Thilthleng Tawhte Aṭanga Vaukhânna

Jehova chuan mi suaksualte’n Paradis an tihchhiat a phal lo vang. Chutah chuan a ṭhiante chauh an khawsa ang. Mi suaksualte chungah eng nge lo thleng dâwn? A chhânna hriat nân, Nova chunga thilthleng dik tak hi ngaihtuah rawh. Nova chu kum sâng engemaw zât liam taa mi a ni a. Jehova duhzâwng tih tum hrâm hrâmtu mi ṭha tak a ni. Mahse, leia mi dangte chuan thil sual an ti a. Chuvângin, Jehova chuan mi suaksual zawng zawng tihboral nân tui a lêttîr dâwn tih Nova a hrilh a ni. A hnênah chuan Tuilêt huna amah leh a chhûngte an boral loh nâna lawng tuk tûrin a hrilh a ni.​—⁠Genesis 6:​9-18.

Nova leh a chhûngte chuan lawng an tuk a. Nova chuan Tuilêt a lo thlen tûr thu mite chu a hrilh a; mahse, an ngaithla duh tlat lo. Thil sual an la tihzawm zêl zâwk a ni. Lawng an tuk zawh hnu chuan, Nova’n ramsate leh a chhûngte chu lawng chhûngah a hruai lût a. Tichuan Jehova’n thlipui na tak a tlehtîr ta a ni. Ni 40 leh zân 40 chhûng ruah a sûr a. Tui chuan lei pum pui chu a chîm vek a ni.​—⁠Genesis 7:​7-12.

Mi suaksualte chu boral mah se, Nova leh a chhûngte chu an him a. Jehova chuan Tuilêt ata mi suaksual awm lohna leiah anni chu him takin a hruai a ni. (Genesis 7:​22, 23) Bible chuan thil dik ti duh lote Jehova’n a tihboral leh hun a lo thleng ṭêp tawh tih a sawi a. Mahse, Pathian mite chu tihboral an ni ve lo vang. Lei Paradis-ah chuan chatuanin an nung zâwk ang.​—⁠2 Petera 2:​5, 6, 9.

Tûn laiah mi tam takte’n thil sual an ti a. Khawvêl hi buaina hlîrin a khat tlat a ni. Jehova chuan a Thuhretute chu mite vaukhân tûrin a tîrnawn fo va; mahse, a tam zâwk chuan Jehova thu chu an ngaithla duh chuang lo. An nun kawngte chu an thlâk duh lo va. Pathianin a ṭha leh ṭha lo a tihte chu an pawm duh lo a ni. Chûng mite chungah chuan eng thil nge lo thleng dâwn? Engtik nîah emaw an inthlâkthleng ang em? A tam zâwk chu an inthlâkthleng ngai lo vang. Mi suaksualte tihboral hun chu a lo thleng ang a, an nung leh ngai tawh lo vang.​—⁠Sâm 92:⁠7.

Lei hi tihchhiat a ni lo vang a; Paradis-a siam a ni zâwk ang. Pathian ṭhian lo ni tate chu lei Paradis-ah chatuanin an nung ang.​—⁠Sâm 37:⁠29.