Engvângin Nge Inkhâwmpuiahte Kan Tel Ṭhin?

Engvângin nge hêng mite hi an hlim êm êm? Anni hi kan inkhâwmpui pakhata tel an ni a. Kum khata vawi thum inkhâwmpui hmang ṭhîn tûra hrilh hmân laia Pathian chhiahhlawhte ang bawkin, keini pawhin inkhâwmpuia inhmuhkhâwm chu kan nghâkhlel hle a ni. (Deuteronomy 16:16) Kum tin hian inkhâwmpui pathum: ni khat awh bial inkhâwmpui pahnih leh ni thum awh regional inkhâwmpui pakhat kan nei ṭhîn a. Hêng inkhâwmpuite hi engtin nge kan hlâwkpui?

Inkhâwmpuite chuan kan Kristian inunauna a tinghet. Israelte’n ‘inkhâwmnaa’ Jehova fak nuam an tih ang chiahin, keini pawhin chutiang inkhâwmpuinaa Pathian fakho chu nuam kan ti hle. (Sâm 26:12; 111:1) Hêng inkhâwmpuite hian kohhran dang emaw, ram dang emawa Thuhretute hmêlhriat theihna leh kawm theihna hun remchâng ṭha min pe a. Chhûn chawlhah chuan inkhâwmpuina hmunah chawte kan ei tlâng a, chu chuan thlarau lam hun kan hmante hlimawmna chu a belhchhah a ni. (Tirhkohte 2:42) Chûng inkhâwmpuiahte chuan khawvêl puma “unauhote” inlungrualtîrtu hmangaihna chu keimahni ngeiin kan tawng ṭhîn.—1 Petera 2:17.

Inkhâwmpuite chuan thlarau lama hma sâwn tûrin min ṭanpui. Israelte chuan Pathian Lehkha Thu an hnêna hrilhfiahte ‘hriat chian’ chu an hlâwkpui a. (Nehemia 8:8, 12) Keini pawhin, kan inkhâwmpuinaa Bible kaihhruaina kan dawnte chu kan hlut a ni. Inkhâwmpuia thusawi apiang chuan Bible ṭanchhan thupui a nei a. Thusawi ṭha tak te, thusawi inzawm te, leh thiltawn chan nawnna te aṭangin kan nuna Pathian duhzâwng tih dân kan zir a ni. Hêng hun khirh taka harsatnate hlawhtling taka pal tlangtu Kristiante thiltawn kan hriatte chuan min tichak a. Regional inkhâwmpuia Bible hun lai lemchante chuan Bible-a thuziakte chu kan tân a tinung lehzualin, thil ṭha tak min zirtîr a ni. Inkhâwmpui apiangah chuan, Pathian hnêna an inpumpêkna târ lang duhte tân baptisma channa hun pawh neih a ni bawk.

• Engvângin nge inkhâwmpuite chu hun hlimawm tak a nih?

• Engtin nge inkhâwmpuia tel chu i hlâwkpui theih?