Lei Chu Paradis-ah A Lo Chang Ta!

THU PUAN, tia koh Bible bu hnuhnûng ber chuan mi zawng zawngte tân beisei tûr a pe a. Tirhkoh Johana ziak chu lehkhabuah chuan Pathian Jehova thiltum thlen famkimnaa a vâwr tâwp thleng inlârnate a tel a ni.

Inlârna hmasa berah chuan, tho leh Isua chuan kohhrante chu a fakin, a zilh bawk a. A dawta inlârnaah chuan thlarau thil siamte’n Pathian an chawimawina vân lam lalṭhutthlêng chu a lang a ni.

Pathian thiltum a thlen chhoh zêl chuan Berâm No, Isua Krista chuan chhinchhiahna pasarih nei lehkha zial chu a dawng a. Chhinchhiahna hmasa palite hawn a han nih chuan entîr nei sakawr chungchuangte an lo lang a. A hmasa ber chu lallukhum khuma sakawr vâr chunga chuang, Lal Isua a ni a. A dawta sakawr rawng chi hrang hrang chunga chuangte chuan indo te, ṭâm te, leh hri lêngte chu an entîr a—chûng zawng zawngte chu he khawvêl kalhmang tâwpna tûr ni hnuhnûngah a thleng famkim a ni. Chhinchhiahna pasarihna phelhna chuan Pathian rorêlna puan chhuahna entîrtu tawtawrâwt pasarihte hamna a thlen a. Chûng chuan entîr nei hri, a nih loh leh Pathian thinurna târ lannate chu a thlentîr a ni.

Mipa naupang piang hlimin a entîr Pathian Ram chu vânah din a ni a. Vânah indona a thleng a, Setana leh a vântirhkoh suaksualte chu lei lamah paihthlâk an ni. Aw ring tak chuan: “Lei . . . chung a pik e!” a ti a. Diabola chu hun tlêm tê a nei tih a inhriat avângin a thinur hle a ni.—Thu Puan 12:12.

Johana chuan Berâm No-in a entîr Isua chu vânah a hmu a, mihringte zîng ata thlan chhuah mi 1,44,000-te chu a kianga awmin a hmu bawk a. Anni chu lal angin Isua nên “rorêlin” an awm ang. Chutiang chuan Thu Puan bu chuan thlah zawmpuitute chu 1,44,000 an ni dâwn tih a târ lang a ni.—Thu Puan 14:1; 20:6.

Leia rorêltute chu ‘Pathian engkimtitheia ni ropuia indona,’ Armageddon-ah an kal khâwm a. Anni chuan sakawr vâr chunga chuang, vân sipaite hruaitu Isua chu an do a ni. He khawvêl rorêltu zawng zawngte hi tihboral vek an ni a. Setana chu phuar a ni a; tin, Isua leh 1,44,000-te chuan lei chungah “kum sângkhat” chhûng ro an rêl a. Kum sângkhat a tâwp hnuah Setana chu tihboral a ni.—Thu Puan 16:14; 20:4.

Krista leh a rorêlpuite Kum Sângkhat Rorêlna chuan thuâwih mihringte tân eng awmzia nge a neih ang? Johana chuan: “[Jehova’n] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin a ziak a ni. (Thu Puan 21:4) Lei chu Paradis-ah a lo chang ta!

Chutiang chuan Thu Puan bu chuan Bible thu chu a tifamkim ta a ni. Messia Lalram hmangin chatuan atân Pathian Jehova hming chu tihthianghlim leh a lal chungnunna chu thiamchantîr a ni ta!

—Thu Puan bu a ṭanchhan.