Engtin Nge Kristian Unaute Nêna Inkawmna Chu Kan Hlâwkpui?

Ramhnuai pilril tak kal tlang ngai emaw, khaw chhe tak hnuaia kal chhuah ngai emaw pawh ni se, Kristian inkhâwmnaah chuan kan tel ziah ṭhîn. Engvângin nge Jehova Thuhretute chuan harsatna tâwk reng chung leh hnathawh hnua an chau hle chung pawhin, an unaute nêna inhmukhâwm tûra chutianga ṭan kan lâk?

Kan ṭhatna tûr a nih vâng a ni. Paula chuan kohhrana kan mi kawmte chungchângah, ‘Inngaihtuah tawn rawh u,’ tiin a ziak a. (Hebrai 10:24) Hei hi “ngun taka ngaihtuah,” tihna a ni a; kan inhre tawn tûr tihna a ni. Chuvângin, tirhkoh Paula thusawi hian mi dangte ngaihsak tûrin min fuih a ni. Kristian chhûngkaw dangte hriat chian lehzualna aṭangin, an zînga ṭhenkhat chuan kan tawn ang harsatnate chu hlawhtling takin an hmachhawn thei a, chutianga hmachhawn ve thei tûrin min ṭanpui thei tih kan hmu chhuak ṭhîn a ni.

Inṭhianna tlo tak a siam vâng a ni. Kan inkhâwmnaah hian hmêlhriat satliahte nên ni lovin, ṭhian ṭha takte nêna inhmu khâwm kan ni a. Hun dangah chuan, intihhlimna ṭha neiin hun kan hmangho ṭhîn bawk. Chutiang inkawmna chuan eng rah ṭha nge a chhuah? Inngaihhlut tawn lehzual dân kan zir a, chu chuan kan inhmangaihna a tinghet a ni. Tichuan, kan unaute’n harsatna an tawn hunah, inṭhianna nghet kan lo neih tawh avângin, kan inṭanpui nghâl ṭhîn. (Thufingte 17:17) Kohhran chhûnga mi zawng zawngte kâwmin, ‘inang takin kan inbuaipui tawn ṭheuh’ tih kan târ lang a ni.—1 Korinth 12:24-26.

Pathian duhzâwng titute chu ṭhiana thlang tûrin kan fuih che a. Jehova Thuhretute zîngah chutiang ṭhian chu i hmu thei ang. Min kâwm lo tûrin engmah indantîr suh ang che.

• Engvângin nge inkhâwmnaa inkawmho chu kan hlâwkpui?

• Engtikah nge kan kohhran hriat chian chu i duh ang?