Pathian Ṭhiante Chu Paradis-ah An Chêng Ang

Paradis chu tûna kan chênna khawvêl ang hi a ni lo vang. Pathianin leilung hi buaina leh lungngaihna, natna leh hrehawm tawrhna tea a khah tlat chu a duh ngai lo. Pathian chuan nakinah he leilung hi paradis-ah a la siam dâwn a ni. Paradis chu eng ang nge ni ang? Bible sawi dân hi lo en ta ila:

Mi ṭhate. Paradis chu Pathian ṭhiante chênna in a la ni ang. Chuta chêngte chu thil ṭha an intihsak tawn ang a. Pathian kawng felte milin an nung ang.​—⁠Thufingte 2:21.

Ei tûr hnianghnâr tak. Paradis-ah chuan ṭâm a awm lo vang. Bible chuan: “Leiah . . . hian, buh [a nih loh leh, ei tûr] tam tak a awm ang,” a ti.​—⁠Sâm 72:16.

In ṭhate leh hna hlimawm tak. Lei Paradis-ah chuan chhûngkaw tinte’n mahni in an nei ṭheuh tawh ang a. Mi zawng zawngin hlimna tak tak thlentu hna an thawk tawh bawk ang.​—⁠Isaia 65:​21-23.

Khawvêl pum huap remna. Mite chu an insual ngai tawh lo vang a, indonaa thi an awm tawh hek lo vang. Pathian Thu chuan: “[Pathian] chuan indonate chu . . . a tireh ṭhîn,” a ti.​—⁠Sâm 46:​8, 9.

Hrisêlna ṭha. Bible chuan: “Chu mi khuaa [Paradis-a] awm chuan ‘Ka dam lo ve,’ a ti lo vang,” tih min tiam a ni. (Isaia 33:24) Tin, ke bai emaw, mitdel emaw, bengngawng emaw, ṭawngthei lo emaw an awm lo vang.​—⁠Isaia 35:​5, 6.

Natna te, lungngaihna te, thihna te a tâwp. Pathian Thu chuan: “Thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” a ti a ni.​—⁠Thu Puan 21:⁠4.

Mi suaksualte an boral ang. Jehova chuan: “Mi suaksualte . . . chu leilung ata tihboral an ni ang a, vervêk taka titute chu tihboral phiar an ni ang,” tih min tiam a ni.​—⁠Thufingte 2:22.