Isuan Biak In A Thianfai

HETAH hian Isua a thinrim hmel hie mai, a ni lawm ni? Engvanginnge chuti taka a thinrim i hria em? Heng Jerusalem-a Pathian biak ina mite hi an duham em em vang a ni. Heta Pathian be tura lo kal mite hnen atangin tangka tam tak lak an tum a ni.

Sawng bawng tuaite leh beramte leh thurote zawng zawng saw i hmu em? Sawng rante saw hetah biak inah hian mite chuan an zuar a. A chhan i hria em? Israel-mite chuan Pathian hnena inthawina turin ran leh sava te an mamawh vang a ni.

Pathian dan chuan Israel-miin a tih dik loh chuan, Pathian hnenah thilhlan a siam tur a ni a ti a. Tin Israel-miten thilhlan an siamna tur hun dang a awm bawk. A nih Israel-miin Pathian hnena hlan tur savate leh rante khawia mi nge an hmuh ang?

Israel-mi thenkhatte chuan mahni savate leh rante an nei a. ‘Tichuan chung chu an hlan thei. Mahse Israel-mite tam takin rante emaw savate emaw an nei lo va. Thenkhat chu Jerusalem atanga hla deuhvah an cheng a, an rante pakhat mah biak inah an rawn kalpui thei lo va. Chuvangin mite chu hetah an lo kal a, an mamawh ran emaw sava emaw chu an lei a. Mahse heng mite hian an chhiar tam lutuk a. Mite an tihder a ni. Chu bakah, hetah Pathian biak in ngeiah hian an zuar tur a ni bawk lo.

Isua tithinrimtu chu hei hi a ni. Chuvangin an dawhkante chu tangka chawpin a nam thlu a, an pawisate a theh darh a. Hruiin vuakna a siam bawk a, biak in atangin ran zawng zawng a hnawtchhuak a. ‘Heta tang hian chhuahpui rawh u. Ka Pa in chu sumdawnna inah siam suh u,’ tiin thuro zuartute chu thu a pe a.

Isua zuitute thenkhat hetah Jerusalem-a biak inah hian an awm a. Isuan a tih an hmuh chuan mak an ti a. Tin Bible-a: ‘Pathian in hmangaihnain amah chu mei angin a kang ang,’ tih Bible-in Pathian Fapa chanchin a sawina lai an hre ta reng a.

Heta Jerusalem-a Kalhlen Kut hmanga Isua a awm chhungin, thilmak tam tak a ti a. A hnuah, Isuan Judai ram a chhuahsan a, Galili-ah a kir leh a. Mahse kawngah Samaria ram a kal tlang a. Chutah chuan enge lo ni i en ang u.