JOHANA LEHKHATHAWN PAKHATNA

1 Nunna thu rawn thlentu, a tîra awma kha a chanchin in hnênah kan ziak a ni; a thusawite kan hria a, kan mitin kan hmu a, ngun takin kan en a, kan kutin kan khawih a, 2 (chu nunna chu tih lan a ni a, chu chu kan hmu a, a chungchâng kan hriattîr a, Pa hnêna awm leh kan hnêna tih lan chatuana nunna chu kan hriattîr bawk a che u), 3 Pa leh a Fapa Isua Krista nêna kan inzawm anga nangni pawhin min zawm ve theihna tûrin kan thil hmuh leh hriatte kha kan hrilh che u a ni. 4 Tin, kan lâwm a kim theih nân chûngte chu kan ziak a nih hi.

5 Hei hi Isua hnên aṭanga kan hriat leh in hnêna kan puan chhuah thuchah chu a ni: Pathian chu êng a ni a, amahah chuan thimna rêng rêng a awm lo tih hi. 6 “Amah nên kan inzawm,” ti chung sia thima kan la kal* reng a nih chuan, dâwt kan sawi tihna a ni a, thutak kan nunpui lo tihna a ni. 7 Nimahsela, Pathian chu ênga a awm anga ênga kan kal* chuan kan inzawm tawn tihna a ni a, a Fapa Isua thisen chuan kan sual zawng zawng min tlen faisak ṭhîn.

8 “Sual kan nei lo,” kan tih chuan mahni kan inbum a, thutak keimahniah a awm lo tihna a ni. 9 Kan sualte kan puan chuan, kan sualte ngaidam tûr leh kan fel lohna zawng zawng lak aṭanga min tlêng fai tûrin Pathian chu a rinawmin a fel a ni. 10 “Thil sual kan ti lo,” kan tih chuan ani chu dawtheiah kan chantîr a, a thu chu keimahniah a awm lo tihna a ni.

2 Ka fa duh takte u, thil sual in tih lohna tûrin hêng thute hi in hnênah ka ziak a nih hi. Nimahsela, tu pawhin thil sual a tih chuan, Pa hnêna awm min ṭanpuitu mi fel Isua Krista chu kan nei a ni. 2 Ani chu kan sualte atâna inthawina* a ni a, kan sualte atân chauh ni lovin, khawvêl puma mite sual atâna inthawina pawh a ni. 3 Tin, a thupêkte kan zawm zêl chuan, chu chu amah kan hria tih târ langtu a ni ang. 4 “Amah ka hria,” tia a thupêkte zâwm leh si lo chu dawthei a ni a, amahah chuan thutak a awm lo. 5 Nimahsela, tu pawhin a thu a zawm chuan, amahah Pathian hmangaihna chu tih famkimin a awm tak zet tawh a ni. Keini pawhin a thu kan zawm chuan amah nên kan inpumkhat tih kan târ lang ang. 6 Amah nên inpumkhatin ka awm reng titu chu Isua nun dân angin a nung zêl tûr a ni.*

7 Duh takte u, thupêk thar in hnênah ka ziak lo va, thupêk hlui, a tîr aṭanga in neih sa kha ka ziak zâwk a ni. Chu thupêk hlui chu in thu hriat tawh hnu kha a ni e. 8 Nimahsela, thupêk thar angin in hnênah ka ziak a ni, amah leh nangni pawhin in zawm kha, thim chu a bo mêk avâng leh êng dik tak a lo ên tâk avângin.

9 Enga awm anga insawi a, a unau haw si chu thimah a la awm reng a ni. 10 A unau hmangaihtu chu êngah a awm reng a, eng mahin a ti tlu lo vang.* 11 Nimahsela, a unau hawtu chu thimah a awm a, thimah a kal bawk a ni; thimin a mit a tih del tawh avângin a kalna pawh a hre lo.

12 Ka fa duh takte u, a hming avânga in sualte ngaihdam a nih tâk avângin in hnênah ka ziak a nih hi. 13 Pate u, a tîr aṭanga awma kha in hriat tâk avângin in hnênah ka ziak a nih hi. Tlangvâlte u, Setana* chu in hneh tâk avângin in hnênah ka ziak a nih hi. Naupangte u, Pa chu in hriat tâk avângin in hnênah ka ziak a nih hi. 14 Pate u, a tîr aṭanga awma kha in hriat tâk avângin in hnênah ka ziak a nih hi. Tlangvâlte u, in chak a, Pathian thu nangmahniah a awm reng a, Setana* chu in hneh tâk avângin in hnênah ka ziak a nih hi.

15 Khawvêl hi hmangaih suh ula, khawvêla thil awmte pawh hi hmangaih hek suh u. Tu pawhin khawvêl hi a hmangaih chuan, Pa a hmangaihna amahah a awm lo; 16 khawvêla thil awm zawng zawng, tisa châkna te, mit châkna te, mahni thil neih chapopuinate hi Pa aṭanga chhuak a ni lo va, khawvêl aṭanga chhuak a ni zâwk si a. 17 Chu bâkah, khawvêl hi a châknate chawpin a boral mêk a ni; Pathian duh zâwng titu erawh chu chatuanin a awm reng ang.

18 Fa duh takte u, tûn hi hun hnuhnûng* chu a ni; Krista dodâltu a lo chhuak dâwn tih in hriat ang khân, tûnah pawh Krista dodâltu tam tak an lo chhuak tawh, chu thu dik aṭang chuan tûn hi hun hnuhnûng a ni tih kan hria. 19 Anni chu kan zînga mi an ni ṭhîn a; mahse, keimahni ang an nih loh avângin min chhuahsan ta; keimahni ang ni sela chuan kan hnênah an awm reng ang. Nimahsela, an vaiin keimahni ang an ni lo tih a lanna tûrin an kal chhuak ta a ni. 20 Nangni erawh chu mi thianghlima’n hriak a thih che u a, in vaiin hriatna in nei a ni. 21 Thutak in hriat loh avânga in hnêna ziak ka ni lo va, thutak in hriat avâng leh thutak aṭanga dâwt a chhuah ngai loh avânga ziak ka ni zâwk e.

22 Dawthei chu tu nge ni? Isua chu Krista a ni tih pawm lotu a ni lo vem ni? Ani chu Krista dodâltu, Pa leh Fapa pawm lotu chu a ni. 23 Tu pawh Fapa pawm lo chuan Pa pawh a pawm lo. Nimahsela, tu pawh Fapa pawmtu chuan Pa pawh a pawm a ni. 24 Nangni zawng, a tîr aṭanga in hriat kha nangmahniah a awm reng tûr a ni. A tîr aṭanga in hriat kha nangmahnia a awm reng chuan, Fapa nên pumkhat in ni reng ang a, Pa nên pawh pumkhat in ni reng bawk ang. 25 Chu bâkah, hei hi amah ngeiin min tiam kha a ni—chatuana nunna hi.

26 Mi ṭhenkhatin hruai bo che u an tum avângin hêng thute hi in hnênah ka ziak a ni. 27 Nangni zawng, Pathianin a thlarauvin hriak a thih che u a, chu thlarau chu nangmahniah a awm reng a, tu ma zirtîr in ngai lo ve; hriak a thihna che u thlarau chuan thil engkim a zirtîr che u a, chu chu a dik a, dâwt a ni lo. A zirtîr ang che u khân, amah nên pumkhat ni reng rawh u. 28 Chutichuan, fa duh takte u, amah nên inpumkhatin awm reng rawh u; tichuan, tih lan a nih hunah zalên taka thusawi theihna kan nei ang a, a lo awm leh hunah a lak aṭanga zak taka hnung tawlhin kan awm lo vang. 29 Ani chu a fel tih in hriat chuan, thil fel titu apiang chu a lak aṭanga piang a ni tih in hre bawk e.

3 Pain kan chunga a lantîr hmangaihna ropuizia hi ngaihtuah rawh u! Ani chuan a fate tiin min ko va, a fate* kan ni rêng a ni. Chuvângin, khawvêlin min hre lo, Pathian an hriat loh avângin. 2 Duh takte u, tûnah hian Pathian fate ni mah ila, eng ang nge kan la nih dâwn tih erawh tih lan a la ni lo. Tih lan a nih hunah chuan a nihna ang taka kan hmuh dâwn avângin amah ang kan ni ang tih kan hria. 3 Ani chu a thianghlim angin, tu pawh ama chunga chu beiseina neitu apiang chuan mahni a inti thianghlim ṭhîn.

4 Tu pawh thil sual titu chuan dân a bawhchhe thîn, sual chu dân bawhchhiatna a ni si a. 5 Isua chu kan sualte la bo tûra tih lanin a awm tawh tih in hria e, amahah chuan sualna eng mah a awm lo. 6 Tu pawh amah nêna inpumkhata awm reng chuan thil sual a ti ngai lo; thil sual ti ṭhîn tu mahin ani chu an hmu lo va, hriat pawh an hre hek lo. 7 Fa duh takte u, tu ma bumin awm suh u; ani chu a fel angin, felna ti ṭhîntu chu a fel a ni. 8 Thil sual ti ṭhîntu chu Diabola aṭanga chhuak a ni, Diabola chuan a tîr aṭangin* thil sual a ti si a. Chuvângin, Pathian Fapa chu Diabola hnathawhte ti boral tûrin a lo kal a ni.

9 Tu pawh Pathian lak aṭanga piang chuan thil sual an ti ngai lo, anmahniah chuan Pathian thlarau a awm reng si a,* Pathian lak aṭanga piang an nih avângin thil sual an ti thei lo. 10 Hemiah hian Pathian fate leh Diabola fate chu kan hre thei a ni: Tu pawh felna ti lotu chu Pathian aṭanga chhuak a ni lo va, a unau hmangaih lotu pawh Pathian aṭanga chhuak a ni hek lo. 11 Hei hi a tîr aṭanga kan thuchah hriat kha a ni si a, kan inhmangaih tawn tûr a ni, tih hi; 12 Setana* aṭanga chhuak leh a unaupa thattu Kaina ang kan ni tûr a ni lo. Engvângin nge a unaupa a thah? A thil tihte a sual a, a unaupa thil tihte a fel vâng a ni.

13 Unaute u, khawvêlin a hua che u hi mak ti suh u. 14 Thi ang mai kan ni a, unaute kan hmangaih avângin tûnah chuan kan nung ta tih kan hria. Tu pawh hmangaihna nei lo chu thihnaah a awm reng a ni. 15 Tu pawh a unau hua chu tualthattu a ni, tualthattu tu mahin chatuana nunna an nei lo vang tih in hria e. 16 Kan tâna a nun hlântu avângin hmangaihna kan hria; chuvângin, keini pawh kan unaute tân kan nun hlan kan inhuam ve tûr a ni. 17 Nimahsela, tu pawhin tisa lam thilte neiin a unau tlachhamin hmu se, khawngaih duh si lo sela, engtin nge Pathian a hmangaihna chu amahah a awm reng theih ang? 18 Fa duh takte u, ṭawngkam chauhvin kan inhmangaih tûr a ni lo va, thil tih leh tih tak zetin kan inhmangaih zâwk tûr a ni.

19 Chutiang chuan, thutak aṭanga chhuak kan ni tih kan hria ang a, Pathianin min hmangaih tih kan ring nghet tlat bawk ang. 20 Thil ṭhenkhatah kan thinlungin thiam loh min chantîr mah se, Pathian chu kan thinlung aiin a ropui zâwk tih leh engkim a hria tih i hre reng ang u. 21 Duh takte u, kan thinlungin thiam loh min chantîr loh chuan Pathian hnênah zalên taka thusawi theihna kan nei a ni. 22 Tin, a thupêkte kan zawm a, a mit hmuha thil lâwmawmte kan tih ṭhin avângin a hnêna kan dîl apiang kan dawng ṭhîn. 23 Hei hi a thupêk chu a ni: a Fapa Isua Krista hming kan rin a, ama’n* thu min pêk anga kan inhmangaih tawn hi. 24 Chu bâkah, Pathian thupêkte zâwmtu chu Pathian nên inpumkhatin a awm reng a, Pathian pawh chutiang mi nên chuan inpumkhatin a awm reng bawk. A thlarau min pêkah hian Pathian chu keimahni nên inpumkhatin a awm reng tih kan hria a ni.

4 Unau duh takte u, Pathian hnên aṭanga chhuak anga sawi zirtîrna* zawng zawng chu ring vek lo ula, chûng zirtîrnate chu Pathian hnên aṭanga chhuak a nih leh nih loh fiah zâwk rawh u, khawvêlah hian zâwlnei der tam tak an awm si a.

2 Chûng zirtîrnate chu Pathian hnên aṭanga chhuak a nih leh nih loh in hriat theih dân tûr chu hei hi a ni: Isua Krista chu tisain a lo kal tih pawmtu zirtîrna apiang chu Pathian hnên aṭanga chhuak a ni a. 3 Nimahsela, Isua pawm lotu zirtîrna apiang chu Pathian hnên aṭanga chhuak a ni lo. Chu chu Krista dodâltu zirtîrna lo chhuak tûr in hriat kha a ni a, tûnah hian khawvêlah a awm tawh a ni.

4 Fa duh takte u, nangni chu Pathian aṭanga chhuak in ni a, zâwlnei derte chu in hneh tawh a ni; nangmahni nêna inpumkhata awma chu khawvêl nêna inpumkhata awma aia a ropui zâwk avângin. 5 Zâwlnei derte chu khawvêl aṭanga chhuak an ni a; chuvângin, khawvêl aṭanga chhuak thilte an sawi a, khawvêlin an thusawi chu a ngaithla ṭhîn. 6 Keini chu Pathian aṭanga chhuak kan ni. Tu pawh Pathian hria chuan kan thusawi an ngaithla ṭhîn a; tu pawh Pathian aṭanga chhuak lo chuan kan thusawi an ngaithla ngai lo. Chumi aṭang chuan zirtîrna dik leh zirtîrna dik lo kan hre hrang thei a ni.

7 Duh takte u, i inhmangaih tawn zêl ang u, hmangaihna hi Pathian aṭanga chhuak a ni si a; tu pawh mi dangte hmangaihtu chu Pathian lak aṭanga piang a ni a, ani chuan Pathian a hre bawk a ni. 8 Tu pawh mi dangte hmangaih lotu chuan Pathian a hre lo, Pathian chu hmangaihna a ni si a. 9 A Fapa mal neih chhun hmanga nunna kan neih theih nân Pathianin a Fapa chu khawvêlah a rawn tîr a, chutiang chuan kan chungah a hmangaihna tih lan a ni. 10 Pathian chuan kan sualte atâna inthawina* ni tûrin a Fapa chu a rawn tîr a, chu chu amah kan hmangaih vâng ni lovin, aman min hmangaih vâng zâwk a ni.

11 Duh takte u, chutiang khawpa Pathianin min hmangaih chuan keini pawh kan inhmangaih tawn tûr a ni. 12 Tu man eng lai mahin Pathian an hmu ngai lo. Kan inhmangaih tawn zêl chuan Pathian chu kan hnênah a awm reng ang a, a hmangaihna pawh kan zîngah tih famkimin a awm bawk ang. 13 A thlarau min pêk tawh avângin amah nên kan inpumkhat reng tih leh ani pawh keimahni nên inpumkhatin a awm reng tih kan hria. 14 Chu bâkah, Pain a Fapa chu khawvêl chhandamtu ni tûrin a rawn tîr tih keimahni ngeiin kan hmu tawh a, kan hriattîr bawk a ni. 15 Isua chu Pathian Fapa a ni tih pawmtu apiang chu Pathian nên inpumkhatin a awm reng a, Pathian pawh chutiang mi nên chuan inpumkhatin a awm reng bawk. 16 Tin, Pathian min hmangaihna chu kan hria a, kan ring bawk a ni.

Pathian chu hmangaihna a ni a, hmangaihnaa awm reng chu Pathian nên inpumkhatin an awm reng a, Pathian pawh chutiang mi nên chuan inpumkhatin a awm reng a ni. 17 Chutiang chuan, rorêlna nîa zalên taka thusawi theihna* kan neihna tûrin hmangaihna chu kan zîngah tih famkimin a awm ta; he khawvêlah hian Krista awm dân anga kan awm avângin. 18 Hmangaihnaah chuan hlauhna a awm lo va, hmangaihna famkim chuan hlauhna a ti bo zâwk ṭhîn, hlauhna chuan min khuahkhirh ṭhîn si a. A nihna takah chuan, hlauhna neitu chu hmangaihnaah tih famkimin a awm lo. 19 Pathianin min hmangaih hmasak avângin hmangaihna kan lantîr a ni.

20 Tu pawhin, “Pathian ka hmangaih,” tiin a unau haw si sela, ani chu mi dawthei a ni. A unau a hmuh renga mah a hmangaih si loh chuan, a hmuh ngai loh Pathian chu engtin nge a hmangaih theih tehlul ang? 21 A hnên aṭangin he thupêk hi kan hmu a ni: Tu pawh Pathian hmangaihtu chuan a unau pawh a hmangaih tûr a ni, tih hi.

5 Tu pawh Isua hi Krista a ni tih ringtu apiang chu Pathian lak aṭanga piang a ni a, tu pawh Pa hmangaihtu apiang chuan a fate pawh a hmangaih ṭhîn. 2 Pathian kan hmangaiha a thupêkte kan zawm hian, Pathian fate kan hmangaih tih kan hria. 3 Pathian hmangaih tih awmzia chu hei hi a ni, a thupêkte kan zawm hi; a thupêkte chu zawm harsa lutuk a ni lo, 4 Pathian lak aṭanga piang tawh phawt chuan khawvêl a hneh si a. Tin, khawvêl hneh tûra min ṭanpuitu chu kan rinna hi a ni.

5 Tuin nge khawvêl hneh thei? Isua hi Pathian Fapa a ni tih ringtu a ni lo vem ni? 6 Isua Krista chu tui leh thisena lo kala chu a ni; tui chauh ni lovin, tui leh thisenah a ni zâwk e. Chumi chungchâng chu thlarauvin a hriattîr a ni, thlarau chu thutak a ni si a. 7 Thu hriattîrtu chu pathum a awm: 8 thlarau leh tui leh thisente hi; chûng thil pathumte chuan thil thuhmun an hriattîr a ni.

9 Mihringte thu hriattîr mah kan pawm chuan, Pathian thu hriattîr chu a ropui zâwk a ni. Pathian thu hriattîr chu hei hi a ni, a Fapa chungchâng a hriattîr hi. 10 Pathian Fapa ringtu chuan Pathianin a hrilh chu a thinlungah a vawng a. Pathian ring lotu chu amah leh amah dawtheiah a insiam a ni, Pathianin a Fapa chungchâng a hriattîr chu a rin loh avângin. 11 Chu thu hriattîr chu hei hi a ni, Pathianin chatuana nunna min pe a, chu nunna chu a Fapaah a awm, tih hi. 12 Fapa neitu chuan chu nunna chu a nei a; Pathian Fapa nei lotu erawh chuan chu nunna chu a nei lo.

13 Nangni Pathian Fapa hming ringtute hian chatuana nunna in nei tih in hriat theih nân hêng thute hi in hnênah ka ziak a ni. 14 Hei hi ama lama inrintâwkna kan neih chu a ni, a duh zâwng nêna inmila kan dîl apiang ani’n min ngaihthlâksak ṭhîn, tih hi. 15 Kan dîl apiang min ngaihthlâksak ṭhîn tih kan hriat avângin, kan thil dîlte chu kan hmu ang tih kan hria, a hnênah kan dîl tawh si a.

16 Tu pawh a unauvin thihna khawp ni lo thil sual a ti lai a hmuh chuan a ṭawngṭaisak tûr a ni; tichuan, Pathianin thil sual titu chu nunna a pe ang. Thihna khawp ni lo thil sual titu mi dangte chungchângah pawh chutiang bawk chu a ni. Nimahsela, thihna khawp sual a awm a. Chutiang chî thil sual titute tâna ṭawngṭai tûr chuan tu mah ka ti lo. 17 Fel lohna zawng zawng hi sual a ni a; amaherawhchu, thihna khawp ni lo sual a awm.

18 Tu pawh Pathian lak aṭanga piang chuan thil sual a ti lo tih kan hria, Pathian lak aṭanga pianga* khân ani chu a vêng a, Setana’n* ani chu engtin mah a ti thei lo. 19 Pathian aṭanga chhuak kan ni tih kan hria; nimahsela, khawvêl pum pui hi Setana* thuneihna hnuaiah a awm a ni. 20 Amaherawhchu, Pathian Fapa chu a lo kal a, Pathian dik kan hriat theihna tûrin hriatthiamna min pe tih kan hria. A Fapa Isua Krista avângin Pathian dik nên chuan pumkhat kan ni. Ani chu Pathian dik a ni a, chatuana nunna pawh a ni. 21 Fa duh takte u, milem lakah inthiar fihlîm rawh u.*