He Khawvel Hian Khawi Lam Nge A Pan?

Khawvêl pumah hian harsatna khirhkhân tak takte leh thilthleng râpthlâk tak takte chu nî tin chanchin thar a lo ni ta. Hêngte hian eng nge a târ lan?

MI MAL HIMNA: Dâwrhmunah bomb a puak. Zirtîrtute leh zirlaite school-ah an kâp hlum. Nu leh pate’n an hawisan lawk hlânin an fa sênte rûk bo an ni. Hmeichhiate leh putarte chhûn pachangah suam an ni.

SAKHAW DINHMUN: Sakhuain indo pâwlte a thlâwp. Sakhaw hruaitute chu hnam insâmnaah mawhphurtua puh an ni. Sakhaw hruaitute’n naupang an khawih chingpen; kohhranin a thuppui tlat. Inkhâwm an tlêm telh telh; biak inte hralh a ni.

LEILUNG LEH A CHHEHVEL: Ramngawte chu sumdâwnna lam thil atâna ṭhiah a ni. Retheite’n ei rawngbâwl nân ramhnuai thing an kit rêm zo. Lei hnuai tuite a bawlhhlawh, a in tlâk loh. Thil siamna aṭanga bawlhhlawh paihte leh tûn lai sangha man dân changkâng takte avângin sangha mana ei zawnna a tluchhia. Boruak bawlhhlawhin thaw a tiipik.

EI LEH IN ZAWNNA LAM: Asia ram tam taka mite kum khat hlawh chu a tlêm hle. Company hotute duhâmna avângin sumdâwnna a tluchhia, mi sâng tam tak kutruakin a awmtîr. Bumna avângin dam chhûng sum khâwl an chân.

EI LEH BAR TLAKCHHAMNA: Khawvêl puma mi 800,000,000 vêl chu zan tin rilṭâmin an mu.

INDONA: Indona avângin kum zabi 20-na chhûngin mi 100,000,000 chuangin an nun an chân. Khawvêl mihring zawng zawng vawi tam tak tihboralna khawp nuclear râlthuam chhêkkhâwm a ni. Tualchhûng indona. Firfiaka chêtna (Terrorism) hian khawvêl pum pui a fan chhuak.

HRI LENG LEH NATNA DANGTE Kum 1918 aṭangin, Spanish flu chuan mi 21,000,000-te nun a la tawh. AIDS chu “mihring chanchina natna hlauhawm ber” a lo ni ta. Cancer leh lung natnain khawvêl pum lungngaihna a thlen.

Hêng chanchin tharte zînga pakhat chauh hi bulfûk suh. Chûng chu vawikhat chauh thlenga tâwp leh mai a ni em? Nge, awmze pawimawh tak nei khawvêla thilthleng rengte zînga mi zâwk?

[Phêk 5-naa bâwm/milem]

Pathianin Min Ngaihsak Tak Zet Em?

Thilthleng râpthlâk tak takte emaw, chânna nasa takte emaw avânga an lungngaih hian, mi tam tak chuan chutiang thilte thlentîr lo tûra Pathian a inrawlh loh chhan an zâwt ṭhîn.

Pathianin min ngaihsak tak zet a ni. Ani chuan kaihhruaina rin tlâk leh tûna rilru hahdamna dik tak min pe a. (Matthaia 11:​28-30; 2 Timothea 3:​16, 17) Tharum thawhna te, natna te, leh thihna te tihbo hlen nân ruahmanna a lo siam tawh a ni. A ruahmanna siam chuan hnam chi khat chauh ni lo, hnam tin, chi tin, leh ṭawng tinte a ngaihsak vekzia a târ lang.​—⁠Tirhkohte 10:​34, 35.

Eng ang takin nge kan ngaihsak? Lei leh vân Siamtu hi tunge a nih i hria em? A hming eng nge ni? A thiltum eng nge ni? Ani chuan hêng zawhnate hi Bible-ah a chhâng vek a. Tharum thawhna leh natna leh thihna te tihbo vek nâna a hma lâk dânte pawh min hrilh a ni. Mahse, chu mi hlâwkpui tûr chuan eng nge kan tih ngai? Amah leh a thiltum chungchâng chu kan zir a ngai a ni. Amah kan rinzia kan lantîr zet loh chuan engtin nge a ruahmanna siamte chu kan hlâwkpui theih ang? (Johana 3:16; Hebrai 11:⁠6) Chu bâkah, a thil phûtte pawh kan zawm a ngai bawk a ni. (1 Johana 5:⁠3) Chutianga ti tûr khawpin Pathian chu i ngaihsak tâwk em?

Pathianin tûn lai khawvêl dinhmun hi a awm zui zêl a phal chhan hre thiam tûr chuan, thu buai pawimawh tak pakhat kan hriat thiam a ngai a ni. Chu chu Bible-in a hrilhfiah a. He brochure phêk 15-naah hian, chu thu buai chu târ lan a ni.