JOHANA LEHKHATHAWN PAHNIHNA

1 Kei kum upa tawh tak hian Pathian thlan hmeichhia leh a fate tân he lehkhathawn hi ka ziak a ni; ka hmangaih tak zet che u a, kei chauh ni lovin thutak hretu zawng zawngte pawhin an hmangaih che u a ni. 2 Thutak chu keimahniah a awm reng a, chatuanin kan hnênah a awm reng bawk ang. 3 Pa, Pathian leh a Fapa Isua Krista hnên aṭanga khawngaihna nasa tak te, zahngaihna te leh, thlamuannate* chu thutak leh hmangaihna nên kan hnênah a awm ang.

4 Pa hnên aṭanga thupêk kan dawn angin, i fate zînga ṭhenkhatin thutak kawng an zawh tih ka hriat avângin ka lâwm hle a ni. 5 Chuvângin, nang hmeichhia, kan inhmangaih tawn theih nân tûnah hian ka ngên a che. (Thupêk thar ni lovin, a tîr aṭanga kan neih sa kha i hnênah ka ziak a ni.) 6 Hei hi hmangaihna chu a ni, a thupêk anga kan nun zawm zêl hi. Hei hi a tîr aṭanga in hriat thupêk chu a ni: hmangaihna lantîr reng rawh u, tih hi. 7 Isua Krista chu tisain a lo kal tih pawm lotu, bumtu tam tak khawvêlah hian an lo chhuak ta si a. Chûng mite chu bumtu leh Krista dodâltu an ni.

8 Kan thawh chhuah sate chân lo va, a kima lâwmman in dawn theihna tûrin fîmkhur rawh u. 9 Tu pawh Krista zirtîrna pêla kal leh chumia awm reng lo chuan Pathian pawm a hlawh lo va. Chu zirtîrnaa awm reng erawh chuan Pa leh Fapa pawm a hlawh a ni. 10 Tu pawh in hnênah lo kalin, Krista zirtîrna nêna inmil lo a zirtîr chuan, in inah thlentîr lo ula, chibai pawh bûk hek suh u. 11 Chibai bûktu chuan a thil sual tihte a ṭâwmpui ve si a.

12 In hnênah sawi tûr tam tak nei mah ila, lehkha leh lehkhatuia ziah ka duh lo; chu aiin, in lâwm a kim theih nân in hnêna lo kal a, hmaichhana biak che u ka beisei zâwk a ni.

13 Pathianin a thlan, i unaunu fate hian chibai an bûk a che.