EPHESI KHUAA MITE HNENA LEHKHATHAWN

1 Kei Paula, Pathian duh zâwng anga Krista Isua tirhkoh hian Ephesi khuaa mi thianghlimte leh Krista Isua nêna inpumkhat, mi rinawmte hnênah he lehkhathawn hi ka ziak a ni:

2 Pathian kan Pa leh, Lalpa Isua Krista khawngaihna nasa tak leh thlamuanna* in hnênah awm rawh se.

3 Pathian, kan Lalpa Isua Krista Pa chu fakin awm rawh se. Ani chuan Krista nêna kan inpumkhat avângin, vân hmunahte khian thlarau thianghlim hmangin malsâwmna tinrêngin min vûr si a. 4 Hmangaihnaa a hmaa thianghlim leh sawisêl bova kan awm theihna tûrin, ani chuan khawvêl nghahchhan a phûm hmain Krista nêna inpumkhat tûrin min thlang a ni. 5 Ani chuan a lâwm zâwng leh duh zâwng anga a fa takte anga lâk ni tûrin, Isua Krista hmangin min lo thlang tawh a. 6 Chu chu a Fapa duh tak hmanga kan chunga khawngaihna nasa tak a lantîr avânga mite’n Pathian an fak theihna tûrin a ni. 7 A Fapa hmanga tlan leh chhuah zalen kan ni tawh a, a thisen avâng chuan kan sualte ngaihdam a ni ta. Pathian khawngaihna nasa tak chu a va ropui êm!

8 Ani chuan chu khawngaihna nasa tak chu finna leh hriatthiamna zawng zawng nên phal taka min pein, 9 a duh zâwng thurûk thianghlim chu min hriattîr a. Chu chu a lâwm zâwng ang zêla amah ngeiin a thiltum, 10 lei leh vâna thil awm zawng zawng Kristaah lâk khâwm a, hun ruatte a kim huna fel taka enkawl a ni. Ni e, amahah chuan 11 kan inpumkhat a, ro luah tûra ruat kan ni. A hmaa min lo thlan lâwk tawh avângin, chu chu a thiltum nên a inmil a ni. Ani chuan a duh zâwng nêna inmilin engkim a ti ṭhîn, 12 keini Kristaa beiseina nei hmasatute avânga Pathian chu fak leh chawimawia a awm theihna tûrin. 13 Nimahsela, nangni pawhin thutak thu, in chhandamna chungchâng chanchin ṭha in hriat hnuah amahah beiseina in lo nei ta a. Tin, in rin hnuah Krista hmangin Pathian tiam thlarau thianghlima chhinchhiah in ni. 14 Thlarau thianghlim chu Pathian thutiamte kan dawng ngei ang tih tiamkamna a ni. Pathianin a mite chhuah zalên tûra tlanna a pêk theih nân chutiang chuan a ti a, chu chuan ani chu fakna ropui tak a dawntîr ang.

15 Lalpa Isua in rinna leh mi thianghlim zawng zawngte chungah hmangaihna in lantîr tih ka lo hriat avângin kei pawhin 16 in tâna lâwmthu sawi ka bâng lo va. Ka ṭawngṭainaahte chuan in hming ka lam reng ṭhîn. 17 Kan Lalpa Isua Krista Pathian, ropuina Pa chuan finna leh a thu puan chhuahte in hriatthiam theih nân thiltihtheihna pe che u rawh se; tichuan, amah hriatna dik tak in nei ang. 18 Ani chuan in thinlung mitte a ti vâr a, eng beisei tûrin nge a koh che u tih hre tûr te, mi thianghlimte tâna rochan tûr a khâwl khâwm nasatzia hre tûr te leh, 19 keini ringtute hnêna a thiltihtheihna nasa tak a lantîrzia in hriat theihna tûrtein chutiang chuan a ti a ni. Chu thiltihtheihna nasatzia chu a chakna ropui tak a hman dânah a lang a, 20 chu chu thihna ata Krista a kaihthawh lai leh, vân hmuntea a ding lama a ṭhuttîr lai khân a lantîr a ni. 21 Ani chuan sawrkâr zawng zawng te, thuneihna te, thiltihtheihna te, lalna te leh, he khawvêl* mai ni lo, khawvêl lo la awm tûra hming zawng zawng aia ropui zâwk daih pein a chawimawi ta a. 22 A ke hnuaiah engkim a dah bawk a; tichuan, thil engkimah kohhran lû atân a dah a, 23 kohhran chu Krista taksa a ni, chu chu amaha tih khah a ni a, ani chu engkim ti famkimtu a ni bawk.

2 Chu bâkah, in bawhchhiatnaahte leh in sualnaahte thi mah ula, Pathianin a ti nung che u a, 2 chûngah chuan tûn hma khân he khawvêl* awm dân ang hian in awm ṭhin kha, boruaka rorêltu tûna âwih lo fate chunga thawk mêktu thlarau dân ang hian. 3 Chûng mite zîngah chuan keini zawng zawng pawh tûn hma chuan kan tisa châkna angin kan awm ṭhîn a, tisa duh zâwng leh kan ngaihtuahnate anga thil tiin, mi dangte ang bawka thinurna faa piang rêng kan nih kha. 4 Nimahsela, Pathian chu zahngaihnain a khat a, min hmangaihna nasa tak avângin, 5 kan bawhchhiatnate avânga thi kan nih lai pawh khân Krista rualin min ti nung a; tin, khawngaihna nasa tak avânga chhandam in ni. 6 Chu bâkah, Pathianin Krista rualin min kai tho va, vân hmunahte khian a hnênah min ṭhuttîr ta a. 7 Hun lo la awm tûrah, keini Krista Isua nêna inpumkhatte chunga thil ṭhate a tih huna a khawngaihna nasa tak a lantîrna tûrin, Pathianin chutiang chuan a ti a ni.

8 Nangni rinna neitute hi, chu khawngaihna nasa tak avâng chuan chhandam in ni a, chu chu in thawh chhuah ni lovin, Pathian thilthlâwnpêk zâwk a ni. 9 Ni e, chu chu in thil tihte vâng a ni lo, tu man inchhuanna tûr in neih lohna tûrin. 10 Keini hi Pathian kut chhuak kan ni, hna ṭhate thawk tûra Krista Isua nêna pumkhata siam kan ni a, chutianga min tihtîr chu Pathianin a lo tum sa a ni.

11 Chuvângin, hei hi hre reng rawh u; tisaa hnam dang mi rênga piang in ni a, mihring kuta tisaa “serhtan” an tihte’n “serhtan loh” an tih ṭhinte in nih kha. 12 Chutih lai chuan Krista tel lo, Israel hnam lak aṭanga inmihran, thutiam thuthlungte laka mikhualte in ni a; khawvêlah hian beiseina nei lo leh Pathian tel lovin in awm ṭhin kha. 13 Nimahsela, tûnah Krista nêna inpumkhatin nangni Pathian lak aṭanga hla taka awm ṭhînte khân, Krista thisen avângin Pathian in lo hnaih ta a. 14 Ani chu kan inremna, pâwl pahnihte pakhata siamtu leh an inkâra dai dangtu bang ṭhiattu a ni si a. 15 Ani chuan inhmêlmâkna, Dâna thupêkte chu a tisain a ti bo va, chu chu amahah pâwl hnihte chu mihring thar pumkhata siam tûr te, remna siam tûr te leh, 16 nghaisakna ban* hmanga Pathian lama taksa pumkhata inrem lehna pumhlûm a neihtîr theihna tûrtein a ti a ni. A thihna hmangin chu inhmêlmâkna chu a ti bo ta si a. 17 Tin, ani chu a lo kal a, nangni Pathian hlata awmte hnênah leh Amah hnaiha awmte hnênah remna* chanchin ṭha a puang a. 18 Amah avângin keini pâwl pahnihte hian thlarau thianghlim thuhmun kan neih avângin, zalên takin Pa kan pan thei ve ve a ni.

19 Chutichuan, mikhualte leh ram dang mite in ni tawh lo va, mi thianghlim dangte nên khua leh tui thuhmun leh Pathian chhûngte zînga mi in ni tawh zâwk a ni. 20 Tirhkohte leh zâwlneite lungphûm chunga sak in ni a, Krista Isua ngei chu a kila lungphûm pawimawh ber a ni. 21 In pum pui amah nêna inpumkhat leh rem taka inzawm khâwm chu Jehova* tâna biak in thianghlim ni tûrin a ṭhang zêl a. 22 Krista nên pumkhat in nih avângin, Pathianin mi dangte nên a chênna in ni tûrin a siam che u a ni, chutah chuan a thlarau a awm si a.

3 Chumi avâng chuan, kei Paula, nangni hnam dangte tâna Krista Isuaa mi tâng hian— 2 nangmahni avânga ka hnêna pêk, Pathian khawngaihna nasa tak enkawltu nihna chungchâng kha nangni hian in lo hre tawh ngei ang a, 3 ni e, Pathianin a thurûk thianghlim min hriattîr a, chumi chungchâng chu in hnênah a hmain tawi têa ka ziah tawh kha. 4 Chuvângin, hei hi in chhiar hunah Krista thurûk thianghlim chu ka hre thiam tih in hre thei ang. 5 Chhuan dangahte khân he thurûk hi tûna a tirhkoh thianghlimte leh a zâwlnei thianghlimte hnêna thlarauvin a puan chhuah ang hian, mihring fate hnênah hriattîr a la ni ngai lo va. 6 Thurûk chu hei hi a ni, hnam dang mi, Krista Isua nêna inpumkhatte’n Krista ro luahpuiin taksa pêng an lo ni ang a. Anni chuan chanchin ṭha avângin Pathianin kan hnêna a thutiam ang bawk chu an dawng ve ang. 7 Pathian khawngaihna nasa tak avângin chu thurûk thianghlim rawngbâwltu chu ka lo ni a, ani chuan chu thilthlâwnpêk chu a thiltihtheihna lantîr nân min pe a ni.

8 Kei, mi thianghlim zawng zawngte zînga tê ber ai pawha tê zâwk hnênah hian, chu khawngaihna nasa tak chu pêk ka ni a, Krista hausakzia chhui chhuah rual loh chungchâng chanchin ṭha hnam dangte hnêna ka puan chhuah theihna tûr leh, 9 engkim siamtu Pathianin hmân lai aṭanga thup tawh a thurûk thianghlim ti lang a, a thlen famkimtîr dân hmu tûra mite ka ṭanpui theih nân. 10 Kohhran ruahmanna hmanga Pathian finna kawng tam taka lantîr chu vân hmuntea awm lalte leh thuneitute’n an hriat theihna tûrin chutiang chuan a thleng a ni. 11 Chu chu Krista kan Lalpa Isua chungchânga a chatuan thiltum ang zêlin a ni. 12 Amah avângin zalên taka thusawi theihna kan nei a; tin, amah kan rinna avângin inrintâwkna nêna amah pan theihna kan nei bawk a ni. 13 Chuvângin, in aia ka hrehawm tawrhnate avâng hian beidawng lo tûrin ka ngên a che u, chûngte chu in tân ropuina a ni si a.

14 Hemi avâng hian Pa hnênah ka ṭhingṭhi a ni, 15 lei leh vâna chhûngkaw tinte hi Ama zâra awm an ni si a. 16 A ropuina nasa tak avânga in chhûng lam mihring tih chaka a awm theih nân, a thlarau hmanga a thiltihtheihna pe tûr che uin ka ṭawngṭai a ni; 17 amah in rin avânga Krista chu hmangaihna nên in thinlunga a awm theihna tûrin. Lungphûm chunga zung nghet tak kaia din ni rawh u; 18 chutiang chuan, mi thianghlim zawng zawngte angin thutak zauzia te, seizia te, sânzia te leh, thûkziate kimchang takin in hre thiam thei ang a, 19 hriatna aia ropui zâwk Krista hmangaihna in hria ang a; tichuan, Pathian pêk miziatea tih khahin in awm thei ang.

20 Keimahnia thawk ṭhîn a thiltihtheihna ang zêla kan dîl leh ngaihtuah phâk bâk aia nasa zâwka ti theitu hnênah chuan, 21 kohhran leh Krista avângin chhuan zawng zawng thlengin a hnênah chatuanin ropuina awm rawh se. Amen.

4 Kei Paula, Lalpa avânga mi tâng hian koh in nihna nêna inmila nung tûrin ka ngên a che u. 2 Inngaihtlâwmna leh nunnêmna* zawng zawng nên dawhtheihna neiin hmangaihnain indawh tawn rawh u. 3 Thlarau thianghlimin in inpumkhat tawh a, inrem taka awmin, inpumkhat zawm zêl tum tlat rawh u. 4 Beiseina pakhata koh in nih ang chiah khân, taksa pakhat leh thlarau pakhat a awm a. 5 Lalpa pakhat, rinna pakhat, baptisma pakhat a awm; 6 Pathian pakhat leh engkim chunga Pa pakhat a awm a, ani chu mi zawng zawng aia ropui zâwk a ni. Ani chuan kan vaia kaltlangin hna a thawk a, a thiltihtheihna chuan kawng engkimah hna a thawk bawk a ni.

7 Pathian hnên aṭangin khawngaihna nasa tak kan dawng ṭheuh va, chu thilthlâwnpêk chu Krista’n mi tin hnênah min pe a ni. 8 Pathian Lehkha Thuin: “Chung lama a han chhoh khân mi tângte chu a chhuah a; mihringte hnênah thilpêkte a pe bawk a,” tiin a sawi si a. 9 ‘A han chho,’ tih hi eng nge a awmzia? Chu chu hmun hnuaihnung zâwk leiah hian a lo chhuk tawh tihna a ni. 10 Thil engkim a thlen famkimtîr theihna tûrin, lo chhuka ngei kha vân zawng zawng chunga chhova bawk kha a ni.

11 Ani chuan mi ṭhenkhat chu tirhkoh ni tûr te, ṭhenkhat zâwlnei ni tûr te, ṭhenkhat thu hriltu* ni tûr te, ṭhenkhat berâm vêngtu leh zirtîrtu ni tûrtein a ruat a. 12 Chu chu mi thianghlimte kawng dika kal tûra ṭanpui tûr te, rawngbâwl hna thawk tûr te, Krista taksa ṭhan chhohtîr tûrtein a ni. 13 Anni chuan rinnaa kan inpumkhat a, Pathian Fapa chungchâng hriatna dik kan neih thlengin chu chu an ti ang, Krista anga puitlinna famkim kan neih theihna tûrin. 14 Tichuan, mihringte inbumna leh fin vervêknaa hruai pên tumtute zirtîrna thli tinrênga lehlam lehlama vawrh leh hruai kawi theih naupang ang kan ni tawh tûr a ni lo. 15 Nimahsela, thu dik sawiin kawng engkimah amahah hmangaihnain i ṭhang lian ang u, ani chu lû a ni, Krista chu. 16 Amahah chuan taksa pum pui chu ṭha taka inzawmin, pêng tinte chu tisain a mamawh ang zêlin an inṭanpui tawn a. Pêng tinte’n ṭha taka hna an thawh hian taksa chu hmangaihnaa ṭhang lian tûrin an ṭanpui a ni.

17 Hei hi Lalpa hmingin ka hrilh che u a ni, hnam dang mite awm dân angin awm tawh suh u, anni chuan thil sâwt lote* an ngaihtuah si a. 18 An rilru a thim zo va, Pathian an hriat duh loh avâng leh an thinlung a chawlawl* avângin Pathian pêk nunna lak aṭangin an inlahrang a. 19 Nungchang lama tehnate an hre tawh lo va, tîmna nei lova thil sual tiin,* duhâm takin thil bawlhhlawh tinrêng an ti a ni.

20 Nimahsela, Krista chu chutiang mi a ni lo tih in zirin in hria e. 21 Isua zirtîr thutak nêna inmilin in hriain in zir zâwk a ni. 22 Chuvângin, in mize hlui leh tûn hmaa in thil tih ṭhinte kha hlîp thla rawh u, in châknaa buma in awm avângin in mize hlui chu a chhe si a. 23 In rilru put hmang* chu in siam thar reng tûr a ni. 24 Felna dik tak leh rinawmna hmanga Pathian duh zâwnga siam mize thar chuan inthuam bawk rawh u.

25 Tûnah chuan mi bum in bânsan tawh a, mi tinin in ṭhenawm hnênah thu dik sawi ṭheuh rawh u, inpêng tawn ṭheuh kan ni si a. 26 Thinrim ula, sual erawh chu sual suh u; ni tlâk thlengin thinrim suh ula; 27 Diabola chu hun remchâng pe hek suh u.* 28 Rûkru chuan ru tawh lo sela; chu aiin, ṭanpui ngai hnêna pêk tûr a neih theihna tûrin, a kutin hna ṭha rim takin thawk zâwk rawh se. 29 Thu ṭha lo* rêng rêng in kâ aṭangin chhuak suh se; amaherawhchu, a ngaithlatute’n hlâwkna an dawn theihna tûrin, a ṭûlzia ang zêlin mi siam ṭha thei thu ṭha chauh sawi zâwk rawh u. 30 Tlanna avânga chhuah zalenna nî atâna chhinchhiahtu che u Pathian thlarau thianghlim chu ti lungngai suh u.

31 Huatna nasa tak te, thinrimna te, thinurna te, ânna te, sawichhiatnate rêng rêng bânsan rawh u, mi tina thei thil dang zawng zawngte pawh. 32 Ngilneihna inlantîr tawnin inkhawngaih tawn ula, Pathianin Krista hmanga a ngaidam che u ang khân inngaidam tawn rawh u.

5 Chutichuan, a fa duh takte in nih angin Pathian entawn rawh u. 2 Krista’n min hmangaih a, Pathian hnêna thilhlan leh inthawina rimtui tak anga kan* tâna a inpe ang khân, khawngaihna lantîr zawm zêl rawh u.

3 Mi thianghlimte awm dân tûr ni âwm rêngin nungchang bawlhhlawhna* te, bawlhhlawhna tinrêng te leh, duhâmna tinrêngte chu in zîngah sawi pawh sawi ni suh se. 4 Thil tih âwm loh nungchang mawi lo taka awm te, thu lawi lo sawi te leh, fiamthu zahmawh sawite chu chîng tawh suh u, chu aiin lâwmthu sawi zâwk rawh u. 5 Nungchang bawlhhlawhnaa* inhmang ṭhîn te, mi bawlhhlawh te leh, mi duhâmte’n—mi duhâm chu milem betu a ni—Krista leh Pathian Ramah rochan tûr rêng an nei lo tih nangmahni ngeiin in hre si a.

6 Tu man thu awmze nei lovin bum che u suh se, chûng thilte avâng chuan âwih lo fate chungah Pathian thinurna a lo thleng dâwn si a. 7 Chuvângin, anmahni ṭâwmpuitute ni suh ang che u. 8 Tûn hma khân thim in ni a, tûnah erawh chuan Lalpa ta in nih avangin êng in lo ni ta. Eng fate angin nung zêl rawh u, 9 êng rahah chuan ṭhatna tinrêng te, felna tinrêng te leh, thutak tinrêngte a awm si a. 10 Lalpa pawm tlâk chu eng nge ni tih chian reng ṭhîn rawh u. 11 Thim thil tih ṭangkaina nei lovahte chuan tel tawh suh ula; chu aiin, an nihna hai lang zâwk rawh u. 12 A rûka an thil tihte chu sawi ringawt pawh a zahthlâk si a. 13 Thil hai lan zawng zawngte chu êngin a ti lang fiah a ni, êng chu thil engkim ti lang fiahtu a ni si a. 14 Chuvângin: “Aw muhîl, harh la, thihna ata tho rawh; tichuan, Krista chuan a ên ang che,” tih a nih kha.

15 Chuvângin, in awm dânah fîmkhur hle rawh u, mi âte anga awm lovin mi fingte angin awm zâwk rawh u. 16 Nîte hi suahsualnaa a khah avângin, a ṭha thei ang berin in hun hmang ang che u.* 17 Chumi avâng chuan â tawh suh ula, Jehova* duh zâwng chu eng nge ni tih hre reng zâwk ang che u. 18 Tin, uain ruiin awm suh u, chutah chuan nasa taka nawmsipbâwlna a awm si a, thlarauvin khat reng zâwk rawh u. 19 Fakna hla te, Pathian fakna te leh, thlarau lam hlatein inbe tawn* ula, thinlunga Jehova* tâna hla sain, rimawi tumsak rawh u. 20 Kan Lalpa Isua Krista hmingin engkimah kan Pathian leh Pa hnênah lâwmthu sawi fo rawh u.

21 Krista ṭih chungin intulût tawn ṭheuh rawh u. 22 Nupuite chu Lalpa hnêna an intulût angin, an pasalte hnênah intulût rawh se. 23 Krista chu kohhran lû a nih angin, pasal chu a nupui lû a ni si a; tin, Krista chu, chu taksa* chhandamtu chu a ni. 24 A nihna takah chuan, Krista hnêna kohhran a intulût angin, nupuite pawh engkimah an pasalte hnênah an intulût tûr a ni. 25 Pasalte u, in nupuite hmangaih reng rawh u, Krista’n kohhran a hmangaih a, a aia amah ngei a inpe ang khân. 26 Chutianga a tih chhan chu tuia sil ang maia Pathian thua ti fai a, a tih thianghlim theih nân a ni. 27 Chutiang chuan, kohhran chu a mit hmuhah mawi tak, bâl kai lo, zûr lo leh chutiang thil eng mah kai lo, thianghlim leh sawisêl kai lo a ni thei ang.

28 Chutiang bawkin, pasalte chuan anmahni taksa angin an nupuite an hmangaih tûr a ni. A nupui hmangaihtu chuan mahni a inhmangaih a ni. 29 Tu man mahni taksa* an haw ngai si lo va, an châwmin an duat zâwk ṭhîn, Krista’n kohhran a châwma a duat ang khân, 30 a taksa pêngte kan ni si a. 31 “Chumi avâng chuan mipain a nu leh a pa a kalsan ang a, a nupui a vuan tlat ang; tichuan, tisa pumkhat an lo ni tawh ang.” 32 He thurûk thianghlim hi a ropui a ni. Tûnah hian Krista leh kohhran chungchâng ka sawi a nih hi. 33 Eng pawh ni se, tu pawhin mahni a inhmangaih angin a nupui a hmangaih tûr a ni a. Tin, nupui pawhin a pasal zahna thûk tak a nei tûr a ni.

6 Naupangte u, Lalpa duh dânin in nu leh in pate thu zâwm rawh u, chu chu tih tûr dik tak a ni si a. 2 “I nu leh i pa chawimawi rawh,” tih hi thutiam nei thupêk hmasa ber a ni, chu thutiam chu hei hi a ni: 3 “Chutichuan, i tân a ṭha ang a,* leiah hian i dam rei bawk ang,” tih hi. 4 Tin, pate u, in fate ti thinur suh ula, Jehova* thununna leh zilhna* ang zêlin enkawl seilian zâwk ang che u.

5 Bâwihte u, Krista thu in zâwm angin in pute thu chu thinlung dik tak puin, hlau leh khûr chungin zâwm rawh u. 6 Mihring tih lâwm tum ang leka an hmuh lai chauhva ti lovin,* thinlung zawng zawnga Pathian duh zâwng titu Krista bâwihte angin ti zâwk rawh u. 7 Mihring rawngbâwl ang ni lovin, Jehova* rawngbâwl angin inhuam takin in pute rawng bâwl rawh u. 8 Bâwih emaw, mi zalên emaw pawh ni se, tu pawhin thil ṭha a tih apiang chumi vêk chu Jehova* hnên aṭangin a dawng leh ang tih in hre si a. 9 Tin, nangni pute u, chutiang bawk chuan an chungah ti zawm zêl ula, anni chu vau suh u, in bâwihte nên vânah Pu thuhmun in nei tih in hre si a, ani chuan mi duhsak bîk a nei si lo.

10 A tâwp berah chuan, Lalpaah leh a chakna ropui takah chuan thiltihtheihna nei reng rawh u. 11 Diabola thil tih verther takte dova in din ngheh theihna tûrin, Pathian râlthuam famkimin inthuam rawh u; 12 Kan beihte* hi tisa leh thisen an ni si lo; sawrkâr te, thuneihna te, he khawvêl thim chunga rorêltu te leh, vân hmuntea thlarau sual awmte an ni zâwk e. 13 Chumi avâng chuan, ni ṭha lova in do zawh theihna tûr leh engkim in hlen chhuah hnu pawha in din ngheh theihna tûrin, Pathian râlthuam famkim chuan inthuam rawh u.

14 Chuvângin, ding nghet ula, in kâwng chu thutak kâwnghrênin hrêng ula, felna âwmphaw hâ ula, 15 remna* chanchin ṭha puang tûra inpeihna pheikhawk chu bun rawh u. 16 Chûng zawng zawng bâkah chuan, rinna phaw lian chu la rawh u; chu chuan mi sual thal alh thei zawng zawng chu in ti mit thei ang. 17 Tin, chhandamna lukhum khum ula, thlarau ngûnhnâm, Pathian thu chu pai rawh u. 18 Chutih rualin, ṭawngṭai leh dîlna tinrêngin eng hunah pawh thlarauvin ṭawngṭai zawm zêl rawh u. Tin, harhvâng takin awm ula, mi thianghlim zawng zawngte tân bâng lovin dîlna thlen ṭhîn rawh u. 19 Ka kâ ka ân huna thusawi tûrte pêk ka nih theihna tûrin kei pawh min ṭawngṭaisak rawh u; chutichuan, chanchin ṭha thurûk thianghlim hriattîrnaah huai takin thu ka sawi thei ang. 20 Pathian chu chanchin ṭha hril tûra min tîrtu a ni a, chumi avâng chuan khaidiata phuar ka ni. Hlau lova a nihna tûr ang taka chanchin ṭha ka hrilh theihna tûrin Pathian hnênah min ṭawngṭaisak rawh u.

21 Tin, ka chungchâng leh engtin nge ka awm in hriat theihna tûrin, unaupa duh tak leh Lalpa rawngbâwltu rinawm Tukika hian engkim a hriattîr ang che u. 22 Hemi avâng hian in hnênah ka rawn tîr a ni, kan awm dân in hriat theihna tûr leh in thinlung a tih thlamuan theihna tûrin.

23 Pa Pathian leh Lalpa Isua Krista hnên aṭanga thlamuanna,* hmangaihna leh rinnate chu unaute hnênah awm rawh se. 24 Hmangaihna dik taka kan Lalpa Isua Krista hmangaihtu zawng zawngte hnênah khawngaihna nasa tak awm rawh se.