HEBRAI MITE HNENA LEHKHATHAWN

1 Hmânah khân Pathianin kan pi leh pute kha zâwlneite hmangin hun hrang hrangah kawng tam takin a be ṭhîn a. 2 Hêng tâwpna nîahte hian ani chuan Fapa hmangin min bia a, Fapa chu thil engkim rochungtuah a ruat a, amah hmang chuan thil zawng zawng* a siam a ni. 3 Fapa chu Pathian ropuina lantîrtu leh a mizia ang chiah neitu a ni a, ani chuan a thu thiltihtheihna hmangin thil engkim a awmtîr a ni. Kan sualte a tlenfai hnuah hmun sâng taka awm, Pathian ropui taka ding lamah khian a han ṭhu ta a. 4 Vântirhkohte aia hming ṭha zâwk a rochun avângin, anni aiin nasa takin a ropui zâwk a ni.

5 Vântirhkoh dangte hnênah Pathianin: “Ka fapa i ni a, vawiinah hian i pa ka ni ta,” tiin emaw, “A pa ka ni ang a, ani chu ka fapa a ni ang,” tiin emaw a sawi ngai em ni? 6 Nimahsela, a Fa Tîr leia a rawn tirh leh hunah chuan: “Pathian vântirhkoh zawng zawngin ani chu bawkkhupin chibai bûk rawh se,” tiin a sawi ang.

7 Vântirhkohte chungchângah chuan: “Ani chuan a vântirhkohte chu thiltithei takah siamin,* a rawngbâwltute chu mei alhah a chantîr ṭhîn,” tiin a sawi a. 8 Fapa chungchângah erawh chuan heti hian a sawi thung: “Pathian chu chatuana i lalṭhutthlêng a ni a, i Lalram lal tiang chu dikna* lal tiang a ni. 9 Felna i ngaina a, dân bawhchhiatna erawh chu i huat kha. Chuvâng chuan, Pathian, i Pathian chuan i ṭhiante aia nasain lâwmna hriak a thih tâk che hi,” tiin. 10 Chu bâkah: “Aw Lalpa, a tîrin leilung nghahchhante i phûm a, vânte khi i kut chhuakte an ni a. 11 Chûngte chu an la boral ang a, nang erawh chu i awm reng ang; chûngte chu thawmhnaw angin an la hlui vek ang a, 12 puan angin lei leh vân chu i zial ang a, thawmhnaw angin a lo inthlâk tawh ang. Nang erawh chu i ngai reng a, i kumte pawh a tâwp ngai lo vang,” tiin a sawi bawk a ni.

13 Nimahsela, vântirhkoh dangte hnênah: “I hmêlmate ka rah behtîr* hma loh che chu ka ding lamah ṭhu rawh,” tiin a sawi ngai em ni? 14 Chûng zawng zawng chu rawngbâwlna thianghlim thawktu tûr thlarau, chhandamna rochungtu tûrte rawngbâwlsak tûra tirh chhuah an ni lo vem ni?

2 Chuvâng chuan, kan tawlh bo ngai lohna tûrin benga kan hriatte kha kan ngaihven lehzual a ngai a ni. 2 Vântirhkohte hmanga thu puan chhuah mah a rin tlâk a, dân bawhchhetu leh zâwm lotu chu rorêlna dik ang zêla hrem a nih si chuan, 3 chhandamna ropui tak hi ngaihthah ila, engtin nge hremna chu kan pumpelh theih tehlul ang? Chu chhandamna ropui tak chu a hmasa berin kan Lalpa’n a lo sawi tawh a, a thusawi hretute’n chumi chungchâng chu min hrilh a, 4 chumi dikzia chu Pathian pawhin chhinchhiahna te, thil mak te leh, thil ropui tak takte tiin, a duh zâwng ang zêla thlarau thianghlim pein a lantîr* a ni.

5 A chungchâng kan sawi khawvêl* lo la awm tûr chu vântirhkohte thu hnuaiah a dah si lo. 6 Nimahsela, thuhretu pakhatin heti hian a lo sawi a ni: “Mihring hi eng nge maw a nih a, i hriat reng ṭhin ni? Mihring fapa pawh hi eng nge maw a nih a, i ngaihsak ṭhin ni? 7 Ani chu vântirhkohte aia hnuai deuh chauhvin i siam a, ropuina leh chawimawina i khumtîr a, i kut hnathawhte chunga hotuah i ruat a. 8 A ke hnuaiah engkim i dah a,” tiin. Engkim a Fapa hnuaia a dah avângin, Pathian chuan a Fapa hnuaia dah loh eng mah a nei lo. Amaherawhchu, tûnah chuan engkim a Fapa hnuaia awmin kan la hmu rih lo. 9 Nimahsela, Isua, vântirhkohte aia hnuai deuh chauhva siama chu thihna a tawrh avânga ropuina leh chawimawina khumtîra awmin kan hmu a ni; Pathian khawngaihna nasa tak avânga thihna chu mi tin a temsakna tûrin.

10 Thil engkim a tân leh amah avângin a lo awm a, fapa tam tak ropuinaa hruai lût a, tuarnate avânga an chhandamna siamsaktu Palai Ropui Ber tih famkim chu Pathian tân tih âwm rêng a ni si a. 11 Ti thianghlimtu leh tih thianghlimte chu Pa thuhmun aṭanga chhuak an ni si a; chuvângin, anni chu unaute tia koh a zak lo. 12 “Ka unaute hnênah i hming ka puang ang a, kohhran zîngah zaiin ka fak ang che,” tia a sawi ang khân. 13 “Amahah ka rinna ka nghat ang,” a ti bawk a. Tin, “En teh u! Kei leh Jehova* min pêk naupangte hi,” a ti leh a.

14 Tichuan, “naupangte” hi tisa leh thisen nei mihringte an nih avângin ani pawh tisa leh thisen nei mihringah a lo chang a ni, a thihna hmanga thihna thlentu Diabola eng mah lova a chantîr theihna tûr leh 15 thih hlauh vânga an dam chhûnga bâwiha awm zawng zawngte a chhuah zalen theihna tûrin. 16 Isua’n a ṭanpui chu vântirhkohte ni lovin, Abrahama thlah* zâwk a ni si a. 17 Chutichuan, zahngaihna leh thuawihna nêna Pathian hna thawk puithiam lalber a nih theihna tûrin, engkimah a “unaute” anga lo awm tûr a ni rêng a ni. Tichuan, mite sualna nuai bo tûrin inthawina a hlân thei ang a, anni chu Pathian nên a inremtîr leh thei ang. 18 Amah ngei pawhin fiaha a awm lai khân hrehawm a lo tuar tawh avângin, fiaha awmte chu a ṭanpui thei a ni.

3 Chutichuan, unau thianghlim, vân kohna* changtute u, a chanchin kan hriat* tirhkoh leh puithiam lalber Isua chu ngaihtuah rawh u. 2 Pathian in pum pui laka Mosia a rinawm ang bawk khân, Isua pawh amah Ruattu lakah a rinawm a ni. 3 In satu chuan a in sak aia chawimawi a hlawh zâwk angin, ani* chu Mosia aia ropuina nasa zâwk dawng tlâk a ni si a. 4 In tin hian satu a nei ṭheuh va, engkim Siamtu erawh chu Pathian a ni. 5 Mosia chu Pathian in pum puia chhiahhlawh rinawm a ni a, a rawngbâwlna chu a hnua Pathianin a la sawi tûrte hriattîrna a ni. 6 Krista erawh chu Pathian in chunga fapa rinawm a ni. Huaisen taka* thu kan sawi zawm zêl a, a tâwp thlenga kan chhuan tûr beiseina hi nghet taka kan vuan tlat a nih chuan keini hi Pathian in chu kan ni.

7 Chutichuan, thlarau thianghlimin a sawi angin, “Vawiinah hian a aw in ngaihthlâk chuan, 8 in pi leh pute’n thlalêra min fiah nîa nasa taka min ti thinrim ang khân, in thinlung ti sak suh u. 9 Chutah chuan, kum 40 chhûng ka thil tihte hmu reng chung siin min fiahin min cho va. 10 Chuvângin, chu chhuan chu ka ten a, ‘An thinlungin an kal bo fo va, ka kawngte pawh an hre lo,’ tiin ka sawi a. 11 Chutichuan, thinur taka chhia chhamin: ‘Ka chawlhnaah an lût lo vang,’ ka ti a ni.”

12 Unaute u, in zînga tu mahin Pathian nung lak aṭanga tawlh bo avânga rinna tlâkchhamna thinlung sual in neih ngai lohna tûrin fîmkhur rawh u. 13 “Vawiin,” tia koh a nih chhûng hian nî tin infuih tawn reng zâwk rawh u, in zînga tu mah sual bumna thiltithei tak avânga in thinlung tih saka a awm lohna tûrin. 14 A tîra kan neih rin tlatna kha, a tâwp thlenga nghet taka kan vawn chauhvin Krista ṭâwmpuitute kan ni ang. 15 “Vawiinah hian a aw in ngaihthlâk chuan in pi leh pute’n nasa taka min ti thinrim ang khân in thinlung ti sak suh u,” tiin Pathian Lehkha Thuin a sawi si a.

16 Pathian aw hre reng chung sia nasa taka amah ti thinurtute kha tute nge? Aigupta ram aṭanga Mosia’n a hruai chhuah zawng zawngte kha an ni lo vem ni? 17 Chu bâkah, kum 40 chhûng Pathianin a tente kha tute nge? Thil sual titu thlalêra thi tate kha an ni lo vem ni? 18 A chawlhnaa lût lo tûra chhia a chhamnate kha tute nge? Thuâwih lo taka thil titute kha an ni lo vem ni? 19 Chuvâng chuan, rinna an neih loh avângin a chawlhnaah chuan an lût thei ta lo tih kan hria.

4 Chuvângin, Pathian chawlhnaa luhna thutiam a la awm reng avângin, chu thutiam chu kan chân lohna tûrin fîmkhur takin i awm ang u. 2 Kan pi leh pute hnêna chanchin ṭha puan chhuah a nih ang bawk khân, kan hnênah pawh puan chhuah a ni a; nimahsela, anni chuan an thu hriat chu an hlâwkpui lo, a zâwmtute rinna neih ang an neih ve loh avângin. 3 Khawvêl awm ṭan tirh aṭangin a hnathawhte chu zo tawh mah se, chu chawlhnaah chuan keini rinna lantîrtute hi kan lût a, mi dangte chungchângah erawh chuan: “Thinur taka chhia chhamin, ‘Ka chawlhnaah an lût lo vang,’ tia a sawi ang kha a ni.” 4 Ni sarihna chungchâng thu-ah chuan, a Thu-ah heti hian a lo sawi a ni: “Tin, a ni sarih nîah chuan Pathianin a hnathawh zawng zawng chu a chawlhsan a,” tiin. 5 Chu bâkah: “Ka chawlhnaah an lût lo vang,” tiin a sawi bawk a ni.

6 Mi ṭhenkhat tân chuta luh chu a la theih reng avâng leh chanchin ṭha hre hmasatute chu thuâwih lohna avânga an luh tâk loh avângin, 7 hun tam tak a liam hnuah, Pathianin Davida fakna hlaah he lehkhathawn tîr lama târ lan, “Vawiinah hian a aw in ngaihthlâk chuan in thinlung ti sak suh u,” tih thu hi a sawi a; tichuan, “Vawiin” tia koh nî chu a ruat leh a ni. 8 Josua’n chu chawlhnaah chuan anni chu hruai lût tawh ni sela chuan, a hnuah Pathianin ni dang chungchâng a sawi lo vang. 9 Chuvângin, Pathian mite tân chuan Sabbath chawlhna a la awm reng a ni. 10 Pathian chawlhnaa lût tawh chuan Pathianin a hnathawhte a chawlhsan ang khân, a hnathawhte a chawlhsan ve ṭhîn.

11 Chuvângin, tu mah thuâwih lote tih dân zira an tlûk lohna tûrin, chu chawlhnaa lût tûr chuan theih tâwp i chhuah ang u. 12 Pathian thu hi a nung a, thil a ti thei a, khandaih hriam tawn eng ang ai pawhin a hriam zâwk a, nunna* leh thlarau,* ruh chuk tuah leh thlîng phel hrang khawp hialin a chhun thei a, thinlunga ngaihtuah leh tumte hi a hre thei a ni. 13 Thil siam a mit hmuha lang lo eng mah a awm lo, kan chanchin kan sawina tûra mit hmuhah chuan engkim saruak leh inhawng sain a awm zâwk a ni.

14 Chutichuan, puithiam lalber ropui tak, vâna lâwn tawh Pathian Fapa Isua kan neih avângin vântlâng hmaah a chanchin i puang zawm zêl ang u. 15 Puithiam lalber, kan chak lohnate min hriatthiam pui theitu nei kan ni si a; ani chu keimahni ang bawka kawng tinrênga fiahna tâwk tawh, sual erawh nei lo a ni. 16 Chuvângin, khawngaihna nasa tak min petu Pathian lalṭhutthlêng chu panin, huai takin a hnênah i ṭawngṭai ang u; tichuan, a hun taka min ṭanpui tûrin zahngaihna leh khawngaihna nasa tak kan dawng thei ang.

5 Sualte avânga thilthlâwnpêkte leh inthawinate a hlan theihna tûrin, mihringte zîng aṭanga thlan puithiam lalber apiang chu mihringte aiawha Pathian rawngbâwl tûra ruat a ni a. 2 Ani chuan hriat loh avânga thil sual titute chu khawngaihna nei takin a dâwr ṭhîn a ni, amah ngei pawhin a chak lohnate a hmachhawn a ngai si a. 3 Chumi avâng chuan, mite tâna inthawinate a hlan angin, ama sualte tân pawh a hlan a ngai a ni.

4 Mi chu ama thuin puithiam lal a ni thei lo, Pathian chauhvin a ruat thei a ni, Arona a ruat ang chiah khân. 5 Chutiang bawkin, Krista chu mahniin puithiam lalberah a inruat lo va, mahni a inchawimawi hek lo: “Ka fapa i ni a, vawiinah hian i pa ka ni ta,” titu Pathianin a chawimawi zâwk a ni. 6 Tin, hmun dangah pawh, “Melkisedeka anga puithiam i ni a, chatuanin puithiam i ni bawk ang,” tiin a sawi bawk.

7 Leia a awm lai khân,* Krista chuan thihna ata amah chhandam theitu hnênah, nasa taka au leh mittui tla chungin ngennate leh dîlnate a hlân a, Pathian a ṭih avângin a ṭawngṭainate chu ngaihthlâksak a ni. 8 Fapa ni mah sela, a thil tuarte aṭangin thuâwih a zir a. 9 Tih famkima a awm hnuah chuan, ani chu a thu âwihtu zawng zawngte tân chatuan chhandamna a lo ni ta a ni, 10 Pathianin Melkisedeka anga puithiam lalbera a ruat avângin.

11 A chanchin sawi tûr tam tak kan nei; nimahsela, in thu hriatte hriatthiam tuma ṭan in lâk loh avângin* chu chu hrilhfiah a harsa a ni. 12 Tûnah chuan* zirtîrtute ni tawh hial âwm in ni a; nimahsela, Pathian thu thianghlim aṭanga in zir tâk thu bulte kha zirtîr leh in ngai ta a ni. Chaw rum ni lovin hnute tui in ngai leh ta a nih hi. 13 Tu pawh hnutê la ring chu nausên a ni a, felna thu a hre chiang lo a ni. 14 Chaw rum erawh chu an ngaihtuah theihna hmang reng ṭhîn puitlingte tân a ni a, anni chuan thil dik leh dik lo thliar hran dân an zir tawh a ni.

6 Chutichuan, Krista chungchâng thurin bulpuite zir tawh kan nih avângin puitlin lam pan zêl ila, zirtîrna bulpuite chu i zir nawn i zir nawn tawh lo vang u. Chûng zirtîrna bulpuite chu sâwtna awm lo thil tih* simna thu te, Pathian rinna thu te, 2 baptisma chi hrang hrang chungchâng zirtîrna thu te, kut nghah thu te, mitthi thawhlehna thu te leh, chatuan rorêlna thute hi a ni. 3 Pathianin rem a tih chuan, puitlin lam kan pan zêl ang.

4 Tin, tih êna awm tawh a, vân lam thilthlâwnpêk tem tawh a, thlarau thianghlim dawng tawh a, 5 Pathian thu ṭha leh khawvêl lo awm tûr* thiltihtheihnate tem tawh a, 6 tlûksan leh site chungchâng thu-ah chuan, sim leh tûrin an tân insiam ṭhat leh theih a ni tawh lo; Pathian Fapa chu bana khêngbet nawn leh a, vântlâng hmaa ti mualpho ang an nih avângin. 7 Lei chuan a chunga tla ṭhîn ruahtui a hîp hian Pathian malsâwmna a dawng a; tichuan, a tuhtute tân thlai ei tûr a chhuahsak ṭhîn. 8 Amaherawhchu, hlîngte leh buarte a chhuah chuan enkawl zui lohva awmin, ânchhe lawh a ni thuai ang a, a tâwpah hâl ral a ni ang.

9 Nimahsela, duh takte u, in chungchângah chuan hetiang hian thu sawi mah ila, dinhmun ṭha zâwk, chhandamna thlen theitu dinhmunah in ding tih kan ring tlat a ni. 10 Mi thianghlimte rawng in lo bâwl tawhnate leh in la bâwl zêlna hmanga, in hnathawh leh a hming chunga hmangaihna in lantîr chu theihnghilh tûrin Pathian chu mi fel lo a ni si lo. 11 Nimahsela, a tâwp thlenga beiseina famkim nei tûra in taihmâk dân pângngaia taihmâk chhuah ṭheuh tûrin kan duh che u a ni. 12 Chuvângin, thatchhe lo ula, rinna leh dawhtheihna avânga thutiam rochuntute entawntu ni zâwk rawh u.

13 Pathianin Abrahama hnêna thu a tiam lai khân, amah aia ropui zâwk an awm loh avângin, Pathian chuan amah leh amah inchhâlin chhia a chham a: 14 “Mal ka sâwm ngei ngei ang che a, i thlah pawh ka ti pung ngei ngei ang,” tiin a sawi a ni. 15 Tichuan, Abrahama’n dawhthei taka a nghah hnuah chu thutiam chu a dawng ta a. 16 Mihringte’n chhia an chham hian anmahni aia ropui zâwkte chhâlin chhia an chham ṭhîn a, chu chu an tân dân ang taka nemnghehna a nih avângin, an chhechham chuan inhnialnate a ti tâwp ṭhîn. 17 Chutiang bawkin, Pathian chuan thutiam rochuntute hnêna a thiltum thlâk danglam theih loh chiang lehzuala lantîr a tum lai khân chhechhamin a nemnghet a ni. 18 Chûng thil pahnih a tih* avâng chuan Pathian chu a inthlâk danglam thei lo va, dâwt a sawi thei hek lo; keini inhumhimna zawnga Pathian hnêna tlânte hian kan hmaa awm beiseina chu nghet taka kan vawn theih nân, chûng thilte chuan chakna min pe a ni. 19 Chu beiseina chu kan nunna atân thîrchakaiah kan nei a, rinawm leh nghet tak a ni a, chu beiseina chuan puanzâr chhûng lamah min hruai lût a, 20 chu puanzâr chhûng lamah chuan Melkisedeka anga puithiam, chatuana puithiam lalber lo ni ta Isua chu kan tân hmahruaitu niin a lût ta a ni.

7 Chu Melkisedeka, Salem lal, Pathian Chungnungbera puithiam chuan lalte thata Abrahama lo haw chu lo hmuakin mal a sâwm a. 2 Abrahama’n ani chu a râl lâk thil zawng zawng aṭangin sâwma pakhat a pe* a ni. Melkisedeka hming awmzia chu a hmasa berin, “Felna Lal,” tih a ni a; tin, Salem lal tih a ni bawk a, chumi awmzia chu, “Remna* Lal” tihna a ni. 3 Ani chu pa nei lo, nu nei lo, thlahtu nei lo, awm ṭan nî leh tâwp nî pawh nei lo a ni, Pathian Fapa anga siam a ni a, eng lai pawhin* puithiam a ni reng a ni.

4 Thlahtu* Abrahama’n a râl lâk ṭha ber zîng aṭanga sâwma pakhat a pêka chu, a ropuizia ngaihtuah rawh u. 5 Dân hnuaiah chuan puithiam atâna ruat Levia thlahte chuan Abrahama thlah* ve bawk an unaute hnên aṭanga sâwma pakhat la khâwm tûrin thupêk an dawng ngei a. 6 Amaherawhchu, an zîng aṭanga a thlahtu chhui theih lova chuan, Abrahama hnên aṭanga sâwma pakhat lain thutiamte neitu chu mal a sâwm a ni. 7 A tê zâwk chu a ropui zâwkin mal a sâwm ṭhîn tih hnial rual a ni lo. 8 Tin, dinhmun pakhatah chuan mihring thi theite hian sâwma pakhat an dawng a, dinhmun dangah erawh chuan Pathian Lehkha Thuin a nung tih a nemngheha chuan a dawng a ni. 9 Tin, sâwma pakhat dawng ṭhîntu Levia pawh khân Abrahama kal tlangin sâwma pakhat a pe tia sawi theih a ni, 10 ani chu Melkisedeka’n Abrahama a lo hmuah lai khân a pu Abrahama thlah angin a la piang si lo va.*

11 Tin, Levia-ho puithiam nihna kal tlanga ṭhat famkimna neih theih ni sela chuan, (chu chu mite hnêna pêk Dân hmêlhmang a ni si a) Arona ang ni lo Melkisedeka ang puithiam dang lo awm a la ngai dâwm em ni? 12 Puithiam nihna chu a lo danglam tâk avângin, Dân pawh chu thlâk danglam a ngai ta a ni. 13 Hêng thute’n a chungchâng an sawia chu hnam dang zînga mi a ni si a, chumi hnam aṭang chuan tu mah maichâma rawngbâwl an awm ngai lo. 14 Kan Lalpa chu Juda hnam aṭanga lo chhuak a ni tih a chiang si a; mahse, Mosia’n chumi hnam aṭang chuan puithiamte an lo chhuah tûr thu eng mah a sawi lo.

15 Melkisedeka ang puithiam dang a lo awm khân, puithiam nihna lo danglam ta chu a chiang lehzual a, 16 puithiam anga a rawngbâwlna chu dânin a phût anga a lo chhuahna hnam vâng ni lovin, tih chhiat theih loh nunna petu thiltihtheihna a neih vâng zâwk a ni. 17 A chungchângah Pathian Lehkha Thuin: “Melkisedeka anga puithiam i ni a, chatuanin puithiam i ni bawk ang,” tiin a sawi si a.

18 Chuvângin, thupêk hmasa zâwk chu a chak loh avâng leh a ṭangkai loh avângin hnâwl a ni. 19 Dân chuan eng mah a ti ṭha famkim thei lo, Pathian min pêk beiseina ṭha zâwk erawh chuan Pathian min hnaihtîr avângin a ti ṭha famkim thei a ni. 20 Pathianin chhechhamin Isua chu puithiamah a ruat a; 21 (a nihna takah chuan chhechham lova puithiama ruat mi ṭhenkhat an awm a, Isua erawh chu chhechhama puithiama ruat a ni. Pathianin a chungchângah: “Jehova’n* chhia a chham tawh a, a rilru a thlâk lo vang, ‘Chatuanin puithiam i ni ang,’” tiin a sawi si a.) 22 tichuan, Isua chu thuthlung ṭha zâwk nemnghehna a lo ni ta a ni. 23 Chu bâkah, puithiam tam tak chu thihnain an rawngbâwlna chhunzawm thei lova a siam avângin thlâk an ni ṭhîn a, 24 ani erawh chu chatuana a nun reng avângin a puithiam nihna chuan thlâktu a nei ve lo. 25 Tichuan, an tâna ngensak tûra a nun reng avângin, amah kal tlanga Pathian pantute chu a chhandam thei tak zet a ni.

26 Puithiam lalber, rinawm, pawi sawi lo, bawlhhlawh kai lo, mi sualte laka fihlîm leh vânte chunga chawimawia awm tawh neih chu kan tân a inâwm si a. 27 Ani chuan puithiam lalberte angin mahni sualte atâna inthawina a hlan hmasak hnua, mipuite sualna atâna inthawina nî tin a hlan a ngai ve lo, mahni ngei a inhlan khân, chatuan atân vawi khatah a tlingtla ta a ni. 28 Dân chuan chak lohna nei mihringte chu puithiam lalber ni tûrin a ruat a, Dân awm hnua lo awm chhechham thu erawh chuan, chatuan atâna tih famkim tawh Fapa chu puithiam lalberah a ruat a ni.

8 Tichuan, kan thusawiin a tum ber chu hei hi a ni: Chutiang puithiam lalber chu kan nei a, ani chu vânahte khian Pathian Ropui Taka lalṭhutthlêng ding lamah a han ṭhu a, 2 mihring sak ni lo, Jehova* sak, hmun thianghlim leh biak bûk* dik taka rawngbâwltu a ni, tih hi. 3 Puithiam lalberte chu thilpêkte leh inthawinate hlân tûra ruat an ni a; chuvângin, ani pawhin thil eng emaw hlan tûr a neih a ngai a ni. 4 Leiah hian awm sela chuan puithiam a ni lo vang, Dân anga thilpêkte hlântu tûr mihringte an awm sa tawh avângin. 5 Chûng mite chuan rawngbâwlna thianghlim, vân lam thilte entîrna leh hlimthla mai an hlân a, Mosia’n biak bûk a sak dâwn laia Pathianin thu a pêk ang chiah khân. Pathian chuan, “Tlânga entawn tûr hmuhtîr i nih ang chiah khân, engkim fîmkhur takin siam rawh,” tiin a sawi si a. 6 Tûnah erawh thuthlung ṭha zâwk palai a nih avângin, Isua chuan rawngbâwlna ṭha chungchuang zâwk a dawng a, chu thuthlung chu thutiam ṭha zâwkte chunga dân ang taka din a ni.

7 Thuthlung hmasa chu sawisêl bo ni se chuan thlun nawn a ngai lo vang. 8 Israel mite dik lohna a hmuh avângin heti hian a sawi: “‘Ngai teh u! Nîte chu a lo thleng dâwn e,’ Jehova’n* a ti. ‘Israel mite leh Juda mite hnêna thuthlung thar ka siam hunah chuan, 9 Aigupta ram aṭanga hruai chhuak tûra an kuta ka kaih nîa, an pi leh pute hnêna thu ka thlun ang kha chu a ni lo vang. Anni chu ka thuthlunga an awm reng loh avângin ka ngaihsak ta lova ni,’ Jehova’n* a ti.

10 “‘Chûng nîte hnua Israel mite hnêna thuthlung ka siam tûr chu hei hi a ni,’ Jehova’n* a ti. ‘An rilruah ka dânte ka dah ang a, an thinlungah ka ziak bawk ang. Tin, an Pathian ka lo ni ang a, anni pawh ka mite an lo ni ang.

11 “‘Tu mahin: “Jehova* hre rawh!” tiin mahni khuaa mi emaw, a unau emaw an zirtîr tawh lo vang. Mi tê ber aṭanga mi lian ber thlengin min hre vek dâwn si a. 12 An fel lohna thil tihahte chuan zahngaihna ka lantîr ang a, an sualnate chu ka hre reng tawh dâwn si lo,’” tiin.

13 “Thuthlung thar,” tia a sawi avângin thuthlung hmasa chu a ti hlui ta a. Tin, lo hlui ta leh lo upa ta chu a bo thuai dâwn a ni.

9 Thuthlung hmasa khân rawngbâwlna thianghlim atâna dân ang taka thil phûtte a neih bâkah, leiah hian hmun thianghlim a nei ṭhîn a. 2 Biak bûk pindan hmasa ber chu siam a ni ta a, chutah chuan khâwnvâr dahna te, dawhkân te leh, chhangdahte a awm a, chu chu Hmun Thianghlim tia koh a ni a. 3 Tin, puanzâr pahnihna hnung lama pindan chu biak bûka Hmun Thianghlim Ber an tih chu a ni. 4 Chutah chuan rangkachaka siam rimtui hâlna bâwm leh rangkachaka luan chhuah vek thuthlung bâwm a awm a, thuthlung bâwm chhûngah chuan manna awmna rangkachak bêl te, Arona tiang chawr te leh, thuthlung chuanna lung phêkte a awm a. 5 Thuthlung bâwm chungah chuan cherub ropui tak pahnih an awm a, an thlate chuan thuthlung bâwm chhîn* chu an zâr hliah a ni. Tûnah erawh zawng chûng thilte chu chipchiar taka sawi a hun rih lo ve.

6 Chûng thilte chutianga siam zawh a nih hnuah chuan, puithiamte chu rawngbâwlna thianghlim thawk tûrin biak bûka pindan hmasa berah chuan an lût ziah ṭhîn a, 7 puithiam lalber erawh chu amah chauhvin kum khatah vawi khat pindan pahnihnaah chuan thisen kengin a lût ṭhîn a, chu thisen chu ama tân leh mite’n hre lova thil sual an tihte atân a hlân ṭhîn. 8 Hêng ruahmannate aṭang hian, biak bûk hmasa zâwk a la din lai khân, hmun thianghlim luhna kawng chu a la lang rih lo tih thlarau thianghlimin chiang takin a lantîr a ni. 9 Chu biak bûk chu tûn hun atâna tehkhinna a ni a, chu ruahmanna ang zêl chuan thilpêkte leh inthawinate hlan a ni ṭhîn. Nimahsela, chûngte chuan rawngbâwlna thianghlim thawktu chu chhia leh ṭha hriatna thiang tak a pe thei lo. 10 Chûng thilpêkte leh inthawinate chuan ei leh in leh dân ang taka insil fai dân hrang hrangte chauh lo chu tih theih a nei lo. Chûng chu taksa nêna inkûngkaiha dânin a phût thilte leh siam ṭhatna hun a thlen hmaa hman tûra tih mai a ni.

11 Nimahsela, tûna thil ṭha chi hrang hrang thleng famkim mêkte thlentîr tûra Krista chu puithiam lalber anga a lo kal khân, kuta siam ni lo, he leia mi pawh ni lo, biak bûk ropui zâwk leh ṭha famkim zâwkah chuan a kal tlang a ni. 12 Ani chu kêlte leh bâwng pa tuaite thisen ni lovin, ama thisen ngei kengin hmun thianghlimah chuan a lût a, chatuan atân vawi khatah a tlingtla ta a; tichuan, chatuana chhanchhuahna* kan nei ta a ni. 13 Kêlte leh bâwng pate thisen leh mi bawlhhlawhte chunga theh ṭhin bâwng la vâp mahin tisa thiang khawpa a tih thianghlim si chuan, 14 chatuan thlarau thianghlim kaihhruainaa sawisêl kai lova Pathian hnêna inhlân Krista thisen chuan, Pathian nung hnêna rawngbâwlna thianghlim kan hlan theihna tûrin, kan chhia leh ṭha hriatnate chu thil tih thite lakah chuan a va ti thianghlim nasa dâwn êm!

15 Chuvângin, ani chu thuthlung thar palai a ni a, thuthlung hmasa hnuaia bawhchhiatnate lak aṭanga mite a tlan chhuah theihna tûra a lo thih tâk avângin, kohte chuan chatuana ro luah tûr thutiam chu an dawng thei ang. 16 Pathian nêna thu thlun a nih hian, a thlungtu mihring chu a thih a ngai a ni, 17 a thih hnuah chauh thuthlung chu a nung si a, a thlungtu mihring a dam chhûng chuan a nung si lo va. 18 Chutiang bawkin, thuthlung hmasa pawh kha thisen tel lo chuan a nung lo.* 19 Mosia’n Dân thupêk zawng zawng mipui hnêna a hrilh hnuah, bâwng pa tuaite leh kêlte thisen chu lain tui nên a chawhpawlh a, chu chu husop* tianga sahmul puan sen lâr ṭâwn beh chuan lehkha zial leh mi zawng zawng chungah a theh a: 20 “Hei hi Pathianin zâwm tûra a duh che u thuthlunna thisen a ni,” a ti a. 21 Chutiang bawkin, biak bûk leh rawngbâwlna thianghlim atâna hman bungbêl zawng zawng chu thisen chuan a theh bawk a. 22 Dân angin thil zawng zawng deuhthaw chu thisena tih thianghlim a ni, thisen a chhuah phawt loh chuan ngaihdamna a awm thei lo.

23 Chuvângin, vâna thil awmte entîrna chu rana inthawina thisena tih thianghlim a ngai a, vân lam thilte erawh chu rana inthawina aia ṭha zâwka tih thianghlim a ngai thung. 24 Krista chu a tak aiawhtu kuta sak hmun thianghlimah a lût lo va, tûnah hian kan aiawha Pathian hmaa a inlan theihna tûrin vânah ngei khian a lût zâwk si a. 25 Ran thisen* kenga hmun thianghlim bera kum tin puithiam lalber a lût ṭhîn ang khân, Krista erawh chu a inhlan nawn fo a ngai ve lo. 26 Chuti ni lo sela chuan, khawvêl awm ṭan tirh aṭang khân hrehawm a tawrh nawn fo a ngai ang. Amaherawhchu, he khawvêl* tâwpah hian a inthawina hmanga sual a nuai bo theihna tûrin chatuan atân vawi khat a lo inlan ta zâwk a ni. 27 Mihringte hi vawi khat thih hnua rorêlsaka awm tûr an nih angin, 28 Krista pawh kha mi tam tak sualte nuai bo tûrin chatuan atân vawi khat a inhlân a; a vawi hnih lo lanna chu sual nuai bo* tûr ni lovin, ṭhahnemngai taka amah zawngtute chhandam tûrin a ni.

10 Dân chu thil ṭha, lo la awm tûrte hlimthla, a tak ni lo a lem mai a nih avângin, kum tina inthawina thil an hlan fo ṭhinte chuan, a hlântute chu eng lai mahin a ti famkim thei lo. 2 Ti famkim thei sela chuan, rawngbâwlna thianghlim hlântute chuan vawi khat tih thianghlima an awm hnuah, an sualte avânga inthiam lohna an neih tawh dâwn loh avângin, inthawina hlan ṭhinte chu tih tâwp a ni daih tawh dâwn lâwm ni? 3 Chutih ahnêkin, chûng inthawinate chuan mite chu an sual tih kum tin a hriat nawntîr zâwk a ni, 4 bâwng pate leh kêlte thisenin sualte a la bo thei si lo va.

5 Chuvângin, khawvêla Krista a lo kal khân heti hian a sawi: “‘Inthawina leh thil hlan i duh lo va, ka tân taksa min buatsaihsak zâwk a. 6 Pum hâl thil hlante leh sual thawina thil hlante chu i pawm lo va.’ 7 Tichuan: ‘Ngai teh! Aw Pathian, (lehkha ziala ka chungchâng inziak ang khân) i duh zâwng ti tûrin ka* lo kal e,’ tiin ka sawi bawk a.” 8 A hmasain: “Inthawina te, thil hlan te, pum hâl thil hlan te leh, sual thawina thil hlante i duh lo va, i pawm hek lo,” tiin a sawi a. Chûngte chu Dân ang taka hlan ṭhin inthawinate a ni. 9 Chumi hnuah: “Ngai teh! I duh zâwng ti tûrin ka lo kal e,” tiin a sawi leh a. Ani chuan a hnuhnûng zâwk chu a tih ngheh theih nân, a hmasa zâwk chu a ti bo ta a ni. 10 Isua Krista taksa chu chatuan atâna vawi khat hlan a nih avângin, Pathian “duh zâwng” ang zêlin tih thianghlim kan ni ta.

11 Tin, puithiama ruat apiangte chu rawngbâwlna thianghlim hlân tûr leh inthawina an hlan fo ṭhin hlân tûrin, nî tin an dinna ngaiah an ding ṭhîn a; mahse, chûng inthawinate chuan sualte a la bo vek thei lo. 12 Krista erawh chu chatuan atân sualte tâna inthawina a hlan hnuah, Pathian ding lamah khian a han ṭhu ta a. 13 Chumi hnu aṭang chuan, a hmêlmate rah behtîr* a nih hma loh a nghâk reng a ni. 14 Krista hlan inthawina pakhat chuan tih thianghlim tawhte chu chatuan atân a ti famkim tawh si a. 15 Chu bâkah, thlarau thianghlim pawhin heti hian min hriattîr a ni: 16 “‘Chûng nîte hnua an hnêna thuthlung ka siam tûr chu hei hi a ni,’ Jehova’n* a ti. ‘An thinlungah ka dânte ka dah ang a, an rilruah ka ziak bawk ang,’” tiin. 17 Tichuan: “An sualnate leh dân an bawhchhiatnate chu ka hre reng tawh lo vang,” tiin a sawi bawk. 18 Pathianin chûng sualte a ngaihdam tawh chuan, sual tâna thil hlan a ngai tawh lo.

19 Chutichuan, unaute u, Isua thisen avângin hmun thianghlim* luhna kawng chu huai takin* kan zawh thei a. 20 Isua chuan puanzâr kal tlangin nunnaa hruaitu kawng thar min hawnsak a, chu puanzâr chu a taksa a ni. 21 Pathian in enkawltu puithiam ropui tak kan neih avângin, 22 chhia leh ṭha hriatna sual lak aṭanga tih thianghlim tawh thinlung leh tui thianghlima bual fai* tawh taksa neiin, thinlung tak zet leh rinna famkim nên Pathian chu i pan ang u. 23 Vântlâng hmaa kan puan chhuah kan beiseina hi nghîng lovin, nghet takin i vuan tlat ang u, thu tiamtu chu a rinawm si a. 24 Hmangaihna lantîr tûr leh thil ṭha ti tûra inchawk tho tûrin i inngaihtuah tawn ang u. 25 Mi ṭhenkhat tih dân anga kan inkhâwm thlahthlam lovin, i infuih tawn zâwk ang u; Pathian nî a lo hnai telh telh tih kan hriat avângin i infuih tawn nasa lehzual sauh vang u.

26 Thutak hriatna dik kan neih hnua duh rêng vânga thil sual kan la ti zêl a nih chuan, sualte atâna inthawina eng mah a awm thei tawh lo vang a, 27 rorêlna hlauhawm tak leh dodâltute kâng raltu tûr nghah chauh loh chu hmabâk kan nei lo vang. 28 Tu pawh Mosia Dân pawisa lo chu mi pahnih emaw, pathum emawin an hriatpui chuan khawngaihna tel lova tih hlum an ni ṭhîn. 29 A nih leh, engtin nge in ngaih? Pathian Fapa rap bet a, amah tih thianghlim nâna hman thuthlung thisen chu ngainêp a, khawngaihna nasa tak petu Pathian thlarau hmusita ti thinurtu chuan hremna nasa lehzual a phû dâwn lo vem ni? 30 “Phuba chu keima lâk tûr a ni; keiman ka thungrûl ang,” tia sawitu Pathian chu kan hre si a. A thu pawhin: “Jehova* chuan a mite chungah ro a rêl ang,” tiin a sawi bawk. 31 Pathian nung lak aṭanga hremna dawn chu thil hlauhawm tak a ni.

32 Amaherawhchu, tih êna in awm hnua hrehawm tam tak tuar chunga nasa taka in beih lai, hmân lai nîte kha hre reng rawh u. 33 A chângin hmuhsit leh tih hrehawma awm tûrin vântlâng hmaa pho chhuahin* in awm a, a chângin chutiang tâwktute chu in tawrhpui* ṭhîn. 34 Tân ina awmte chungah khawngaihna in lantîr a, in thil neihte chhuhsak in nih pawhin lâwm takin in tuar ṭhîn si a, ro chan ṭha zâwk leh chatuan daih in nei tih nangmahni ngeiin in hriat avângin.

35 Chuvângin, huai taka thusawi* bânsan suh u, lâwmman ropui tak a nei dâwn si a. 36 Pathian duh zâwng in tih hnua, thutiam thlen famkimna in hmuh theih nân chhelna in mamawh a ni. 37 Tin, “rei lotê hnuah” chuan “lo kal tûra chu a lo thleng ang a, a tlai lo vang.” 38 “Nimahsela, ka mi fel chu a rinna avângin a nung ang.” “A hnung tawlh erawh chuan amahah lâwmna ka nei lo vang.” 39 Keini erawh chu boral tûra hnung tawlh mi kan ni lo va, kan nunna humhim tûra rinna neitute kan ni zâwk e.

11 Rinna chu thil beiseite a thleng ngei ang tih rinngheh tlatna, thil hmuh lohte a awm ngei a ni tih finfiahna chiang tak a ni a. 2 Chu rinna avâng chuan kan pi leh pute khân Pathian pawm an hlawh* a ni.

3 Rinnain he khawvêl* hi Pathian Thua din a ni tih kan hria a, thil hmuh theihte hi thil hmuh theih lohte aṭanga a lo awm theihna tûrin.

4 Rinnain Abela khân Kaina hlan aia inthawina hlu zâwk Pathian hnênah a hlân a, Pathianin a thilpêkte a pawm avângin chu rinna avâng chuan mi fel a ni tih hriattîrna a dawng a. Thi tawh mah se, a rinna avângin thu a la sawi reng a ni.

5 Rinnain Enoka kha hrehawm tuara a thih lohna tûrin lâk sawn a ni a, Pathianin ani chu a lâk sawn avângin khawiah mah hmuh tûr a awm lo; lâk sawn a nih hmain Pathian a ti lâwm hle tih hriattîrna a dawng si a. 6 Chu bâkah, rinna tel lo chuan Pathian tih lâwm theih a ni lo. Tu pawh Pathian pantu chuan, ani chu a awm tih leh ṭhahnemngai taka amah zawngtute hnêna lâwmman petu a ni tih a ring tûr a ni.

7 Rinnain Nova chuan thil la hmuh lohte chungchânga Pathian vaukhânna a dawn hnuah, Pathian ṭihna lantîrin a chhûngkua chhandam nân lawng a tuk a; chu rinna avâng chuan khawvêl thiam loh a chantîr a, a rinna avângin mi fela puan a ni.

8 Rinnain Abrahama chuan a la rochun tûr hmun pana kal chhuak tûra koh a nih khân thu a zâwm a; tichuan, a kalna tûr hmun pawh hre lovin a kal chhuak ta a. 9 Ram tiamah chuan mi rama châm ang maiin rinnain a chêng a, thutiam inang a rochunpui tûr Isaaka leh Jakoba te nên puan inah an chêng a ni. 10 Pathian duan leh din lungphûm nget tak nei khua chu a nghâk si a.

11 Rinnain Sari ngei pawh khân, Thutiamtu chu a rinawm* tih a rin avângin naupai thei tawh lo tûr khawpa a upa tawh chung pawhin nau a pai a.* 12 Chuvângin, mitthi tawh ang mai Abrahama lak aṭang chuan vâna arsi zâta tam leh tuifinriata ṭiau vut zâta tam mite an lo chhuak ta a.

13 Chûng mite chu thih thlengin an rinawm a, thutiamte chu an hun laiin thleng famkim lo mah se, hla tak aṭanga hmuin an lo lâwm a, mikhual leh mi rama châm mai an ni tih vântlâng hmaah an puang a ni. 14 Chutianga puangtute chuan anmahni hmun tûr ṭhahnemngai takin an zawng tih an târ lang si a. 15 Nimahsela, an chhuahsan tâk hmun kha ngaihtuah reng sela chuan, lêt lehna hun remchâng an nei ngei ang. 16 Amaherawhchu, vân aṭanga lo thleng tûr hmun ṭha zâwkah chuan awm châkin theih tâwp an chhuah a. Chuvângin, Pathianin an Pathian tia koh chu a zak lo, an tân khua a buatsaihsak tawh si a.

17 Rinnain Abrahama chuan fiaha a awm lai khân Isaaka chu hlân tawh ang mai a ni a, 18 a hnênah: “I thlah* chu Isaaka aṭangin an lo chhuak ang,” tia hrilh ni mah se, thutiamte lâwm taka dawngtu chuan a fapa neih chhun chu hlan a tum a ni. 19 Pathianin a fapa chu a kai tho thei tih a ring a, thihna ata tho leh ang maiin a hmu lêt leh ta rêng a, chu chuan hma lam huna thil thleng tûr a târ lang a ni.

20 Rinnain Isaaka pawhin thil lo la thleng tûrte chungchângah Jakoba leh Esauva mal a sâwm a.

21 Rinnain Jakoba khân a thih dâwn hnaihah Josefa fapate chu mal a sâwm ve ve a, a tiang rinchhana kûnin Pathian chibai a bûk a ni.

22 Rinnain Josefa khân a thih dâwn hnaihah Israel fate Aigupta ram aṭanga an chhuah tûr thu sawiin, a ruhte chu chuta ṭanga la sawn tûrin thu a pe a ni.

23 Rinnain Mosia nu leh pate khân Mosia a lo pian khân, thla thum chhûng an thukru a, nausên duhawm tak a ni tih an hmuhin lal thupêk pawh an hlau lo. 24 Rinnain Mosia chuan a lo puitlin hnu khân, Pharaoa fanua fapaa vuah a duh lo va, 25 rei lote chhûng sual nawmna chen aiin Pathian mite nêna tih duhdahna tawrh a thlang ta zâwk a. 26 Hriak Thiha a nih avânga an sawichhiatna chu Aigupta ram rote aia hlu zâwkah ngaiin, lâwmman dawn tûr chu a thlîr tlat a ni. 27 Rinnain Aigupta ram a chhuahsan a, lal thinur pawh hlau lovin Hmuhtheihlohva chu hmu ang maiin chhel takin a tuar zawm zêl a ni. 28 Rinnain Kalhlên Kût a hman bâkah, ti boraltuin an fa tîr a tih nat* lohna tûrin thisen a theh bawk.

29 Rinnain Israel mite chuan Tuipui Sen kha lei châra kal ang maiin an kân a, Aigupta miten kân ve an tum khân Tuipui chuan anni chu a lem zo ta a ni.

30 Rinnain Israel mite’n Jeriko kulh bangte chu ni sarih an kal hual hnuah a chim ta a. 31 Rinnain nawhchizuar Rahabi khân enthlatute ṭha taka a lo lawm avângin, thuâwih lote ruala tih boralin a awm ve lo.

32 Ka la sawi zêl dâwn em ni? Gideona te, Baraka te, Samsona te, Jeptha te, Davida te, Samuela te leh, zâwlnei dangte chanchin sawi zêl dâwn ila chuan hunin mi daih lo vang. 33 Anni chuan rinnain ramte an la a, felna an awmtîr a, thutiamte an dawng a, sakeibaknei kâte an ti chîp a, 34 mei chakna an ti mit a, ngûnhnâm hriam an pumpelh a, chak lohna aṭanga thiltithei taka siamin an awm a, indonaah an huaisen hle a, an ram rûntu sipaite an ûm darh a ni. 35 Hmeichhiate chuan an mitthi tho lehte chu an lo lâwm a, mipa dangte erawh chuan nghaisak an tuar a, zalen an duh vâng maiin an rinna an phatsan lo, thawhlehna ṭha zâwk an neih theihna tûrin. 36 Mi dangte chuan nuihsawh leh hruihruala vuak an tuar a; chu bâkah, khaidiata thlun leh tân ina khung hial pawh an tâwk a ni. 37 Den hlum an ni a, rinna fiahna an tâwk a, thingzainaa zai bun an ni a, ngûnhnâma sah hlum an ni a, berâm vun leh kêl vunte an sin a, tlachhamin an awm a, hrehawm an tuar a, dik lo taka cheibâwl an ni a, 38 an tân khawvêl hi awmna tlâk a ni lo. Thlalêrahte leh tlângahte an vâkvai a, pûkahte leh lei kuaahte an chêng ṭhîn.

39 Chûng zawng zawngte chuan an rinna avângin Pathian pawm an hlawh tih hriattîrna dawng mah se, thutiam thlen famkimna chu an hmu lo, 40 chu chu kan tâna thil ṭha zâwk Pathianin a lo hmuh lâwk vâng a ni, anni chu kan ruala tih famkima an awm theihna tûrin.

12 Chuvângin, chutiang chhûmpui nasa tak ang thuhretute’n min hual vêl avângin, min ti rittu apiang leh awlsam taka min ti hnawk thei sual chu paih thlain, kan hmaa awm intlânsiaknaah chuan chhel takin i tlân ang u. 2 Isua kan rinna Kaihruaitu* leh Ti Famkimtu chu kan thlîr tlat a ni, ani chuan a hmaa hlimna awm avângin mualphona chu ngainêpin, nghaisakna banah* a tuar a, Pathian lalṭhutthlêng ding lamah khian a han ṭhu ta a ni. 3 In chauh lohva in tlâwm lohna tûrin, mahni thiam loh inchantîrtu mi sualte lak aṭanga sawi chhiatna tuartu chu ngun takin ngaihtuah rawh u.

4 Sual in donaah thisen chhuak khawpin in la do ngai lo. 5 A fate anga Pathianin a pêk che u fuihna kha in theihnghilh pumhlûm ta a ni: “Ka fapa, Jehova* thununna chu ngainêp lo la, a zilhhauva i awm hunah beidawng hek suh; 6 Jehova* chuan a hmangaihte chu a thunun ṭhîn a, fa anga a pawm apiangte chu a vaw* ṭhîn si a,” tih hi.

7 Chhel takin hrehawm tuar ula, chu chu thunun* in nihna kawng khat angin ngai rawh u. Pathian tân chuan a fate in ni si a. Pa thunun loh fa tu nge awm ngai? 8 Chu thununna dawngtute zînga in tel loh chuan fa tak ni lovin, sâwn in ni tihna a ni ang. 9 Chu bâkah, tisa lama kan pate chuan min thunun ṭhîn a, anni chu kan zah hle a ni. Chuti a nih si chuan, thlarau thianghlima kan nun kaihruaitu kan Pa vâna mi chu kan zah lehzualin, kan nun theih nân a thu kan âwih tûr a ni dâwn lâwm ni? 10 Tisa lama kan pate chuan ṭha an tih ang zêlin hun rei lotê chhûng atân min thunun ṭhîn a, kan Pa vâna mi erawh chuan amah anga kan thianghlim theih nân kan ṭhatna tûrin min thunun ṭhîn. 11 Thununna rêng rêng hi dawn lai chuan thil lâwmawm angin a lang lo va, a hrehawm zâwk a ni; a hnuah erawh, chumia sawizawia awm tawhte hnênah chuan rah thlamuanawm tak felna a chhuah ṭhîn.

12 Chuvângin, kut chak lote leh khûp chak lote chu ti chak ula, 13 in kê atân kawngte ti ngîl reng rawh u, kebaite an bai zual loh va, an lo dam theih zâwkna tûrin. 14 Mi zawng zawng nên inrema awm tumin, thianghlim takin nung rawh u, thianghlimna tel lo chuan tu man Lalpa an hmu lo vang. 15 Tu man Pathian khawngaihna nasa tak in chân loh nân fîmkhur ula, hnim tûr nei zung lo chawr chhuak ang in nih lohna tûrin fîmkhur rawh u, chutiang mi chuan buaina thlenin, mi tam tak a ti bawlhhlawh ṭhîn a ni. 16 In zîngah nungchang bawlhhlawhnaa* inhmang ṭhîn leh Esauva anga thil thianghlimte ngainêptu an awm lohna tûrin fîmkhur rawh u, ani chuan a fa tîr nihna chu chaw vawi khat eiin a thleng si a. 17 A hnua malsâwmna dawn a duh leh khân, ani chu hnâwl a ni tih in hria e; mittui tla chungin a pa rilru hmin tum mah se, nasa taka a ngenna chuan eng awmzia mah a nei lo.

18 Nangni erawh chuan tlâng khawih theih leh mei alh awmna chu in pan lo ve, chu tlâng chu chhûm dum leh thim chhah takin a khuh, thlipui tlehna, 19 tawtawrâwt ri leh aw rite lo chhuahna a ni a, aw ri chu an hriatin mite chuan an hnêna thu sawi zawm tawh lo tûrin an ngên a. 20 “Sakawlh pawhin tlâng chu dek se, den hlum tûr a ni,” tih thupêk avâng chuan an hlau hle. 21 Thil lo lang chu a hlauhawm êm avângin Mosia pawhin: “Hlauvin ka khûr,” a tih hial kha. 22 Nangni erawh chuan Zion Tlâng, Pathian nung khawpui vân Jerusalem chu in pan a, chu chu vântirhkoh chhiar sên lohte 23 awm khâwmna, fa tîr vâna hming chuang tawhte inkhâwmna, thil zawng zawng chunga rorêltu Pathian awmna, thlarau thianghlim hruaina mila nung mi fel leh tih famkim tawhte awmna, 24 thuthlung thar palai Isua awmna leh kan chunga theh Isua thisen, Abela thisen aia ṭha zâwk awmna a ni.

25 Thusawitu chu in lo ngaithla duh lo palh ang e, fîmkhur rawh u. Leia Pathian vaukhânna thusawi ngaithla duh lotute mahin hremna an pumpelh si loh chuan, vân aṭanga thusawi kan ngaihthlâk loh chuan hremna chu kan va pumpelh lo nasa lehzual dâwn êm! 26 Chutih lai chuan a awin lei a ti nghîng a; nimahsela, tûnah zawng: “Vawi khat dang lei chauh ni lovin, vân pawh ka ti nghîng leh ang,” tiin a tiam a ni. 27 “Vawi khat dang,” tih thu hian tih nghîna awm lo thilte an awm reng theihna tûrin, thil siam tih nghîna awmte chu nuai bo a ni ang tih a târ lang a ni. 28 Chuvângin, tih nghîn theih loh Lalram changtu tûrte kan ni tih hriain, Pathian khawngaihna nasa tak chu hlâwkpui zawm zêl tûrin theih tâwp i chhuah ang u; tichuan, Pathian ṭih chung leh hlau chungin a hnênah a pawm tlâk rawngbâwlna thianghlim kan hlân thei ang. 29 Kan Pathian chu mi kâng raltu mei a ni si a.

13 Unau angin inhmangaih zêl rawh u. 2 Khual chhâwn thiamna lantîr theihnghilh suh u, khual chhâwn thiamna* lantîrtu mi ṭhenkhat chuan hre lovin vântirhkohte an thleng si a. 3 Tân ina tângte* chu an bula tâng ve ang maia inngaiin hre reng ula, mihring ve bawk in nih avângin* dik lo taka cheibâwl tâwkte chu hre reng bawk rawh u. 4 Inneihna hi mi zawng zawng zîngah chawimawiin awm sela, nupa khum pawh tih bawlhhlawh ni suh se, Pathianin nungchang bawlhhlawhnaa inhmangte* leh uirête chungah ro a rêl dâwn si a. 5 Sum ngainatna lakah fihlîm ula, in thil neih chhunahte chuan lungawi rawh u. Ani chuan: “Engtikah mah ka kalsan tawp lo vang che a, thlah pawh ka thlahthlam tawp lo vang che,” a ti si a. 6 Chuvângin: “Jehova* chu min ṭanpuitu a ni; ka hlau lo vang. Mihringin ka chungah eng nge a tih theih?” tiin huai takin kan sawi thei a ni.

7 In zînga hmahruaitu, Pathian thu hrilh ṭhîntu che u chu hre reng ula, an nungchang ṭhain a rah chhuahte chu ngaihtuahin an rinna entawn rawh u.

8 Isua Krista chu niminah leh vawiinah leh chatuan pawhin a ngai reng a ni.

9 Zirtîrna hrang hrang leh mak tak taktea hruai bovin awm suh u, ei leh in* ngai pawimawh lutuktu nih ai chuan, khawngaihna nasa taka thinlung tih ngheh chu a ṭha zâwk e.

10 Biak bûka* rawngbâwlna thianghlim hlântute’n eng mah an ei theih lohna maichâm kan nei a. 11 Puithiam lalberin ran thisen chu sual thawina atâna hlân tûrin hmun thianghlimah a keng lût a; mahse, chûng ran ruangte chu daipâwnah hâl ral a ni ṭhîn. 12 Chuvâng chuan, Isua pawh khân ama thisen ngeia mite a tih thianghlim theihna tûrin khaw pâwnah* hrehawm a tuar a ni. 13 Tichuan, sawichhiat a tawrh ang chu tuarin daipâwn lamah a hnênah i kal ang u, 14 hetah hian khaw nghet kan nei si lo, khaw lo la awm tûr chu ṭhahnemngai takin kan zawng zâwk a ni. 15 Isua kal tlangin Pathian hnênah faka inthawina i hlân fo vang u; chu chu, vântlâng hmaa a hming kan puan chhuahna hmuite rah chu a ni. 16 Chu bâkah, thil ṭha tih leh thil phal theihnghilh suh u, chutiang inthawinate chuan Pathian a ti lâwm êm êm si a.

17 In zînga hmahruaitute chu nangmahni vêngtu che u an nih avâng leh Pathianin ro a la rêlsak dâwn avângin an thu âwihin, an lakah intulût rawh u; chutianga in tih chuan, lungngai chung ni lovin lâwm chungin an hna an thawk thei ang, lungngai chunga thawh chu in tân a pawi dâwn si a.

18 Kawng engkimah rinawm taka nun kan duh avâng leh chhia leh ṭha hriatna thiang* kan nei tih dik taka kan inhriat avângin, min ṭawngṭaisak reng rawh u. 19 Amaherawhchu, ka rawn tlawh leh vat theih nân che u min ṭawngṭaisak tûrin ka duh lehzual che u a ni.

20 Remna* Pathian chuan kan Lalpa Isua chu thihna ata a kai tho va, berâm vêngtu ropui Isuaah chuan chatuan daih thisen thuthlung chu a awm a ni; tin, remna Pathian chuan, 21 a duh zâwng ti tûrin thil ṭha tinrêngin thuam che u rawh se, Ani chuan Isua Krista hmangin a lâwm zâwng ti tûrin min chêttîr a ni. Pathian hnênah chuan chatuanin ropuina awm rawh se. Amen.

22 Unaute u, in hnêna ka lehkhathawn hi a sei loh avângin, he fuihna thu hi dawhthei taka ngaithla tûrin ka ngên a che u. 23 Kan unaupa Timothea chu chhuah a ni tawh tih in hriat ka duh e. A lo kal hma deuh chuan, nangmahni hmu tûrin kan lo kal ang.

24 In zînga hmahruaitu zawng zawng leh mi thianghlim zawng zawng kha chibai min buksak ang che u. Italy rama unaute’n chibai an bûk a che u.

25 Khawngaihna nasa tak chu in vaia hnênah awm rawh se.