ṬHEN 24

Paula Chuan Kohhrante Hnênah Lehkha A Thawn

Paula lehkha thawnte chuan kum zabi khatnaa Kristiante a tichak

KRISTIAN kohhran din thar hlim chuan Jehova thiltum tihpuitlinnaah chanvo pawimawh tak a luah chho vang. Mahse, kum zabi khatnaa Kristiante chuan beih an tâwk ta thuai a. Kohhran pâwn lam aṭanga tihduhdahna leh kohhran chhûng aṭang ngeia thil hlauhawm zâwk hriatthiam harsa takte an han tawrh chuan Pathian laka an rinawmna chu an vawng ang em? Kristian Grik Pathian Lehkha Thu-ah chuan a ṭul anga zilhna leh fuihna petu lehkha thawn 21 lai a tel a ni.

Lehkha thawn sâwm leh pali—Rom aṭanga Hebrai thleng—chu tirhkoh Paula ziak a ni a. Mi mal hnêna thawn a ni emaw, kohhrana mite hnêna thawn a ni emaw pawh ni se, hêng lehkha thawnte hian a thawnnate hming chu a pu zêl a ni. Paula lehkha thawna chuang thu ṭhenkhat chu ilo ngaihtuah ang u.

Awm dân dik leh nungchang lama fuihna. Inngaih hmang te, uirê te, leh thil sual pawi tak titute chuan “Pathian ram an luah lo vang.” (Galatia 5:19-21; 1 Korinth 6:9-11) Pathian betute chu eng hnam pawh ni se, an inpumkhat tûr a ni a. (Rom 2:11; Ephesi 4:1-6) Kristian unaute zînga ṭanpui ngaite chu hlim takin an ṭanpui tûr a ni. (2 Korinth 9:7) Paula chuan: “Bang lovin ṭawngṭai ula,” a ti. Pathian betute chu Jehova hnênah ṭawngṭaia an thinlung leihbaw tûra fuih an ni. (1 Thessalonika 5:17; 2 Thessalonika 3:1; Philippi 4:6, 7) Ṭawngṭainate Pathian ngaihthlâksak ni tûr chuan, rinna neih a ngai bawk.—Hebrai 11:6.

Engin nge chhûngkua chu hlawhtling tak ni tûra ṭanpui ang? Pasalte chuan an nupuite chu anmahni taksa ang chiahin an hmangaih tûr a ni a. Nupuite pawhin an pasalte chu an zah hle tûr a ni. Pathian lâwmzâwng a nih avângin, naupangte chuan an nu leh pate thu an âwih tûr a ni a. Nu leh pate chuan Pathian Thua kan hmuh thu bulte hmangin an fate chu hmangaihna nêna kaihruai a, an zirtîr a ngai a ni.—Ephesi 5:22–6:4; Kolossa 3:18-21.

Map of locations where Paul wrote letters

Pathian thiltum hre thiam tûra ṭanpuina. Mosia Dân zînga dân tam takte chuan Krista lo lan thlengin Israelte chu a vêngin, a kaihruai a. (Galatia 3:24) Amaherawhchu, Kristiante chuan Pathian be tûrin chu Dân chu an zawm a ngai lo. Hebrai Kristiante—tûn hmaa Juda sakhua lo vuan ṭhîn Kristiante—hnêna a lehkha ziakah, Paula chuan chu Dân awmzia leh Kristaa Pathian thiltum a thlen famkim dân chungchâng chu chiang lehzualin a hrilhfiah a ni. Chu Dân hnuaia ruahmanna awm tam takte chuan entîr lâwk a nei tih a hrilhfiah bawk. Entîr nân, rana inthâwina chuan sual ngaihdamna dik tak thlentu tûr inthâwina atâna Isua thihna chu a lo entîr lâwk a. (Hebrai 10:1-4) Isua thihna hmangin, Pathian chuan chu Dân thuthlung chu zawm a ngaih tawh loh avângin a tibo a ni.—Kolossa 2:13-17; Hebrai 8:13.

Kristian kohhran hmasa chuan Paula lehkha thawn chhiar a nih laiin an ngaithla

Kohhran inrêlbâwl dân tûr dik kawhhmuhna. Kohhrana mawhphurhna chelh inhuamte chuan nungchang ṭha tak an neiin, Bible-a târ lan tlin ngaite chu an tlin ngei tûr a ni. (1 Timothea 3:1-10, 12, 13; Tita 1:5-9) Pathian Jehova betute chu an Kristian unaute nên intichak tawn tûrin an inhmukhâwm ziah ṭhîn tûr a ni a. (Hebrai 10:24, 25) Tin, Pathian be tûra inkhâwmnate chu mi tichak thei tak leh zirtîr thei tak a ni tûr a ni bawk.—1 Korinth 14:26, 31.

Timothea hnêna a lehkha thawn pahnihna a ziak lai chuan, Paula chu Rom khuaah a tâng leh tawh a; rorêlna nghâkin a awm mêk a ni. Mi huaisen fâlte chauhvin an nun thâpin an tlawh a. Paula pawhin hun a nei tlêm hle tawh tih a hria a ni. Chuvâng chuan: “Intihsiakna ṭha chu ka bei zo tawh a, ka tlânsiakna kawng ka hlen tawh a, rinna chu ka vawng reng tawh a ni,” tiin a sawi. (2 Timothea 4:7) Chu mi hnu lawkah chuan Paula chu a rinna avânga tihhlum a nih ngei a rinawm. Mahse, tirhkoh Paula lehkha thawn ziakte chuan Pathian betu dikte chu tûn thlengin a kaihruai a ni.

—Rom; 1 leh 2 Korinth; Galatia; Ephesi; Philippi; Kolossa; 1 leh 2 Thessalonika; 1 leh 2 Timothea; Tita; Philemona; Hebrai a ṭanchhan.

THUTIAM THLAH CHU TUNGE NI?

Adama leh Evi’n thil sual an tih hnuah, Pathianin: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la thitling ang a, nangin a ke artui i la tithitling ang,” tia a sawi khân, entîr nei ṭawngkam a hmang a ni. (Genesis 3:15) Bible chuan Diabola chu “rûlpui tar” tiin a ko bawk a. (Thu Puan 12:9) Pathian tiam Thlah, a nih loh leh Chhan Chhuaktu nihna chu thurûk a ni a, Bible-in kum zabi tam tak chhûngin zawi zawiin a lai lang tial tial a ni.

Adama leh Evi’n thil sual an tih aṭanga kum 2,000 vêlah, Pathian Jehova chuan thutiam Thlah chu Abrahama chhuanah a lo lang dâwn tih a târ lang a. (Genesis 22:17, 18) Kum zabi tam tak a liam hnuah, tirhkoh Paula chuan chu Thlah bul ber chu Messia, Isua Krista a nihzia a rawn târ lang a ni. (Galatia 3:16) Genesis 3:15 nêna inremin, Isua chu tihhlum a nih khân, a “ke artui” chu tihthitlinsak a ni, a tih theih a. Amaherawhchu, Pathianin Isua chu kai thovin, ‘thlarauvah chuan a tinung’ a ni.—1 Petera 3:18.

Pathianin mi 1,44,000 pawh thlah zawmpuitute nihtîr a tum bawk a. (Galatia 3:29; Thu Puan 14:1) Anni pawh chu vân lam Lalrama Krista roluahpuitu ni tûrin thlarauva kaih thawh an ni bawk.—Rom 8:16, 17.

Vâna Lal ropui tak a nih angin, Isua chuan Diabola leh a thlah—mi suaksualte leh Setana hnungzuitu ramhuaihote—chu a tiboral thuai ang. (Johana 8:44; Ephesi 6:12) Isua rorêlna chuan thu âwih mihring zawng zawngte hnênah muanna leh hlimna a thlen ang a. Chutiang chuan, ani chuan rûl chu a ‘lû tithitlingin’ a tiboral ang.—Hebrai 2:14.