka tih hnu chuan, inkhâwmnaa tel tûra ka mamawh chakna ka nei ta a. A hnuah chuan, rawngbâwlnaah ka tel leh ta. Ka chunga Jehova a beidawn loh avângin ka lâwm hle.”—Eeva-i.

ENGTIN NGE KOHHRANIN MIN DAWNSAWN ANG?

Kohhran mi leh sate chuan ṭha takin an lâwm ang che tih ring tlat rawh. Sawisêl emaw, i chung thu rêl emaw aiin, an hmangaihna che chu nemnghetin, nangmah fuih nân theih tâwp an chhuah zâwk ang.—Hebrai 10:24, 25.

“Kingdom Hall-a kal chu ka zak hle a. Ka ṭhian hluite’n engtin nge min tih ang tih ka ngaihtuah a. A hma kum 30 vêl aṭanga kohhrana awm tawh unaunu tar pakhat chuan ‘Ka Fapa, inah hian ka lâwm lût a che!’ mi rawn ti a. Chu chuan ka thinlung a khawih hle mai. Ina lo kîr leh ka ni tak zet a ni.”—Javier-a.

“Kingdom Hall-ah kalin tuman min hriat loh nân tlar hnuhnûng berah ka va ṭhu a. Mahse, mi tam tak chuan min lo hria a, ka naupan laia ka inkhâwm laite thlengin. Min lo lâwmin, duat taka min lo pawm hlawm avângin ka thla a muang hle. Ina lo kîr leh ang mai ka ni.”—Marco-a.

ENGTIN NGE UPATE’N MIN ṬANPUI ANG?

Upate chuan ngilnei takin an cheibâwl ang che a. “I hmangaihna hmasa ber” neih lêt i tum avângin an fak bawk ang che. (Thu Puan 2:4) I thil sual tih engpawh siam ṭha tûrin zahngai tak leh “thuhnuairawlh takin” an ṭanpui ang che. (Galatia 6:1; Thufingte 28:13) Upate chuan Chatuanin I Hlim Thei! emaw, Draw Close to Jehovah emaw hmanga Bible zirpui tûr chein tuemaw chu an ruatsak ang che a. I rawn kîr lehna kawng tluana thlamuan chein, an ṭanpui bawk ang che.—Isaia 32:1, 2.

“Rawngbâwlnaa tel tawh lova ka awm kum riat chhûngin, upate chuan min rawn tlawh ṭhîn a. Ni khat chu, upa pakhat chuan ka telna thlalâk ṭhenkhat min rawn hmuh a. Chûng chuan tûn hmaa hun hlimawm tak ka hmante min hriat chhuahtîr avângin, Jehova rawng ka bâwl laia ka neih hlimna neih leh chu ka duh ta a. Upate chuan thlarau lam thil ka lo tih ṭhinte ti leh tûrin min ṭanpui a ni.”—Victor-a.

“A Tichak Reng Ang Che”

Kan hlabu, Jehova Chawimawiin Hla Sa Rawh, tihah hian thlarau lam thiltiha i tel leh huna thlamuanna leh fuihna pe thei tûr che hla ṭha takte a tel a. Entîr nân, hla number 38-na hla thu hi han ngaihtuah teh. A thu chuan 1 Petera 5:10 thu a ṭanchhan a, a thupui chu “A Tichak Reng Ang Che,” tih a ni.

Chhan leh vâng ṭha neiin Lalpa’n a hruai chhuak che,

Khawvêl thim ata êng ropuiah chuan;

A hmu i thinlungah thutak i ngainatna,

Amah zawn leh thil dik tih i duhna;

A hnênah i tiam a duh zâwng ti’an,

A ṭanpuiin a hruai zawm zêl ang che.
I tân a pe Lalpa’n a Fapa mal neih chhun,

Khawvêl i ngam a duhsakna a lang;

Ama Fapa ngei pawh zuah lova min pêk chuan,

Ringhlel suh chakna a pe reng ang che;

I rinna leh hmangaihna a nghilh lo’ng,

A ngaihsakin a hruai zawm zêl ang che.

(THUNAWN)

Krista thisen hlua lei, Lalpa mi i ni ta;

A tinghet reng chein, a tichak reng ang che;

Kalsan lova hruai zêlin, a vênghim zêl ang che;

A tinghet reng chein, a tichak reng ang che.

He hla leh Lalram hla dangte ngaithla tûrin, he code hi scan la, a nih loh leh jw.org-ah kal rawh.