Ṭhian Der

I telrâwl lain “ṭhian” pakhat i chhar a. Ani chuan puitling chho tûr leh i rualpuite zînga leng thei tûrin a ṭanpui che niin a lang. Rilru hahna i neih hunah pawh “hahdamna” engemaw chen i neih theih nân amah chu i pan ṭhîn a. Dik tak chuan, dinhmun tam takah ani chu i rinchhan ta a ni.

Mahse, a hnuah, a ṭhat lohnate i hmu chhuak ta a. Amah nêna awm dun i duh lohna hmun ṭhenkhatah pawh awm dûn reng tûrin a phût che a ni. Chu bâkah, amah i kawm avânga puitling lehzual nia i inhriat laiin, i hrisêlnain a tawrh phah a. Chu mai bâkah, i hlawh ṭhenkhat pawh a rûksak che a ni.

Tûn hnai mai khân, in inlaichînna chu tihtâwp i tum a; mahse, ani chuan a duh tlat lo. Kawng danga sawi chuan ani chu nangmah thununtu a lo ni ta a. Amah i kawm ṭhin avângin i inchhîr hle a ni.

CHU chu meizial zutu tam takte leh cigarette zial inkâra inlaichînna a ni. Earline-i chuan kum 50 chhûng zet meizial a zûk hnuah: “Cigarette zial chuan ka bula awmte aiin min ṭanpui thei lehzual a. Ṭhian hlui pakhat aiin a ṭha zâwk a, a châng chuan ka ṭhian neih chhun a ni,” tiin a sawi. Mahse, Earline-i’n a hriat chhuah angin, cigarette zial chu ṭhian der leh a nun atâna hlauhawm tak tih a ni. Dik tak chuan, a tîr lama kan târ lante chu Earline-i chungchâng a ni the a; mahse, thil inan lohna pakhat a awm a ni. Meizial zûk chu Pathian pêk kan taksa tibawlhhlawhtu a nih avângin Pathian mit hmuhah thilsual a ni tih a hriat chuan a zial zûk chu a bânsan ta a ni.—2 Korinth 7:1.

Frank-a chuan Pathian tihlâwm a duh avângin a meizial zûk chu bânsan a tum bawk. Mahse, meizial a zûk hnuhnûng ber nîah chuan, zial bung hlui chhuat kâr awnga tla chu bawkvâka kalin in hnuaiah a zawng a. Frank-a chuan, “Chutih lai tak chuan thu tlûkna ka siam ta a ni. Bawlhhlawh kâra ka zial zûk bung hlui bawkvâka ka zawnna chuan min tibeidawn hle a. Engtikah mah zial chu ka zu leh ngai tawh lo vang,” tiin a sawi.

Engvângin nge zial nghei chu a harsat êm êm? Zir chîk mite chuan a chhan tam tak an hmu chhuak a ni: (1) Vaihlo aṭanga thil siam chhuahte chu ruihhlo hman dik lohna anga ngawl vei theih a ni. (2) Nicotine hîp luh chuan second sarih chhûng lekin thluakah a fan thei a. (3) Meizial zûkna chu ei leh innaah te, titîhonaah te, rilru hahna tihziaawmnaah te, leh thiltih ṭhin dangte nêna inkûngkhaihin mi pakhat nunah thil pawimawh tak a ni ṭhîn a ni.

Ni e, Earline-i leh Frank-a te sawi angin, he chhiatna min thlen theihtu hi bânsan theih a ni. Melzial zu i nih a, bânsan i duh chuan a dawta thuziak i chhiar aṭangin nun dân thar i ṭan thei ngei ang.