Engvângin Nge Bible Kan Bih Chian Ang?
Bible i hre bel em? He lehkhabu danglam bîk tak hi lehkhabu azawnga sem chhuah hnem ber a ni a. Hnam tinrêngte chuan Bible thuchah kente chu thlamuantu ber leh beiseina hnâr a nih bâkah, a thurâwn pêkte chu nî tin nun atân a ṭangkai hle tih an hmu chhuak a ni. Mahse, tûn laia mi tam takte hian Bible chungchâng an hre tlêm hle. Sakhaw mi i ni emaw, ni lo emaw pawh ni se, Bible chungchâng hriat i châk riau pawh a ni thei. He brochure hi Bible chhûnga thu awmte a tlângpui thua i hriat theih nâna siam a ni.
BIBLE keuva i chhiar ṭan hmain, a chungchâng thil ṭhenkhat hriat chu a ṭangkai a ni. Pathian Lehkhabu Thianghlim tia hriat bawk Bible hi lehkhabu, a nih loh leh ṭhen hrang 66 awmna a ni a, Genesis aṭanga inṭanin, Thu Puan bu-ah a tâwp a ni.
Bible hi tu ziak nge ni? Hei hi zawhna rilru la tak a ni. A nihna takah chuan, Bible hi mi 40 vêlin kum 1,600 chhûng vêl zet an ziak a. Amaherawhchu, chhinchhiah tlâk takin chûng mite chu Bible ziaktu niin an inchhâl tlat lo. A ziaktute zînga pakhat chuan heti hian a ziak a ni: “Pathian Lehkha Thu zawng zawng hi Pathian thâwk khuma pêk a ni,” tiin. (2 Timothea 3:16) A ziaktu dang leh thung chuan: “LALPA thlarau chuan keimah mi hmangin a sawi a: a thu chu ka leiah a awm,” tiin a ziak a ni. (2 Samuela 23:2) Chutiang chuan a ziaktute chuan lei leh vâna Rorêltu Chungnung Ber Pathian Jehova chu Bible Ziaktu niin an sawi. Pathianin mihringte’n amah hnaih se a duh tih Bible ziaktute chuan an târ lang.
Bible hriat thiam nân thil pawimawh dang a la awm a. Bible hian thupui pakhat a nei a: chu chu Pathianin a vân lam Lalram hmanga mihringte chunga rorêl tûra dikna a neih thiam chantîr hi a ni. He thupui hi Genesis aṭanga Thu Puan thlenga Bible chhûng zawng zawnga a awm vek dân chu kan la hmu chho zêl ang.
Kan sawi tâkte rilrua vawng rengin, khawvêla lehkhabu lâr ber, Bible chhûnga thu awmte chu ilo ngaihtuah ang u.
[Phêk 3-naa bâwm]
BIBLE CHUNGCHANGA THIL HRIAT NGAITE
◼ B.C.E. 1513 aṭanga C.E. 98 thleng, kum 1,610 aia tam ziak a ni.a
◼ Hebrai ṭawnga ziak deuh ber leh a ṭhen lai Aramik ṭawnga ziak a hmasa lam bu 39-te chu Hebrai Pathian Lehkha Thu, a nih loh leh “Thuthlung Hlui” tia hriat a ni.
◼ Grik ṭawnga ziak a hnuhnûng lam bu 27-te chu Kristian Grik Pathian Lehkha Thu, a nih loh leh “Thuthlung Thar” tia hriat a ni.
◼ Bible chu bung leh chângte neia ṭhen hran a ni a. Entîr nân, Matthaia 6:9, 10 tih chu Matthaia lehkhabu bung 6-na, châng 9 leh 10 tihna a ni.
[Footnote]
a Hun leh nîte hi kawng chi hrang hranga târ lan theih a ni a. He brochure-ah hian C.E. tih chu “Common Era,” a nih loh leh “Vântlâng Kum Chhiar” atâna hman a ni a; B.C.E. tih erawh chu “Before the Common Era,” a nih loh leh “Vântlâng Kum Chhiar Hma” tih atâna hman a ni thung. Chu chu he lehkhabu phêk hnuai lama lang hun kal zêla thilthlengte târ lannaah (time line-ah) i hmu thei ang.